晚餐之黑椒安格斯牛仔骨

話咁快又星期日，今早又一早起身煲粥炒烏冬，蒸燒賣同煎餃子，因為二個女又話同我哋食完先出去做嘢，搞掂她們出去就上街市買咗湯料回家煲湯後就出老豆度同老豆飲茶食午餐，每個星期日的節目，飲完就買餸回家，見到好靚的安格斯牛仔骨$68一磅好似好抵，攞咗4條估唔到要差唔多90蚊真係有啲貴，老公就話啲囡鐘意無所謂，今晚就用嚟整女兒最愛的黑椒味，放假就可以煮多啲，開開心心又一餐

材料：牛仔骨4塊，洋蔥1個，黑胡椒碎1湯匙，蠔油2湯匙，水2湯匙，糖1茶匙，老抽1湯匙，蔥些少

 牛仔骨洗淨切細件，洋蔥洗淨切條
先將牛仔骨入鑊

 煎到2邊金黃後用碟先裝起

原鑊加入洋蔥同糖炒到洋蔥有香味同金黃色

 加入牛仔骨

 黑胡椒碎，蠔油同水快炒到水收乾試味
（回鑊的牛仔骨要快炒收乾就唔會韌）

晚餐之土匪雞翼

時間過得好快，下星期尾應該開工啦，好開心又可以親親BB, 雖然放假但每日都好忙，啲時間都好似唔夠用，晚上得我同老公都係簡單煮，過去幾日都係去家訪3月同4月的媽媽，4月的媽媽因為提早2星期開刀應該趕唔切去，但有家人幫手，完咗三月就過去開工，所以提前家訪同攞定茶包比她生完立即有得飲，又去探下之前啲仔同囡，有個仔已經歲半唔認得我，見到我就咸，後來玩熟咗就開始有笑容，見返啲仔仔，囡囡健康又活潑真係好開心，今日一早起身整完早餐，午餐盒諗住去瞓多陣，最後都喺起身因家姐的電話，約咗姑婆飲茶叫我一齊去，咁起身整咗個蛋糕比姑婆，她最喜歡食的班蘭外邊用牛油同太甜，而我無牛油無泡打粉少糖最啱食，搞掂完就同家姐出去接她，點知好大雨最後她怕跌倒唔咁出唯有下次啦，同家姐食完嘢買回家又4點幾5點，阿囡話返喺食想食土匪雞翼，去完街市買菜魚又走去超市買，有報告講超市有啲牌子喺無激素可以食得安心，回家又忙煲湯，燉老公喜歡的涼瓜腩肉，阿囡的土匪雞翼，差唔多她們都回來準備食開飯，開心愉快又一日

如果有興趣呢個雞翼可以去以下綱址有詳細做法

https://angelma0421.blogspot.com/2015/05/blog-post_4.html?m=1

晚餐之人參糯米雞湯

今日安排咗去三月的媽媽到家訪，都係6點幾起身整早餐，午餐盒，搞掂哂出門，唔洗返諗住再瞓，之前二個月因入元朗，天水圍，每日都7點半搞掂他們出門自己食咗早餐都好趕出門，但都係早起去街市買定餸，細囡無課返咗嚟就煮嘢同她一齊食完先出門，一點多啲就出門，因為唔知路程要多少，去到早咗媽咪可以就上去，都係睇下BB瞓邊度，沖涼位置，廚房用品，講下媽咪要注意咩，最主要喺放低炒米茶包，方便媽咪生完立即有得飲，大家都好啱傾，唔經唔覺又到5點幾就回家，之前有個朋友去韓國話人參雞湯好好飲，專登比一包我試，今晚就返熱包雞湯，份量只係1－2人但覺得太咸加水夠4人飲，雞釀咗糯米，人參味都有啲，雞過份淋連骨都容易咬爛，感覺麻麻，我應該唔會買，哈哈哈

順便煎二條黃花配檸檬汁，原來味道都唔錯

午餐專登煎比細囡配麵，點知只係食少少，今晚就返煎比老公

晚餐之牛油蒜蓉雞翼

今早同女食完嘢就出去老豆度，每個星期日的例牌節目，又同老豆去飲茶行下就買餸回家，昨晚都係食蒜蓉雞翼但就喺焗爐整，先將雞翼簡單用鹽，糖同生粉醃好入爐先焗20分鐘左右就加入蒜蓉喺雞翼面再焗10分鐘就搞掂，今晚啲女想食牛油蒜蓉雞翼，今次就喺爐先煎後加入牛油同蒜蓉，慢火等牛油同蒜出味，唔可以大火蒜蓉好易燒燶就會苦，慢火還可以令雞翼更入味更香，又整咗釀長椒同茄子但就用豬肉同魚肉撈勻，味道更好味但就要多些時間怕肉唔熟，炒菜蒸魚又開餐

長青椒真係好特別，只只都唔同有好辣，小辣同唔辣要食到先知

當加入蒜蓉同牛油就要轉中細火

 可以蓋上蓋就可確實雞翼入味同全熟

晚餐之鮑汁蚊鴨掌

今日有時間去咗探舊年四月的仔仔，時間真係過得好快，阿仔已經9個月，媽咪話剛開始無埋身餵人奶喺因為阿仔出咗4只牙，呢個仔真係好得意，好叻，嫲嫲好有心機湊得好好，每日都教他好多唔同啲嘢所以已經識好多嘢，最好笑喺嫲嫲叫他同我做massage, 他真係好認真喺我只手到按下按下，問他咩嘢都識而且好乖，當我去到媽咪問他認得Auntie Angel 嗎？話抱抱他好似知第一時間就比我抱，呢個成日笑開心果，見到都好開心，之前媽咪都周不時比相同video我，見到每個仔或囡成長真係好開心，呢個媽咪同BB湊得最耐二個幾月，回想那二個月好開心，她們一家好和諧老爺奶奶都好好，今次上去奶奶都專登過嚟比利市我，我真係無諗到好唔好意思，諗住過咗元宵無準備，呢個媽媽又好客氣送咗盒手工曲奇比我，搞到我好唔好意思，下次再去一定要請她們食飯，大家好開心傾下講下又要走啦，阿仔都開始想瞓，今晚老公早收幫我準備好，以為回去簡單煮，點知返到去見老公喺到搞鴨掌，她同事又送咗比他，只係用個煲仔去出水，搞到周圍都喺，我立即就換煲同用鮑汁去炆諗住唔夠時間，估唔到好好味，又買個大魚頭用薑蔥去炆，搞到成九點幾先開飯，明天星期日可以瞓晏啲，開心的一餐

阿妹又上嚟食話試她過年買比我的瑤柱臘腸，我都忘了回家老公已煲好飯，咁就切片去煎二條，感覺好咸好硬無瑤柱同普通的無分別，下次可以唔洗再買

晚餐之咕嚕排骨

又到星期日可以瞓晏啲，最後又一早起身去準備，今晚本來只有大女朋友嚟拜年，點知叔仔問今日在家嗎？剛去完旅行上嚟拜年，老公當然開心問細路會否晚餐先走，細路話好呀，咁老公就同女講，你的朋友唔介意就嚟唔係就改期，真係親情大過天，最後好熱鬧又十幾人開餐，買咗新鮮椰子叫老公去開，新鮮當然好啲但功夫就多咗，要先去毛再放椰水跟住整開將椰子攞出再去皮切片又搞咗成個鐘，先煲湯因下午又出去同老豆飲茶喺必定的節目，而家每個星期日老豆都換好衫等我哋去飲茶，飲完就買魚，蝦同其它餸返家準備，買咗排骨諗住蒸就最簡單，點知姪女想食就轉整咕嚕，但無三色椒又無菠蘿，最後就洋蔥加蔥搞掂，一上枱可能太細碟好快就唔見咗，大家說說笑笑邊食邊飲紅酒，好開心愉快的一晚

象拔蚌花膠炒西蘭花

咕嚕排骨

香草雞同乳鴿

冬菇豆腐煮菜心

 蝦喺平咗但就好似唔夠

 今晚條班就無過年咁貴

此中豬手都係黑椒煮最惹味，唔洗好似之前煮發菜蠔豉食到年初十

 細妹都嚟熱鬧，專登買嚟的飯後甜品

每個星期飲茶例牌都係呢啲啱老豆容易食