朱古力乾果包

今日同事放工時比咗袋野我，話之前整野淨底無心機再整，專登攞返公司比我，叫我用左唔好嘥，我點會浪費，先返家第一時間就開機，將同事比啲野放入麵包機搞個半鐘，再去超市買餸，返到去搞好餸就煮時麵包機就搞完，咁就做好型等發酵就去煮飯，食完做好野剛剛好就去焗包，明早又可帶啲返去比同事試

鮮檸檬炒豬柳粒

今晚返到屋企都喺去咗超市買餸，都唔知煮咩，點知大女就打來，順便問想食咩，都係個句是旦啦，後來我就提議左幾樣，她都話唔好，又話是旦，最後我買左腩肉同豬柳回去再睇下煮咩，返到去又問細想食腩還是豬柳，當然喺豬柳啦點煮呀，又是旦，咁就睇下雪櫃見到幾個新鮮檸檬又用來煮吓，剛食過排骨，今次當牛咁煮炒粒粒，樣樣少少加入去一齊炒，簡簡單單又一餐

材料: 豬柳1件, 檸檬1個, 西芹2條, 青瓜1條, 紅蘿蔔1條, 干蔥2粒
醃豬料: 鹽半茶匙, 糖1茶匙, 水4湯匙, 油1茶匙, 生粉2湯匙

豬柳洗淨切細粒

先用鹽, 糖同水撈勻

再加油同生粉撈勻

檸檬1半搾汁, 另一半切粒, 入好粒粒的檸檬先加入半茶匙糖

西芹, 青瓜, 紅蘿蔔, 干蔥洗淨去皮切粒

先用些少油炒香干蔥

加入豬柳粒放平煎煎

見到變白就可反轉另一邊

轉細火將檸檬汁分2次加入

豬柳差不多收汁

就加入西芹同紅蘿蔔粒

豬柳要熟透, 如果唔夠汁可加些少水

加入檸檬粒炒勻後熄火

最後加入青瓜

炒勻就可上碟

玫瑰煲整豉油雞

剛有條新巴士線由將軍澳去荃灣290&290A, 290A就適合我回家一程車落車行十分鐘比在官塘再要轉車方便，今晚就試搭，喺葵芳返到家附近四十分鐘到再行回家都唔世一個鐘，比以前回到官塘再轉有時個半鐘都返唔到，以後可以早點回家買餸，但車好疏要二十分鐘先有一班，如果走左就要等20分鐘，咁多一個選擇都好，今晚只買條魚同菜就得，返到家本來只簡單整只雞炒個菜同蒸鲩魚，準備好煮時，阿妹突然上來食飯，搞到又要再煮過飯，再浸多d菜又要加多個餸，好在家中有料就整多個腸仔車哩茄炒蛋

早一晚將只雞去頭同腳用左去煲湯, 因未知點整

上次買蠔油送左支豉油雞汁, 今次就攞哩用吓, 好簡單只用薑同蔥放喺玫瑰煲入面蒸20分鐘就搞掂

材料: 雞1只, 薑1件, 蔥1棵,  豉油雞汁4-5湯匙, 酒1湯匙
先將雞洗淨抹乾後用酒搽勻全身再加入豉油雞汁搽勻雞內外

在雞中間開一邊

將蔥同薑洗淨拍拍, 先放入煲底, 搽雞的豉油汁加入

將雞平放入, 皮向上

蓋上蓋20分鐘再焗10分鐘

用筷子插入脾位無血水洗出就ok, 如果有就多煮5分鐘

將雞放涼後斬件, 將淨啲汁淋入雞面就食得

檸檬排骨拌薯仔粒

唔記得昨晚買左排骨，今日又買左只雞，咁雞就留明晚，今晚食左排骨先，細女話要食陳村粉蒸排骨，點知買唔到，返到家唔知煮咩好，剛老公買生果時買左檸檬，咁就用檸檬煮加d薯仔個個都鍾意食，細妹要上來食又叫老公出去買條魚點知老公又買咗自己鍾意食魚仔，通常唔會劏又搵野做，今日真係唔停手，搞到11點先熨衫，有時星期日都未必可以休息比返工更辛苦，但無法人生就係咁忙忙碌碌又一日, 最緊要個個開心自己就開心

材料: 排骨1斤, 檸檬1個, 薯仔1個, 蔥 些少
調味: 鹽半茶匙, 糖1茶匙, 水1湯匙, 生粉3-4湯匙

排骨洗淨, 如大件最好自己再切平均大細

先用鹽,糖,水撈勻排骨

檸檬一半切片, 另一半搾汁, 薯仔去皮洗3切粒

煎炸排骨時先加入生粉

撈勻

半煎炸都要油夠熱, 用筷子試有泡泡就熱

可放入排骨

一邊金黃就轉另一邊用細火

大約10分鐘左右應該就熟可以轉大火攞起排骨

加入薯仔

試排骨熟未可用筷子容易穿得過就ok

薯仔2邊金黃, 筷子容易穿得過就ok

將薯仔回碟後倒起多餘的油

加入檸檬汁同糖

糖煮溶就試味

開始結身或可用栗粉調結

加入回排骨, 薯仔同檸檬片後就熄火撈勻

上碟可加入蔥絲就食得