晚餐之豉椒素蝦素雞味火腿炒河

今日無咩嘢要出去，早起身煮好早餐同午餐盒清潔完見早，細女要同我出去食嘢後回校，專登喺官塘搵素菜館又開七點咁早，原來哩間好多年我都記得同奶奶食過，入到去見人哋食啲嘢就好似去茶樓飲茶咁有雞扎，我地去到未夠11點就已準備午餐，只喺叫咗啲炸嘢同腸粉，跟住家姐又打來問我喺邊就過咗來，細女食完走先，等家姐到就叫咗個午餐海南雞飯同齋鹵味，個雞家姐話好似，我最初都好想知喺咩，同我買過的雞味火腿一樣只喺炸過，味道都好似，唔講都唔似食素，見到哩間有蝦同鮮魷價錢都平$17包就每樣買包回去，今晚就用咗半包蝦加火腿加豉椒炒河粉，加多個菜又開餐

 素海南雞飯

 素什鹵味

 素牛磅湯

材料：河粉1斤，素蝦半碗，素雞味火腿1件，芽菜半斤，洋蔥半個，青椒1只，薑蒜各些少，豉汁1湯匙，指天椒1只

洋蔥去皮洗淨切細件，青椒去子洗淨切細件，蝦仁洗淨加些少豉油糖醃，火腿切細件，芽菜洗淨，指天椒切碎

先將火腿煎香2邊

2邊煎好後

加入薑，蒜，洋蔥，青椒同豉椒

炒勻有香味

加入河粉

炒勻可加些少水

最後加芽菜，豉油同老抽

炒勻試味