網頁

2021年10月30日星期六

同家姐,細妹,細女午餐在校長燒肉

放咗差唔多2個月,班又開唔成,悠悠閒閒又好似忙忙碌碌話咁快下星期一開工啦,本來預計3-4號先開工,個媽咪提早個半星期入院開刀,點知再早幾日28號突然穿水加陣痛入咗醫院生咗所以又提早星期一開工,原先星期一做完檢查同啲女去試校長燒肉,大女咁啱休息,點知星期一開工就諗住同細女去試先,有時間再一家去,點知咁啱家姐同妹都得閒,知我開工又無時間同她們食,咁就一齊去試,12點幾去到都多人,我哋未清楚,淨燒肉或燒加打邊爐都係入坐計2個鐘,之前睇個4個人就可坐4個鐘,原來要食埋魚生先可以咁家姐話每人都喺加20可以坐耐啲就燒肉,打邊爐,魚生一齊食,其實只得我同細妹會食少少,家姐同細囡唔太愛,但多坐2個鐘就食得舒服啲,呢間真係好多嘢食,如果2個鐘食齊都好趕,淨燒都好多款,加埋打邊爐就太趕,但價錢唔貴又多選擇,熱盤都多,飲品款都多,有十幾種花茶料可自選,火鍋湯都有3款自選,魚生就有幾款,但每次都喺攞少少,樣樣少少都食唔齊,下次可以再試,雖然話4個鐘我哋都喺3點幾就走,出到去出面已經收哂嘢,我諗如果真係坐咁耐就要問最後取食物時間,今次平均每人連加一都喺$175左右比韓燒貴少少,但呢度就多嘢食,食到魚生就好抵食,好似我哋唔太食得呢個價都合理,甜品就唔多,晚餐貴就好似有埋雪糕,家姐好開心話好平下次可以再嚟,要等我完工平日食就更抵,食完行一陣就各自回家,今晚同細女都唔洗食,只係簡單整些少比老公同大女,開開心心又一日,明天準備一下後天就開工

小碟就喺每次攞魚生只可3樣,每樣2片

喜歡沙律都唔錯

打邊爐,火鍋細細都幾好

甜品就一般

火鍋部份料
各種粉麵
魚生專櫃要有魚生貼紙先可以攞
都有一啲壽司卷
沙律吧



燒物都好多款


2021年10月29日星期五

小食之芝麻核桃紅棗脆餅

時間過得好快,下星期中開工啦,今日約咗老師食午餐,老師知道我就嚟開工就約我出去,呢餐後可能要到明年4月中先有時間再同老師食飯,一早搞掂各人出門就整咗啲糖,格仔餅同新試的芝麻餅,老師好喜歡芝麻所以今次試下整呢個,都唔難好簡單只係工夫多,核桃要焗後整碎,紅棗去芯切碎,芝麻白鑊乾炒後加蛋白同少少粟粉再去焗就搞掂,喜歡芝麻核桃就最啱食

方便老師就打包得靚靚
材料:蛋白2只,黑白芝麻各60g(可全用黑或白)
核桃40g, 紅棗40g, 糖15g, 粟粉15g
先將黑,白芝麻炒香,核桃用滾水沖洗可去苦澀味後焗爐180度15分鐘放涼後整碎,紅棗去芯後切碎
先將糖同粟粉搞勻
加入蛋白撈勻

撈勻後加入芝麻,核桃同紅棗
拌勻後有些少黏黏就可以
將料放入要的大細模,盡量放平同薄
做好後就可入爐150度15分鐘
焗完金黃色唔黏爐紙就搞掂(每個爐溫都唔同,如果時間唔夠多焗幾分鐘)



2021年10月25日星期一

晚餐之南瓜蒸排骨

下星期應該開工啦,呢幾日朋友同啲同學都約我出去,今日又喺一早起身搞掂老公同女兒出門就去瞓一陣,9點左右食完早餐清潔一下,就出去買餸因為約咗個同學食午餐,今次同同學去從心食素,因為呢個同學食素就帶她去些呢間,準備咗好今晚的晚餐就出門,大女今晚想食南瓜蒸排骨,醃好排骨同煲定個蕃茄粟米洋蔥紅蘿蔔,搞掂好就出門約咗同學食2:30, 今次試咗一個人餐半價真係幾抵,跟住叫咗2個小食,蛇羹同蟹鉀,本來喺試香橙骨,同學見到隔離的蟹鉀好靚就轉咗,但好差無咩味又好實,個人餐跟炒飯,份量太多,我哋食唔哂同學就打包回家做晚餐,食完行一陣就各自回家







從心的午餐,個人餐的小食之雞絲海哲
個人餐有3款湯我哋要咗南瓜魚翅羹,小食有幾款選一個我哋選咗雞絲海哲,十幾款炒粉麵同學選咗芥蘭炒臘肉
炸蟹鉀,樣好靚但外面太硬入面無味
另外再叫2個小食喺黑松露多士同杞松茸拼豆腐
黑松露多士都好好味





2021年10月23日星期六

晚餐之大閘蟹

話咁快又星期六啦,今日一早起身整咗格仔餅,蛋黃餅同買咗個蛋糕去個下個月中1歲的囡囡家提早慶生日,個媽咪叫我參加BB個生日會,我開工去唔到所以今日提早去同BB慶生日,好開心BB見到啲食物好鐘意,初時唔認得我後來熟咗就成人舉起雙手叫我抱,呢個囡湊咗3個幾月肥dodu,而家越大越靚囡而且好乖,坐定定唔扭計,買咗KFC套餐上媽咪家一齊午餐之後切蛋糕食完同BB玩咗一陣就回家,阿囡訂咗大閘蟹做晚餐,但2個都唔係點食,知我喜歡專登買,所以我又買些少家鄉雞再煮個菜,食蟹好花時間星期六就最好可以慢慢食,星期日唔洗返就唔洗咁做起,今次第一次買回家食,買咗5只有配薑茶同食蟹工具,阿囡唔知又比錢買咗套,其實真係食就應該一人一套方便啲,2個囡只係試食啲膏,肉同脚我同老公食,點知一食就幾個鐘





可能蒸時間太耐,啲蟹油溜哂,啲膏比較實,呢只啲膏就唔多

我呢只就多啲膏,阿囡話要同我影返張
一套工具有埋醋,薑茶同紫蘇包同教埋點食,另外要多套就加$10

果個人教水滾放入紫蘇包
跟住放蟹,背向天就唔會走哂啲膏
時間蒸20分鐘,其實太耐,蒸完見啲蟹油溜哂出嚟,啲膏比較實
呢個蛋黃餅好簡單只係蛋黃同麵粉撈勻入焗爐最啱BB食

一手攞蛋黃餅,另一只就攞格仔餅
換咗衫出街街就好乖坐定定
切蛋糕又喺坐定定