晚餐之紅咖哩炒火煱腩片

今早又整做綠茶紅梅包做早餐，大女出咗去無咩特別嘢就打下機等老公起身，食完早餐就出咗沙田行，又話星期三先大雨，點知同老公出門無幾耐就大雨同行雷，有傘都無用中途搵地方等細雨先再行，入到沙田先去車公廟行下，嘩連廟祝都講泰文，可能平日比較靜跟住就行去飲茶，估唔到都無一年，間茶樓都無咗已經飲左十幾年，雖然每年飲一至二次，同老公行左陣都搵唔到另一間，就搭車出官塘去新港明珠飲下午茶，太耐無來啲嘢都貴咗，叫左四樣連茶加一差唔多九十，飲完買餸回家，細女今日出camp, 專登買條烏頭蒸，炒菜同加多個用紅咖哩醬炒的腩片，好惹味又唔辣非常方便又開餐

材料：腩片一包，芽菜半斤，紅黃椒各半個，洋蔥一個，薑片3-4片，紅咖哩醬1湯匙

先將洋蔥爆香，加半茶匙糖一齊炒，洋蔥會有金黃而且味更香

 炒到洋蔥有香味就加紅黃椒同咖哩醬一齊炒

 炒勻加入腩片

 再加入芽菜炒

 炒勻試味最後可加入蔥就可上碟