晚餐之甜豆炒雞肉鹿茸菇

星期一幫個媽咪買的餸還有甜豆，就用咗雞柳，鹿茸菇同支竹去炒，而家都唔咁周圍去，只係幾日出去買一次嘢，因為好快又開新工，而家周圍都好嚴重唔想有咩事，就無法開工，今日只係大女要出去工作，雖然唔洗返但都喺8點幾就起身，搞掂大女出門同老公簡單食咗早餐，各自做自己嘢，時間都好快上綱覆下短訊又煮午餐，午餐就簡單煮麵食，搞掂完清潔下好快又準備晚餐，細想食壽司叫家姐放工順便買，咁今晚就無煲飯，有湯，就煮菜同焗义燒，因為無魚已經安排炒多個甜豆，又有壽司，簡單的一餐又豐富啦，開開心心又一餐

今次用咗展肉起咗骨，焗出嚟都好軟淋，無梅肉肥，下次可再用

呢個甜豆可咗鹿茸菇有益又好味，鹿茸菇唔一定煲湯浸軟炒都好好味

材料：雞扒一塊，支竹2兩，甜豆4兩，蟲草花1湯匙，鹿茸菇15-20條（多少可隨意），干蔥3-4粒，蒜頭3-4粒

醃雞肉料：酒1湯匙，豉油2湯匙，糖1茶匙，生粉1湯匙

鹿茸菇同蟲草花洗淨用水浸軟，水可留用

雞扒解凍用鹽水浸5分鐘左右去雪味，塑乾水份去皮切條，加入醃料撈勻

生粉最好最後先撈味道先容易吸入

甜豆去頭同根洗淨先用白鑊烘乾，可去臭青味

用些少油爆香干蔥同蒜

有香味就加入雞肉中火煎香同雞有油會出

跟住加入浸軟的蟲草同鹿茸菇

炒勻有香味加入支竹

加入些少浸菇水，味道更好

煮到雞熟

最後加入甜豆

炒勻試味就可上碟