鮮冬菇洋蔥炒雞

今日終於輪到我放假啦，之前放月頭現在安排到月尾無所謂啦都有一日唔洗返幾好呀！不過昨日就慘趕哂啲野搞到遲走，但老公今日就要返公司幫手，咁一早起身煮咗早餐同整咗個午餐比老公，搞掂完太勃再去瞓一瞓，一瞓又十點食完早餐就出咗街市買湯料，今日煲咗木瓜雞腳湯，一部份去老豆到搞掂完就過去同老豆先飲茶再買些少餸就回去，個個星期六的工作都如是清潔，煮飯老豆食再回自己家煮另一餐，本來今晚唔洗點煮同老公食，點知細女話搞掂完可以回來食完再回宿舍，好彩今早煲咗湯比老豆順留些自己，阿妹原本話明晚先上來食，突然打來話上來有冇飯食，咁到家時就去超市行個圈買咗只雞，昨晚買咗斤蝦無食今晚就可以煮，快快手手又一餐

材料: 雞一只，洋蔥一個，鮮冬菇半斤，薑片5-6片，蔥些少

醃雞料: 酒1湯匙，薑汁1湯匙，豉油2湯匙，糖1湯匙，生粉2湯匙

先將雞洗淨去頭尾斬細件，先加入薑汁同酒撈勻

撈勻才加入豉油同糖再撈勻，最後才加入生粉撈

鮮冬菇洗淨切片，洋蔥去衣洗淨切條

先用些少油爆香薑片

聞到有香味就加入雞煎香2邊

一邊金黃轉另一邊

煎好後可先回碟或放在一邊加入洋蔥同鮮冬菇爆香

炒勻試味

加些少水蓋上蓋煮5分鐘左右

差唔多5分鐘煮到雞熟同收乾水加蔥

就可上碟

二人晚餐之魚肉銀川菜

今日喺學啲小朋友著哂唔同做型衫，連外籍老師都一樣，有啲superman，又有superwomen,有啲我都唔識喺咩做型， 小朋友就有更多做型，可惜我太忙無時間，所以無同老師影相，今日茶點食車瓜比小朋友感受下萬聖節，而我午餐又喺南瓜不過炆排骨，西人老師就好高興，但中文老師就好怕，今日好攰七點幾回去做到收工都未完成，啲人可能姨媽到心情差，比早二日更加只係有人幫表面工作，其它就當睇唔到，唔緊要收遲啲做完先走，收六點的她們五點半未夠已經攞袋等收工，而我還在清潔，返到家又七點只係簡單買咗魚肉滾菜，之前食淨啲魚同肉返熱就算數，食完坐係sofa又瞓著咩野都無做，通常全日無咩點休息就會好攰，老公見到就好心痛叫我唔好做，我真係好唔明點解大家唔可以好似之前有幾個星期咁開開心心做，點解突然又變面又玩野，我就唔怕被你哋玩得起

材料: 銀川菜1斤，魚肉半斤，薑片4-6片

先將菜洗淨，魚肉我怕醒通常都會再加些少糊椒粉撈勻

 先將水同薑煲滾

 水滾後加入菜

 菜好快就軟身

 等滾起加入魚肉

 滾起加鹽糖調味

 最後加麻油就更好味

晚餐之雞翼蒸茄子

今日如常好早就返到公司，知道啲人玩野怕自己趕唔切，點知最後都趕唔切12點啲老師食飯，因為蒸雞唔夠時間，估唔到20分鐘都有啲唔熟，第一次整咁大量，下次要再淋淋應該點先得，時間趕唔切已經唔開心，還要比人借題發揮，無野都搵野泥發難，只知她好大聲發難但唔知我又做錯咩，後來才知因為同月入同我好friend個果幫我收哂啲餐具入來，因有個英文老師要整野我幫她無時間去收，而其它人本來喺度等睇戲，點知有人幫我就唔高興，搵野發難我喺一個有教養的人點會哩，一笑置之當無事發生，而有個老師見到話我eq高，她有時同同事吵，會叫自己唔好唔開心，但好難話已同她的同事不說話，我就叫她睇開啲，有人的地方就有是非無可改變
今晚本來唔洗買餸，但大女話可以回來食收七點，咁就去街市買條魚，點知塞車買完回家都七點，昨晚醃咗雞翼淋住炆茄子，最後只簡單蒸就算

材料: 雞翼1磅，茄子2只，蒜茸 1湯，薑絲1湯匙，蔥些少
雞翼醃料: 酒1湯匙，豉油1湯匙 ，糊椒粉1茶匙，糖1茶匙，生粉1湯匙

先將雞翼一開二加入醃料，茄子洗淨切幼條先放入碟

 將蒜茸放在茄子面

 再將雞翼平均放喺面

 灑上薑絲

 水滾蒸15分鐘

 蒸好後再焗5分鐘確保全熟

晚餐之黑椒豬扒

今日學校喺食什糧，意思喺隨意煮今日就食炒飯配什菜湯，而大人就加多個菜同金沙骨，現在已知道點樣去煮，所以都控制到時間，而今日還有十分鐘去完洗手間就去幫手睇仔食飯，啲仔好鐘意什糧，炒粉麵飯都好喜歡平日煮十杯米，今日已加多3杯都唔夠好利害，有啲還無得加又講下次煮多啲，個個話好好食，而老師今日我就煮咗杞子元肉飯，都比平時多2杯米，今日煮咗25杯米都食清，都唔知真係煮得好還是煮得少全部清哂，喺前所未有連湯都無浄，好開心辛苦都直得
今晚放工先收到細女電話話返來食明早先回校，咁就去街市睇下有咩買，現在最喜歡就係飲湯，所以買咗些少骨同蕃茄薯仔，哩個喺最快又最好味，再買條黃立槍同菜就回家，因昨晚已醃咗豬扒加個洋蔥同黑椒就好好味

材料: 豬扒3件，洋蔥1件
醃料: 酒1湯匙，豉油1湯匙，糖1茶匙，黑椒半茶匙，水2湯匙，生粉1湯匙
調味: 老抽1湯匙，黑椒1茶匙，水半杯

豬扒洗淨加入醃料，最小醃1個鐘

 洋蔥洗淨切條

豬扒放入鑊先大火後轉中細火煎熟 

 煎好一邊轉另一邊

 加蕃茄同洋蔥炒勻

 加入調味炒勻

蓋上蓋煮5分鍾試味

 就可上碟

晚餐之咸肉碎紅腸煮茄子

今日喺學校煮咗炒旺菜，檸檬雞扒同魚香茄子，好忙但都好彩煮只有2分鐘12:00趕得切出哂餐，連去洗手間都無時間，就去幫手睇小朋友食飯，食完就洗碗之後還就到點三第三圍，我就食點九最後清潔，再準備明日的餸料再清楚廚房，但未收工還要清潔校務處同去課室收水回去要廚房加回明天用，咁一天的工作叫做完，今晚放工就搭車淋住上秀茂坪街市買菜，點知等咗半個鐘才有車，真的好浪費時間但都無法，去到街市買咗條紅鮪$20，白菜1斤$6又見到茄子$5有3條點知話收工送多2條比我，返到家忘了去超市買肉，好彩還有些少咸肉同紅腸加豆板醬一樣咁好味，今晚餐餸唔洗$30又搞掂

 材料：茄子3條，咸肉紅腸切碎一碗，蒜茸1湯匙，酒1湯匙，豆板醬1湯匙，糖1～2湯匙，老抽1湯匙

 先將茄子切細條後用鹽浸，

 先爆香咸肉同紅腸

 加入蒜茸

 加入豆板醬

 炒香後加入茄子

 加入老抽同水

 蓋上蓋煮5分鐘左右

 茄子軟淋試味就搞掂