電飯煲煮腩肉黃豆炆涼瓜

話咁快又到星期六，剛放完今天又放，原來一個月有個星期六唔世返，而唔係我以為返三個星期放一個星期六，今個月我先放，下個月就放第二個星期六，本來今日想瞓晏啲點知個大又話要八半出門，而細女又十點出，咁一早起身整左燒賣同餃子比她們後就上街市買野煲湯去老豆到，今早上街市見啲腩肉好靚就買咗2條要$45覺得幾貴，可能習慣喺超市買，所以好怕喺街市買因無價選左再秤，幾貴都唔好意思唔要，下次都係超市好啲，見到價錢合理才買又唔怕被人駡，再見涼瓜好大就買咗幾只成三十蚊返到屋企就加黃豆同其它配料去炆炆，今晚二姐同姐夫還有細妹都來，叫老公買咗魚同菜，去完老豆到就可直接回家煮，好彩今早炆定涼瓜，姐夫就好開心話涼瓜頂瓜瓜哩樣已經好餸飯，老公又烏頭知道姐夫喜歡，又買咗妹妹喜歡的蝦，我就整咗老公最愛的雞，咁就大家都開心，傾吓飲吓又一餐

材料：腩肉$45，涼瓜3斤，黃豆半碗，薑1件， 蒜頭半個，指天椒2只，豆豉1湯，冰糖1粒

先將腩肉出水，黃豆洗淨用熱水浸

先將涼瓜開半去子灑些鹽搽勻

黃豆用白鑊烘乾

腩肉切一吋左右大

切好先放入飯煲煎煎

涼瓜洗淨切大件

切好用幾片薑白鑊烘乾

有部份水走出不要(這樣做可減苦味)

腩肉煎香加入薑，蒜，椒同豆豉一切炒香

所有配料有香味就加入黃豆

炒勻

加入涼瓜撈勻

加入冰糖同暖水2/3滿就可以

十五分鐘左右，涼瓜會收縮再煮多十五分鐘就可以

食時可轉入煲加熱試味就食得