二人晚餐之薑茸餐肉蝦乾蛋炒飯

今日一早搞掂哂各人出門，自己多瞓一陣後就簡單食咗早餐，無所事事又未開就喺屋企炒米準備下一個媽媽，因為我通常會生前家訪順便送炒米茶比她們入院生完立即有得飲，今晚又喺得我同老公，所以都無出去買餸，雪櫃有咩就整咩，二個人的晚餐都可以好簡單而且都好好味，今晚就用餐肉蝦仁薑蛋去炒飯再配蜆肉蝦乾銀川菜滾個湯又一餐

喜歡炒飯加啲蔥味道感覺就唔同哂

炒好後放涼就可包裝

自已簡單煮個麵再配杯花茶

包好一包包方便隨時一沖就飲得

豐富晚餐提前慶中秋

過2日又到中秋，在這預祝大家有個開心愉快的中秋節，今年疫情下感到時間過得好快，忙碌再加上憂心就到9月尾，休息咗差唔多10日都唔知忙咩，今日難得自己在家諗住清理一下，突然大女WhatsApp話有個朋友想上嚟晚餐可唔可以，自從2月到而家都唔咁招呼親朋戚友到家一聚，大家都好擔心，一班好同學每個月的聚會都因為疫情都未見過，而家疫情減退又休息先有約人出去飲茶同食飯都係2-3人，朋友仔好想嚟又就到中秋當然無問題，人少少都應該唔怕，有客人又唔可以是旦就出去睇下有咩嘢，樣樣買啲又回家準備，朋友仔好客氣買咗壽司同湯丸，飯後煮咗個紅豆雪燕桃膠芝麻湯丸同食月餅，開開心心又一餐

晚餐之香草焗雞

時間過得好快，唔經唔覺休息咗十日，9月尾的媽媽之前好心急怕會早，因為喺8月時又無啦啦心有事入咗幾日院，但又查唔到，我就叫她盡量放鬆，我做到完唔加期直接等她，本來剛完工的媽媽想我幫多1-2星期或做到媽咪生，但怕她會早又想休息幾日自2月中開始每個媽咪都做到下個生都無咩休息，所以搞掂晒就完工，呢個媽咪有工人姐姐幫手，已經教咗她同準備咗個半月的湯包同炒米茶，等個媽咪可以繼續補我就可以安心完工，點知9月尾媽咪無動靜，今日產檢完一齊正常比咗催生期，如果到11號前都無反應先入院催生，政府通常正常多數叫媽咪返去等，會安排預產期1-2星期後先安排催生，如果私家唔開刀通常預產期左右就安排催生，所以又繼續休息，好彩下一個媽咪12月中預產期，咁就唔怕做唔完就要完工，我哋呢行就係咁好難預，雖然話留前7後7但好似呢個媽咪遲咁耐，喺有權唔做又唔需要退訂，而我習慣唔會好密所以就可以輕鬆等，今日在家又係無唔知忙咩，之前買咗2只雞，一只清蒸另一只今晚香草蒸，炒個菜，老公買咗好多蒜返炒昨晚的鯇魚，是是但但又一餐

呢個又加多2只蕃茄炒一炒好餸飯

加幾只大冬菇同菜心炒一炒，簡單的菜又感覺唔同哂

老公喜歡多蒜煮的鯇魚

 

晚餐之舞茸菇炒大白菜

又一個星期啦時間真係快，今早整咗豐富的早，午餐同啲囡食完就同老公出去買啲餸回家，下午細女話想食蛋撻咁又開工準備麵包做早餐又順便整幾個滿足下她，之前買咗啲湯包送咗舞茸菇，今次就試下用嚟炒，香味濃配大白菜就最啱，用昨晚淨的雞加幾只番茄炒一炒好味又唔浪費，買咗啲鯇魚老公最愛蒜去半煎煮，滿足老公啲囡又唔啱食加煎多塊牛扒比啲囡，簡簡單單又一餐

老公話蒜太少，明天就再買多啲

假日早午餐之自家制魚肉燒賣

話咁快又一個星期啦，之前2個星期日都唔得閒，剛完工的星期日約咗明年4月的媽媽傾，剛過的星期日又約咗大哥去他家維修一些事，女兒投訴每個星期放假留家陪我都有事，今日就咩嘢人都唔約在家煲粥，炒麵整燒賣同她們一齊享受休息一下，之前龍利柳平買咗喺家，早幾日包雲吞淨啲皮今早就準備料去做咗些燒賣，煎啲餃子開開心心邊傾邊食又一餐

昨晚食淨的雞用咗腳同骨部份去煲粥

豉油皇炒麵個個都喜歡

老公最愛的煎餃

女兒喜歡的魚肉燒賣

材料：魚柳1磅， 雲吞皮30塊左右

木薯粉1湯匙，粟粉1湯匙，鹽1/4茶匙

調味：魚露1茶匙，糖1茶匙，酒2茶匙，糊椒粉1茶匙，麻油2茶匙

將魚柳洗淨吸乾水份切細後搞蓉

將魚肉搞碎先加入木薯粉，同鹽搞到有膠質

最後將調味料全部加入搞勻

將餃子皮先收圓就容易包出型裝

餃子皮放入大約一湯匙餡料做到燒賣型

水滾蒸8分鐘左右就食得