香草火腿芝士包

昨晚整咗火腿芝士包今日做早餐，今日一早起身搞掂各人出門，自己食些少嘢就順便焗埋幾個包入西貢，還未開工應承咗剛完工的媽媽陪囡囡打2個月針，幾日唔見囡囡又醒目咗，但媽媽就唔夠精神，因為過份擔心囡囡無覺好瞓，我只有同她講一定要放鬆心情唔好緊張，知道呢個媽媽樣樣事都好上心，所以都專登陪她去同BB打針，她自己好怕姑娘都喺到笑話媽咪比囡囡緊張，呢個囡都好叻只係喊咗一陣好快就無事，其實最主要喺打完針立即按實針位，BB好快就無事今次左右脾各一針，打完第一針按實針位轉另一只脾時，將BB打咗針的位黏實自己身體，再等打第二針，二針完成後立即2手按回針位就可以，另外唔好立即隨去膠紙綿花，回家沖涼時等膠布浸軟輕輕取出就可以，點解唔好立即因為BB皮膚好嫩，膠布容易整痛同有機會整傷，濕咗水會減低黏力容易處理同無唔會整痛BB，帶咗包入去，媽咪話好食可以開檔，當然唔得自己食點都可以，因為無牛油少糖完全唔同出面，大家有興趣都可以做，好簡單又好好味

剛焗完熱辣辣食返個，芝士溶咗更加好味

8個材料
麵團料：高粉300g, 酵母3g, 水200g, 奶粉10g, 鹽5g，糖28g, 油20g,
餡料：火腿5片，芝士8片，
裝飾：香草隨意
掃包面：蛋黃一只
先將麵料入麵包機選發麵團功能就可以
火腿洗淨切細，芝士切細

麵包機發好的麵團分8份，先將一麵團碌平成鵝蛋型，一邊放入火腿同芝士

 另一邊分四條,先將第1條同3放包面

 再將3&4分別搭上交乂放入

 做好型後放一邊等包發二倍大就可

大約半個鐘到一個鐘左右，要睇當天的天氣，先掃蛋汁再灑入香草

 入爐180度15分鐘左右，金黃色就食得
每個爐溫都唔同，如果未夠金黃可加多2分鐘

簡易雜錦雞蛋仔

又係閒在家，家姐又帶個孫嚟話女食雞蛋仔，咁搞掂完家人出門就清潔一下，就開始整定雞蛋仔，順便整埋蛋撻同午餐炒米
粉，個BB一到見到嘩一聲好開心，已忘記入門先洗手，家姐叫他洗完先可以食，他急不及待洗完就攞咗一底坐低慢慢食，跟住蛋撻出爐就想立即食，好彩及時叫住因太熱叫他等，見到他開心的樣大家都好開心，今次呢個食譜我改用應粟粉，想試下會否脆啲，但放涼即食就可以還咗一段時間就一樣唔脆，味道就好好又可以隨意喜歡咩嘢料都加得，今次加咗家姐最愛椰絲，BB最愛提子

材料：底粉140g, 泡打粉7.5g,
          吉士粉1湯匙，應粟粉28g,
          蛋2只，糖70g, 奶28g,
          水140g, 油28g,
          雲呢拿油幾滴 (增加香味)

 先將粉過篩後加雞蛋搞勻

搞勻後加入糖，奶同水拌勻最後加雲尼拉油

 將所有材料拌勻應該就溜質維，好似下圖一樣

 將模搽些少油

 做咗幾次而家就醒目，自己食就只倒中間淨一圏，因為麵糊會溜出就搞到周圍喺，清潔好麻煩，多咗範圍就唔怕

喜歡咩就加咩，呢個加椰子

呢個加提子，最緊要啱自己口味

開咗料好方便想食幾多就幾多

晚餐之黑椒安格斯牛仔骨

話咁快又星期日，今早又一早起身煲粥炒烏冬，蒸燒賣同煎餃子，因為二個女又話同我哋食完先出去做嘢，搞掂她們出去就上街市買咗湯料回家煲湯後就出老豆度同老豆飲茶食午餐，每個星期日的節目，飲完就買餸回家，見到好靚的安格斯牛仔骨$68一磅好似好抵，攞咗4條估唔到要差唔多90蚊真係有啲貴，老公就話啲囡鐘意無所謂，今晚就用嚟整女兒最愛的黑椒味，放假就可以煮多啲，開開心心又一餐

材料：牛仔骨4塊，洋蔥1個，黑胡椒碎1湯匙，蠔油2湯匙，水2湯匙，糖1茶匙，老抽1湯匙，蔥些少

 牛仔骨洗淨切細件，洋蔥洗淨切條
先將牛仔骨入鑊

 煎到2邊金黃後用碟先裝起

原鑊加入洋蔥同糖炒到洋蔥有香味同金黃色

 加入牛仔骨

 黑胡椒碎，蠔油同水快炒到水收乾試味
（回鑊的牛仔骨要快炒收乾就唔會韌）

香煎胡椒韭菜包

昨日阿囡話想食韭菜餃，好簡單，5蚊韭菜加$20豬肉就包咗30幾只還有餡淨，開咗麵粉簡單學人整韭菜包，今次就開咗麵粉去包再去煎，簡單又好味，將淨的餡料加多些少胡椒粉同麻油，味道又原全唔同哂個個話好味，簡單又易做

包皮料：中粉200g, 鹽1/4茶匙，糖1湯匙
               油1湯匙，水半杯，酵母5g
餡料：韭菜$2, 豬肉碎$10
調味：豉油1湯匙，糖半茶匙，胡椒粉1湯匙，生粉1湯匙

 先將粉料撈勻做一麵團放一邊發酵

 麵團發到二倍大就可包餡

韭菜洗淨切細加入半茶匙鹽撈勻放幾分鐘後扎乾水加入碎肉同調味撈勻

 喜歡芝麻可先加入鑊底

 將麵團分8分後，每份包入餡料

 包好後放入鑊

 先煎香二邊

見金黃色

 加入半杯水

 蓋上蓋，水收乾就食得