喜歡煮食的我, 每日開心煮和大家分享每一餐
又星期日可以休息一下，但今日好忙喺大女兒過大禮的大喜日子，先祝她們永遠幸福健康快樂，開工後完全忙到無咩時間好彩老公昨天休息，早幾日已經要執屋太亂同太多嘢，昨晚又要裝飾一下屋企搞到3點幾，今早想瞓晏啲但7點幾都起咗身，老公好緊張又太開心再跟下有咩甩漏，我就準備簡單早餐食完準備啲利市，搞掂完輕輕鬆鬆休息一下，家姐，姐夫同細妹12點左右都過嚟幫手，好熱鬧男家成十個人送禮過嚟話十全十美，我哋都無諗過咁大陣容，放好哂所有嘢，她們一個代表講好多祝福說話後禮成，阿女同未來女婿就出現，一對新人影咗好多好搞笑相後，大家都分別同她們再影，最後嚟張大個照就出去食豐富的午餐，訂咗2圍有龍蝦鮑魚同雞絲翅餐，雖然大部份都喺第一次見，後生果圍都傾得好開心容易熟，而我哋老一圍都一樣大家都好開心邊食邊傾又到5點就各自回去，回家後處理好嫁娶物品就派禮餅比鄰居，午餐太豐富今晚就唔洗煮，食些水果就搞掂，開開心心又一日
椰子椰子必有的過大禮禮品之一
龍鳳禮餅
開始送禮後安排好，2位代表就講解禮品的一切祝福語
今日中秋第二日難得休息，昨晚7點幾先收搞掂哂就瞓咗，今日本來可盡情瞓，最後都喺8點幾就起，同老公簡單食咗早餐就出去買餸煲家定個湯先，因為約咗家姐同細妹出去飲茶，飲完太晏就難煲湯，姐夫好有興致話呢餐他請，家姐就叫咗好多嘢，食飽飽就去樓上幫個媽咪買啲嘢後再去買啲餸，點知老公好興致無啦啦又蝦，石班同扇貝都幾貴差唔多20幾蚊一只，最離譜喺唔劏，又話我哋無講要就等，等咗好耐最後老公話走自己整，今時今日咁樣的態度唔怪之得啲人離港消費，跟住買多些少其它嘢就回家，老公還想買鮑魚我禁住唔比買，實在太多嘢，昨晚的盤菜還未清，加返些少菜砌一個小盤菜，簡簡單單又開餐
時間過得好快又中秋，喺度祝大家中秋幸福健康愉快，唔經唔覺開工已個多月，只喺覺得好忙啲時間唔夠用，已經早返遲走，無諗過做咗個幾月晚晚最早都遲成個鐘先走，收5點半最早6點半先走，今晚雖然中秋都搞到7點幾先走，成家人在家等我食中秋飯真係唔好意思，家人喺最好，因為個個要返工，她們都有收早，老公就早一日預備大部份嘢，我出門前都炆定冬菇同花膠，老公整齊嘢就可以砌盤菜熱住等我回家就開餐，雖然好攰今早5點幾起身直落到而家，成家人一齊開開心心簡單慶中秋，餐後月餅同湯丸無得少，我食完太攰喺sofa瞓咗，今年最開心喺收到3年前做的媽媽專登送咗盒月餅比我流心奶黃都喺我家最喜歡，做緊呢個媽咪都好客氣，早幾日問我喜歡食咩月餅，我話唔需要唔好客氣點知她買咗盒godiva朱古力送畀我真係好開心，原來轉咗呢行今年已踏入第8年真係好快，今年中秋雖然忙忙得都特別開心
盤菜
月工後好快就開工，本來8月尾9月頭先開，8月中計畫同家人去旅行，大家都攞哂假，因為呢個BB有啲問題提早出世我完工後都等開工，旅行就無得預，大家就喺香港食下嘢周圍行，開工剛好2星期，日日都好忙，BB 出世喺氧氣箱媽咪諗住佢起碼過幾兩個月先可以出院，而我等BB出院就隨時開工，好彩唔洗一個月就出院，出完之後第4日就啱啱好30日滿月，回家後媽咪好忙基本安排去健康院，還有好多BB要返醫抽血，照超聲波其它覆診排得好密，開工呢2星期特別忙頭星期每晚都7點半左右先走，之後最早都6點半過後，唔知點解特別攰，回家已經8點幾9點沖完涼食咗飯都會喺sofa休息一下再去搞埋明早的早，午餐後就去瞓，雖然BB滿月都好似剛出世回家一樣，因為餵奶要特別小心，唔可以急同掃風要密掃，呢個星期已經好好BB食得好明顯已經唔同出院，媽咪開始無咁緊張，希望下星期開始唔洗咁遲走，而家又要老公跟晚餐，每晚都喺好是旦一煲過或者買外賣
滿月唔少得我送比BB的祝福，快高長大，身體健康
每日午餐都準備比家姐唔同的粉麵
媽咪其中一個午餐
時間過得好快今日又係last day喇真係有啲唔捨得每次完工都好唔捨，喺度捉媽咪同bb身體健康bb活潑精靈，全家都幸福美滿，唔經唔覺咁快有兩個月，呢兩個月每日都係早出晚歸最早七點前到夜晚最遲七點幾先收工，本身返十點三到五點半嘅我每日都係免費超出咗返工嘅時間，初頭呢個阿媽請的姐姐仲未嚟到，所以就好忙每日返去清潔早餐碗碟後再清潔奶樽，如果bb要餵奶就搞掂咗bb同媽咪休息我先去做，搞掂好就去準備午餐，湯，燉湯，每朝都好趕雖然好早去到都好似唔夠時間，頭幾日bb黃健康院醫院2邊走，頭個星期忙忙忙，禮拜日都返咗去免費幫手湊BB出院，未試過忙到個人好攰，每晚回家食完飯就喺sofa休息一下好多時瞓著咗，滿月啦都係一樣送紅雞蛋同班蘭蛋糕，bb越嚟越叻埋身容易咗，媽咪返到屋企第三日已經全人奶喇食得好瞓得好自然就會多奶，早餐食飯就更加好添呢個媽咪啲人奶多到入冰箱已經爆曬棚呀，最開心睇住bb由2.8 kg到我兩個月4.75kg，最叻喺2星期唔到就戒咗夜奶，但係個媽咪就好擔心bb食唔飽bb唔夠唔夠食，半夜自己都會特登摷醒bb去飲奶，後來我哋去健康院同醫生講完醫生都話好叻錫曬你，叫媽咪唔需要，個媽咪成日覺得個女細碼好搞笑，日頭其實食得夠就得，日頭佢係三個鐘頭一餐我餐都過百，每日差唔多都為三次我先收工，今日最後一日啦但係都好似平時咁，雖然有姐姐我都一樣6點幾先走，第五個禮拜姐姐到咗喇，頭兩日呢個姐姐都叫做跟住你做下嘢聽你講，第三日就唔會理你喇媽咪入咗房佢就喺出面做自己嘅嘢就算bb喊到拆天佢都當聽唔到好搞笑，中文又唔得英文又唔得每日都要用翻譯同佢溝通，其實我覺得呢個姐姐識啲英文唔同中文，如果喺星加坡湊一個小朋友湊咗六年全英文點可能一啲英文都唔識，只不過佢係選擇性聽到同唔聽做同唔做，做咗呢行差唔多七年教過好多姐姐同埋見識過好多姐姐，雖然懶但係頭一兩個月會做下戲，唔會懶到好似呢個咁，話想學中文，呢2公婆就叫我盡量同她講中文，我無理有時中有時英，我覺得她扮唔識聽，因為有陣時我同媽咪用中文講，有次話叫咗佢煲水但係冇反應點知轉頭佢就走出嚟話唔記得煲水，所以我覺得佢應該識聽但扮唔識聽囉，但係啲中文真係麻麻好似每次餵奶，如果BB唔飲叫佢同BB講啜啜啜佢就講咗嘟嘟嘟同埋呢好嘈，就算bb飲緊又好冇飲又好佢都係不停講嘟嘟嘟，搞到我覺得好煩但係我再教佢嗰陣時叫佢唔使成日講，如果嘅佢唔飲先講，最離譜喺已經飲完抱住去瞓緊覺佢都仲喺度嘟嘟嘟，我就話已經瞓咗還叫bb嘟嘟嘟搞笑到暈咗喺度，最好笑就係呢個姐姐禮拜六第一日嚟，禮拜日媽咪就已經放咗佢假話跟勞工法做滿7日就放，但剛回都未開工，應該呢個姐姐覺得呢2公婆容易蝦，呢個媽咪啲朋友已經教她們點對姐姐，但她們都喺一樣無咩特別，有日個媽咪同我講，她的朋友話姐姐放完假返嚟嗰陣時會同佢哋清潔晚餐啲碗同埋其他嘢先會去瞓，但係呢個姐姐係冇八點鐘返嚟沖完涼同佢哋講good night跟住就返房，佢哋好唔高興但係就冇出聲只係將啲碗全部唔洗搵水浸住等第二朝佢自己做，以為咁姐姐就會做咗先，但呢個姐姐喺唔會就算啲衫乾收咗放喺sofa都唔會處理等第二日，呢個姐姐好勁第5日我哋去健康院3個鐘，全程咩都唔做喺屋企玩電話，玩到我哋返電話急放喺垃圾桶面，以為坐果度無人發現知道有cam都唔理，以為好叻坐果個位個cam睇唔到，而家新嗰啲cam係會識別人個位置雖然睇唔到但係都知道佢喺邊度附近，唔旦懶做好差教她喺放錢入她袋，第3日媽咪見唔到我講多2句教她點做就黑我面，有日比個媽睇到同我講，我話一早喺咁，對我黑唔緊要唔好對你哋黑就可以習慣曬，反正還有2星期就完我都好少理，做好自己同教你，你唔聽都無法，人工唔包教姐姐我都喺盡自己本份，雖然今日完工，但29號應承咗媽咪免費返去帶bb打兩個月嘅針之後同佢沖埋涼剪埋指甲先返屋企
滿月送比媽咪的蝦同魚等她們一家食咗成世開心健康幸福
滿月婆婆同姨媽過嚟慶祝的簡單滿月餐
