晚餐之露筍什菇焗雞

又星期六啦，成個星期無出去，只係老公星期二返完工買咗幾日嘢，已經差唔多清哂，今日要同老公出外買餸買日用品，順便睇下買唔買到漂白水同米，先去幾間超市睇下，跟住出咗官塘買餸，買買買又買咗好多，幾日唔洗出成個星期無出嚟又唔同哂，廁紙都周圍有藥房超市都好多貨，漂白水都買到好開心，而家只欠米應該下星期出去實買到，而家感覺無之前咁誇張，資訊太發達我覺得未必喺好事，記得沙士時期照返工，都未見過搶呢樣搶果樣，無論點都希望快啲過大家可以快啲過返正常生活，買咗好多嘢今晚又煮豐富啲，開開心心又一餐

呢只魚仔老公好喜歡，價錢平但工夫多，洗淨整乾水再慢慢煎，搞咗成個鍾

買咗只雞，脚同勁加啲排骨煲木瓜湯
半只今晚焗，半只明天燉湯，用到盡唔浪費，先將雞洗淨加酒，豉油糖醃一醃

將雜菇用熱水淥一淥，焗時就唔會太多水

露筍洗淨切細條，先放入焗盤後再放菇

最後放雞入爐230度先20分鐘，食時再焗10分鐘，每個爐溫都唔同,如果唔熟可多啲時間

出爐啦金黃香脆好好味

二個人出去就可以買多啲

買咗半只燒鴨回來用熱水淥一淥再焗10分鐘，皮脆又食得安心

加咗10蚊瀨粉幾條菜，四個人都食唔哂，老公話嘩原來自己整咁抵食，啲囡好鍾意，去飲茶必叫的鴨瀨，下午茶都要25蚊一碗