晚餐之新鮮鮑魚煮到煙韌似乾鮑

又到星期日，今日可以在家休息一下，但都喺好早起身同老公食個簡單早餐，跟住清潔一下睇下電視上下綱，雖然休息但都自己攞嚟忙，煲粥整燒賣同煮豆漿做麵包又忙一日，昨晚老公買咗新鮮鮑魚，因為一煲過煮麵食就無煮，跟住就將鮑魚洗淨去彀用蠔油冰糖同2只指天椒全部放入飯煲炆30分鐘，出嚟口感煙韌好似乾鮑炆出嚟一樣好好味，今晚就將它加入冬菇煮非常好味道，輕輕鬆鬆又一日

今日用冬菇，帶子，蟲草花，雲耳同豬肉做的燒賣

今日做的排包

晚餐之老公煮完工豐富海鮮餐

今日順利完成2個月的陪月工作，老公都要返工諗住買外賣回家，雖然呢幾個月多咗食外賣，因為每晚回家都8-9點，老公都要返工，啲囡又多數在家食，好多時老公會煮但他話日日都喺果啲嘢，他又唔識變咁各自會加啲外賣嘢，完工想買多啲食得豐富，點知收工時睇到老公話今晚買咗魚，蝦蟹，叫我哋唔好再買，返到去已經煮好，真係好豐富已經有大半年無食蟹，老公好舍得買咗2只肉蟹，我喜歡食但要有時間慢慢食，今晚就可以慢慢享受因為明天休息，咩嘢都可以留明天做好開心老公煮得好好味，傾下食下就成個鐘有出去食自助的感覺，開開心心又一餐

晚餐之茄汁蝦

時間過得好快，唔經唔覺呢個媽媽做咗5個星期，還有3個星期左右就完工，本來想加多時間，可惜我8月的媽媽都怕自己早成日問我幾時完工，最快都要14號last day,希望8月BB唔好太早嚟，咁個媽咪就可安心，我又接得住，而家每日都好忙時間好似唔夠用，每日都6點起身搞掂完老公同女兒出門，自己都食完簡單早餐都出門，呢個媽媽住得唔遠，但7點半左右出門，買完餸再去到都會早通常9點半前，雖然返10點15分但都會預鬆時間，有時塞車就會十點左右先到，而家疫情嚴重去到媽媽家會用上十分鐘時間清潔，先在門口全身同物品都噴酒精消毒液後先入屋，跟住入洗手間洗手除口罩清潔面部眼鏡同手後再換衫盡量再清洗一次，再將換好的衫再噴一次先入回自己個袋，真係好嘥時間但都無法，只有盡量做可減輕感染，今日又星期日，過去二個星期日都有事，剛過的星期日約咗8月媽咪家訪先睇下環境，媽咪入院的準備，BB會瞓邊，沖涼的環境。。。等，最重要都喺攞炒米茶包等媽咪生完就有得飲，今日終於可以喺屋企休息一下，但又有幾個媽咪下年3月搵我，所以又忙覆她們，3月的媽咪喺孖胎終於有機會湊，另一個3月的媽咪就希望預產期喺月尾咁就可以接埋，今日大囡要返所以又一早起準備早餐同午餐盒，跟住同老公食咗簡單早餐就去超市買日用品，順便買些少餸，而家都無咩時間煮，老公回家都7點左右，而我有時更遲，通常買外賣或一煲過都係簡單嘢，今晚要煮返餐她們最喜歡的，開開心心又一餐

 細女最愛的粟米豆腐湯

 二個女最喜歡的土匪雞翼

 本來午餐炒嚟食，最後做咗晚餐

 太耐無食的金銀蛋莧菜

 半煎煮的黃花

 茄汁蝦個個都喜歡

晚餐之冬菇蝦米粉絲炒節瓜

早二日6月媽咪生咁啦，今日專登攞咗部份嘢去她家，應該過二日開工，幫她買坐月時用的材料，因為太重怕開工時又要買餸菜，所以約咗她老公先將部份放低，等開工就有得用，搞掂完就去咗舊年完工的媽咪度探下她們，呢個媽咪的老爺奶奶同我做咗好朋友，所以今日都係上她奶奶家睇囡囡，8月就一歲，唔見咁耐唔同哂，百日宴後又因疫情都無見過，呢個就係我之前講過超級好精力的BB, 出世時都唔洗點瞓，而家更加利害而且爺爺話喺塊膏布甩唔到，二老湊得個孫好好，見她們雖然辛苦但好開心，去到已經12點機，她們好客氣請我食午餐，大家傾下食下不知不覺已經四點幾，BB其實好眼瞓但心好嘢一直都唔瞓，我都唔好意思打搞咗咁耐就走，奶奶好客氣專登帶我落去搭車同睇周圍環境，因為過幾日就喺她住的附近開工，話有個小街市如果我突然忘記買咩都可補足下，之後就搭車回家順便買些少餸，家有幾個節瓜開始唔太靚就加咗蝦乾，冬菇蟲草花去煮粉絲，呢個餸都好多媽咪喜歡食，通常第二個星期都會煮，我啲囡最喜歡喺粉絲，早幾日煮咗個辣肉醬用嚟加麵食，今次加咗2湯匙非常惹味，蒸魚炒菜簡單又一餐

晚餐之豆腐魚湯

休息咗差唔多一星期，但都唔知忙咩，今日去咗攞陶寶嘢，見得閒又搵咗部慢磨機回來試，之前有個媽咪問，雖然都知喺咩但自己親身試先得，喺綱上好多人啲料都唔確實，明明唔得又話非常好，之前買咗部而家好流行的破壁機，話整豆漿唔洗浸半個鐘就有得飲無渣，喺綱上睇咗好耐搵到部評價都幾好，點知喺好快，但好嘈好渣試隔三次都唔太清，啲囡唔飲話有怪味，再試浸豆去煮都一樣，就寫出事實，賣家要求取消評價可退款，點知我刪除後就要求退貨後先可退款搞咗就嚟一個月都喺無得傾，香港退回大陸貴過退款，最後放棄，所以大家買嘢要小心，如果試都唔好太貴咁就唔太肉痛，下午收再個媽咪好消息順利生咗過幾日就開工啦，好開心又可以見到啲BB, 攞完嘢回家又唔想再出去買餸就簡單煮，之前食淨啲魚唔好浪費先用嚟煮湯隔咗渣加豆腐非常好味，雪櫃有雞翼就解凍醃好焗一焗，炒菜蒸魚又開飯

用食淨啲魚頭，尾骨去煲出嚟都奶白色加蛋同豆腐好好味

阿囡剛好買回來的油炸鬼配魚湯又好好味

呢款所謂整豆漿半個鐘可以飲無渣的破壁機，大家最好唔好買，好嘈大聲到會嚇親

 做完底部已見到好糊

 部機有所謂清洗功能喺唔得，要浸好耐先洗得乾淨

 隔渣

 隔完見到啲渣，完全唔係講咁無渣好滑

悠閒的星期六

咁快又星期六，已經休息一個星期，6月媽咪過咗預產期還未有聲氣，醫生叫她呢二日無動靜就星期一入院催山，咁應該星期尾就開工，好好休息埋呢幾日，老公今日都唔洗返，大囡要返工，細囡又話返學就準備簡單咖啡，麵包做早餐，搞掂二個出門都係8點幾諗住瞓多陣，但最後都係無瞓清潔下，老公起身就一齊簡單咖啡麥皮，麵包加多只蛋又一餐，12點幾就同出官塘幫個媽咪買些少坐月用的食材，跟住就去飲茶，估唔到好多人等咗差唔多45分鐘先有位，而家疫情感覺無咁緊張，所以啲人都出嚟行下食下嘢，真係太耐無出嚟無我想像中咁靜，飲完茶再周圍行多陣就回家，諗住簡單一煲過，二個囡都有節目，點知細妹問有冇飯黐，開到聲當然唔可以一煲過，買咗條班，細妹最愛的茄子同燒鴨，最快手又係蕃茄湯，今次就用之前食淨的雞去煮，蕃茄有營養配咩一齊滾出嚟啲湯都係咁好飲，簡簡單單又一餐

豐富晚餐同大囡提早過生日

又喺放假中，過幾日大囡生日，疫情開始有改善，大家都開始正常工作，今晚煮咗豐富晚餐同大囡提前過生日，其實都係普通她喜歡的，本來話要食西餐煲咗蕃茄薯仔魚湯突然有啲事出咗去，最後都喺是旦煮，星期日正日又訂咗食放題到時食好啲，預祝囡囡生日快樂，健康幸福，蛋糕都喺細囡早日做定送比家姐，家姐當然話好好味，而家大啦唔洗唱生日歌，哈哈哈我就非常喜歡，開開心心又一餐

蒜蓉牛油蒸元貝

焗薑蜜雞翼拼薯條

蕃茄薯仔大魚尾湯

菜心炒墨魚滑

蠔油炆牛仔肉

免焗簡單的oral 芝士蛋糕