網頁

2018年8月28日星期二

晚餐之大囡大學同學嚟聚餐

放咗咁多日,今日終於在家執下嘢,每日都好似好忙,陪啲媽咪打針,覆診,約同學,家姐,朋友午餐又上下堂,早幾日買咗料整月餅,以為今日會有時間想學整溜心奶皇,執完屋又喺時間出去買餸準備,今晚大女啲同學過嚟食飯,由舊年講到今年因為我好忙,她們最想食我的雞翼,她們都畢業已有份好工,只有我女兒還半工讀master,今晚就簡簡單單整咗,最愛的晴媽雞翼(喺她們改的,好搞笑),還有木瓜花生雞腳湯,蒜蓉蝦,蓮藕餅,檸檬蒸烏頭同金銀蛋莧菜,簡簡單單的一餐,邊食邊傾好開心,飯後水果再加她們帶來的泡芙





2018年8月27日星期一

晚餐之二人晚餐炒黃薑飯

今日一早整咗提子合桃包做早餐同二個午餐飯盒就出門,剛完工的囡囡要去醫院睇報告,呢個媽媽因為一個人去,自己又未開工就陪她去,完工差唔多二星期,呢個媽媽日日都有聯絡,每日囡囡都有唔同的問題,但都係少問題,雖然不停鼓勵同解釋,可能自己湊好大壓力,我問她是否一個人好辛苦,她說她媽有幫手,老公放假都會過嚟幫手,每個Bb都唔同,新手媽媽要記住自己的仔仔或囡囡,每日有咩唔同,有冇大,小便咩嘢顏色,有同平時唔同就可能腸胃問題,通常全人奶,媽咪食咩嘢都有影響Bb 因為你食咩Bb都一樣,記得有一次個媽媽食咗芝麻糊bb大便就黑色,當時大家都唔知咩嘢事都有啲擔心,跟住記起早餐食過黑芝麻,下次大便又正常黃色,所以大家要知道餵人奶喺有影響食嘢後要留意bb 同之前有冇唔同,通常bb唔舒服多數會有燒,如果無燒又正常飲食,精神又好只喊就睇下咩嘢原因喊,片有冇濕,是否肚餓或想瞓,有啲bb喜歡有人傾計,做媽媽雖然辛苦但見到Bb每日都唔同就會好開心,自己開心仔仔囡囡都跟媽咪一樣開心,睇完報告醫生話咩事都正常,但見媽媽好緊張我就同醫生講情況,叫醫生睇下醫生就話無發燒,肺又好清應該無咩嘢,我就同媽咪講可以放心,搞掂完陪她回天水圍她媽媽家,真係好遠今次自己搭地鐵回家,搭地鐵真係好快一個鐘左右但價錢就好貴,自己又轉多程小巴先回到家差唔多要$30單程,回家後都唔想搞嘢只得我同老公食,就簡單滾蕃茄湯同炒個黃薑飯,早前同學去旅遊回的手信,黃薑飯好有益啱坐月食,下次先分享點樣簡單炒
 黃薑飯加幾粒提子,味道又唔同哂

同學送的黃薑粉,原來香港都買到,哈哈哈
今早的午餐盒,有機節瓜蝦仁肉片紅米飯

2018年8月26日星期日

晚餐之蠔餅

又喺星期日,都係早起煲湯去老豆到飲茶後回家,今日家姐請飲茶叫咗好多嘢但我覺得下午茶最底飲都係富臨,今日去咗新苑好混亂,落咗單成半個鐘都無嘢到,追咗幾次先話無落單又重新落,無叫啲又無啦啦出現還打孖嚟真搞笑,飲完茶回家以為得我同老公二個食,諗住簡單沙煱雲吞雞就算,昨晚還有半只雞,昨日上海雲吞皮加咗冬菇同雲耳,買到廣東雲吞皮就買蝦同豬肉回家包,點知二個女話可以返嚟食,咁又去街市買條魚,魚檔又介紹買啲蝦,我就食唔出有咩唔同,跟住見蠔靚又買蠔整蠔餅,以為有蕃薯粉,點知喺木薯粉再加些麵粉同蛋去煎,味道都唔錯,可惜做唔到蕃薯粉的脆同煙韌感,記起灣仔個媽咪,她奶奶親戚喺大陸帶回來的薯粉做蠔餅,味道真係好她們都讚不絕口,雖然無蕃薯粉但啲囡都話好好食,家人就喺咁開心又一餐




2018年8月25日星期六

晚餐之吉列豬扒

又星期六時間真係好快,呢個星期日日都出去上堂同約人食午餐,只係休息咗個幾星期就感到自己重咗,下星期開始要食少啲先得,老公都休息,細女又無堂上話同我哋飲茶,好耐都無同我哋飲茶,我返而呢個星期都飲咗幾次,開始都有啲怕,但叫到又唔會唔去,囡大咗有自己的節目,所以叫到就要去唔好唔去,哈哈哈,今晚又可以喺屋企晚餐好想食吉豬,咁開到聲就一定有得食,遲啲返宿舍就有怕都食唔到我煮的飯,整吉豬就簡單最怕就係要用好多油,但我就通常半煎炸慳油又做到效果就得,蒸魚炒菜又開飯
 一早煲定蓮藕花生湯喺老公最愛
 吉列豬扒配青瓜,唔怕食完吉豬太熱氣
 自家制的鮮蝦冬菇雲耳豬肉餃阿囡同細妹都話好好食


 炸好等一陣先整細件方便食

好快又中秋,今年要整下全統月餅
 蛋黃蓮蓉月

 又整下包包
 又同朋友,同學飲茶食下西餐
 悠閒的假期,食下整下時間真係過到好快







2018年8月20日星期一

晚餐之焗义燒

雖然唔洗返,但都係好似好忙,成日諗住執屋但都無時間,一早起身煮早餐,午餐盒搞掂各人出門,就買餸準備今晚的晚餐,買咗梅肉豬扒加啲义燒醬簡單醃醃,今晚返嚟入爐就整少樣,因為約咗舊同學午餐,放假通常都喺約人午餐或下午茶,因返工好忙無時間,今日出將軍澳星,馬泰食午餐,呢間同學話好好食咁就要試下,二個人叫咗二個set再加二個小食埋單$130左右都唔貴,啲嘢都幾好下次可以再去

呢個簡單义燒醬醃一醃,啲女話好好味
 豆腐肉碎蒸雙蛋喺最好餸飯

叫咗二個餐,一個飯另一個粉無影到
加十蚊有二只醬油雞翼,同學話太乾
 又喺加十蚊有塊鬆餅,呢個唔錯
 個椰香豬扒都好香淋

2018年8月19日星期日

假日晚餐之在家的西餐

每個星期日都係如常買料煲湯就帶出去同老豆家,同老豆出去飲茶,今日就熱鬧啲,家姐同姐夫去完法國旅行,專登攞手信比我哋順便同老豆飲茶,搞掂完又回家買餸,二個女話會返嚟食問食牛扒煮西餐得唔得,無話唔得只係已煲咗去濕湯無得改,炒飯,整個pizza, 又有雞就轉做香草焗,買啲牛扒,豬扒同魚回家立即醃加多個菜又開餐

雖然簡單的西餐配咗個中湯,大家都食得好開心
牛扒喺女兒指定要食,唔食牛的老公就有比目魚同豬扒
香草雞就全家都愛
焗完雞的雞汁去煮菜,啲女話好味到停唔到口,有冇咁誇
雖然無意粉,但呢個海鮮炒飯都唔差
見好耐無整,今次用簡單配料做個簡單的,唔食pizza的老公都話好食


芝麻醬做底
沙律醬做面
再Pop上多多的芝士