晚餐之苧頭蝦仁煲仔炒飯

今日早餐煮麵比女食完返工，老公雖然唔洗返但食完去左奶奶到同她覆疹，我搞掂啲嘢就出左去，約咗個成十年無見的朋友飲茶，啲朋友唔知點解好似知我無嘢做，無啦啦搵我，咁自己又真喺好得閒就出去飲下茶，飲完行下就回家買餸，苧頭唔一定整甜品用來炒飯都好好食，做法好多種今晚就去買左蝦，豬肉菜魚就回去，平時煮苧頭飯就買苧頭回去起皮切粒爆香同飯一齊煲，炒熟其它料就將煲熟苧頭飯加入去一齊炒，今次簡單好多因早二日蒸咗苧頭老公就咁食，食淨啲苧頭加自己喜歡的肉或其它料就用來炒，簡單好多靚苧頭點煮都好味，蒸魚再滾多個菜湯又開餐

材料：白飯4碗，蝦半斤，豬肉$10，苧頭半斤，雞蛋1只，菜蒲1湯匙，蒜茸1湯匙，蔥1湯匙

將熟苧頭切粒，豬肉切粒加豉油，糖，生粉撈勻，蝦去殼去腸洗淨用些少鹽撈勻，菜蒲洗淨切細粒，蒜同蔥洗淨切碎，蛋發勻

先熱煲加入半只蛋

加入蒜茸炒香

加入肉粒炒熟

豬肉熟透加入苧頭炒香

嗅到苧頭有香味就加入蝦仁

蝦炒到轉紅就試味，味唔夠可加豉油同糖

試好味才加飯炒，就會炒得均勻

最後加蔥炒勻就搞掂