小油板椒絲腐乳炒通菜

今晚煮左家人各自喜歡的餸菜滿足一吓大家，啲女想食牛扒因老公唔食牛都好少煮, 今晚就買左2塊牛扒淋住炒個菠蘿牛粒拌青瓜, 點知啲女話牛扒最好就原塊食, 咁就簡單煎左配車哩茄, 見到街市花膠魚好靚$16/斤老公最愛，但我地就唔食, 咁就多買一樣鯰魚蒸，炒多個菜同煲多個南瓜粟米肉碎湯又一餐

原來一個簡單椒絲腐乳炒通菜, 好多人都鍾意食, 記得有一次同學上我家晚餐問可唔可以炒個通菜因他老公好鍾意, 街食又太油, 上次上你到食過好好味, 自己就炒唔好, 今晚見通菜好靚又買左斤, 我家各人都喺好喜歡, 而老人家叫這菜抽根菜, 食得多會抽根不知是否真的

材料; 通菜1斤, 腐乳4磚, 指天椒1只, 薑片5-8片, 蒜片1湯匙

先將菜浸洗後摘細, 腐乳整散加浸腐乳的水, 如沒有可加入酒

先用油爆香薑蒜和指天椒, (如怕辣後加)

嗅到有薑蒜香味, 蒜開始金黃

就加入腐乳轉細火炒香

炒勻腐乳快手加入菜同轉回大火

快手炒勻盡量令到菜點到汁料

菜吸收汁就唔會炒完變黑

牛扒就簡單煎好加入鹽同黑椒就食得