晚餐之有機生菜打邊爐

話咁快又星期六，今早都係早起整早餐同午餐盒，老公學校有活動7點幾返到，咁我當然又要5點幾起身搞掂完，6點半老公出門，啲女無咁早就去瞓多陣先起身叫她們，全屋人都出去後本來可以再瞓多陣先去join家姐食午餐，有個媽媽昨日塞奶塞到好擔心，昨晚喺另一個媽媽度坐得太夜，最後無過去，果媽媽話睇下點再搵我，昨晚話都喺搞唔掂咁我就安排食完午餐先過去睇下，因為今晚唔知幾點走，最後就去街市買定嘢，細女想打邊爐，買咗羊腩先煮好個清湯腩後就出門，同家姐細妹食完嘢跟住就去果個媽媽到，去到阿囡瞓咗覺，個媽媽話阿囡扮乖，知道我嚟就瞓覺，見阿囡瞓咗就先睇咗個媽媽先，幫她推鬆後就叫媽媽去泵奶，點知阿囡就醒咗，呢個就係之前有提個精力充沛唔洗點瞓，咁我見有時間就同BB出埋涼再餵埋奶先走，原來搞搞下又6點幾拿拿淋走，如果唔塞車上到車45分鐘左右到，點知今晚又塞而家啲交通真係無得預，返到去差唔多8點好彩買咗餸打邊爐，咁洗好同切完煲滾第一轉食咗就繼續加各自喜歡的，簡簡單單又一餐

羊腩做湯底加啲各人喜歡的

 肥牛喺細女同我最愛

 脆鯇喺大女話要的

 細女唔食脆鯇，當然有她喜歡的魚柳

 老公喺學校種的有機生菜

 午餐同家姐阿妹食的韓燒

 最後就一定唔少得的雪糕同甜品

晚餐之海南雞飯

今日又喺一早安排家中各人出門後，自己食咗簡單早餐，買咗啲餸煲好湯就出門，去咗3月完工的媽媽度，應承咗家姐仔下次再去會再煮粉比她同整咗個蛋糕，點知她已經轉口味話要食士多啤梨蛋糕，又應承下次再嚟就整士多啤梨蛋糕，見到阿仔好開心已經識爬，呢個仔好乖唔喺太扭，自己玩喜歡聽人講嘢，玩到攰工人姐姐抱唔洗10分鐘就瞓著，工人姐姐好快就放落床真係好乖，今次買咗條鰂魚同番茄去煲湯無加肉加咗眉豆代替肉啲工人姐姐可以一齊飲，買咗雞帶咗半只雞過去蒸，半只留今晚，細女話想食海南雞飯，再買西蘭花喺家姐仔最喜歡，呢個媽咪好好去完新加坡都專登買咗手信，又叫我攞咗好多咖啡粉回家，阿囡見到好開心以為我終於咗買咗部機，哈哈哈點知只得粒粒咖啡，其實都好方便將中間銀色整穿就可以倒入自己的蒸餾咖啡機加水都一樣，估唔到開心傾下食下咁快又傍晚6點要走啦，唔塞車回家都一個鐘，點知好塞返到去差唔多8點，好彩早上準備好返去煲個雞飯炒菜煮埋個魚就開餐，簡簡單單又一餐

 雞放涼後斬件配多個自制薑茸

呢個雞飯只係加咗蒜茸，薑茸再雞放面蒸，細女開心到食多碗

可以試好多款唔同味的咖啡，原來最開心喺大女

個媽咪隨咗買香料包，肉骨茶比我，還買咗2盒pocky比我2個女

晚餐之冬菇雲耳炒西蘭花

雖然放假，但日日都好似好忙，今日又喺搞掂哂各人出門就出去買定餸同去買燉湯料，今日又去一個剛生完孖仔的媽媽家，媽咪已出院，但孖仔就因早咗2個月未夠磅同啲器官未完全發育好要入箱住，呢個媽咪喺我17年湊過大仔，今次有咗打孖時搵我，我已經接咗無時間跟，雖然幫唔到手，但一直都有聯絡，知道她呢胎喺孖好開心，但她就比較辛苦好多問題，好彩2個BB順利出世，一個差唔多3磅，另一個就有3磅幾，媽咪生完都有通知我同比咗大，細B啲相我，2個都好強生命力，細B還周不時眼仔碌碌好得意，爸媽話好細好似貓仔，我都知喺點因為我都湊過7星仔好得意而家都2歲啦，爸媽話今日二個仔都會用樽試，而且她們都試抱但都好驚因為太細啦，今日見還未開工就整咗幾個燉湯包過去教工人點燉，等媽咪可以潤肺健脾先，因為她的陪月未到，順便整咗雪耳冬菇豬肉腸比她們一家做下午茶，見她身體好虛又未有人照顧，午餐都喺好簡單肉片飯又無湯又無菜，雖然今次只係帶咗四日燉烏雞湯，希望都有幫助，大仔都唔係幾記得我，但同他玩咗一陣就熟哂成日跟住我好搞笑，搞掂完又3點幾就走，大仔瞓咗怕他唔喺比我走，諗住喺大家樂或其它快餐店食下午茶，點知見到有間喺食燒物下午茶唔太貴40幾蚊左右，咁就走咗入去一試，食完就買餸回家簡簡單單又一餐

見好耐無食冬菇同雲耳就浸好同西蘭花同炒

 之前醃定南乳雞翼，焗一焗好快就食得

我叫咗下午茶豬軟骨麵配咖啡，38加一埋單$43左右，而家好

無諗過喺用公仔麵，都有啲失望但豬軟骨都好好味

蓮子百合燉烏雞可以潤肺健脾最合適剛出院生產院7日左右後的媽媽飲

晚餐之8月囡囡百日宴在青葉海鮮酒家

時間過得好快，8月的BB咁快一百日啦，今晚好開心有份參加她們的百日宴，一早搞掂各人出門後就過咗去呢個媽咪度，呢個媽咪好乖，但BB就精力過高令到爸媽成日都無覺好瞓，見今日還未開工就專登早啲去幫手，等她有時間休息一下，順便整咗幾個燉湯包同預備2個早餐，等個媽咪食多個星期就開始返工啦，喺度祝BB快高長大，健康活潑，她們一家每日都開心幸福快樂，呢個喺我湊咗二十幾個最有精力的BB,就算而家3個月更加唔洗點瞓，今日10點左右到後BB飲完奶又唔瞓，跟住去咗飲茶食午餐，之後有啲打麻雀，有啲唱K, 我哋就先同BB回家諗住BB會瞓一陣，沖埋涼先再落嚟，點知BB一直都唔瞓，差唔多7點左右我哋就落酒樓，BB好叻初頭好精神同我哋影相，跟住喺車仔度瞓覺我哋就可以安心食嘢，但差唔多尾段又起身可能車休太細瞓得唔好，醒咗就想人抱開始扭，其實喺想瞓但又瞓唔到，最後媽咪就帶咗她周圍行，她的爺爺麻麻送啲朋友走同埋單跟住我都回家啦，過咗愉快的天天

 龍蝦伊麵好好味

 沙律蝦球拌西蘭花，呢個蝦球還有些少脆

 炸子雞

 伊麵都唔差

 炒飯都幾好

而家啲媽咪好舍得，呢個喺最細都要成千幾蚊的蛋糕，真係好靚但通常甜到食唔到

試過好多個，呢個蛋糕位都食到

日頭唔瞓自己會玩但通常45分鐘到一個鐘左右就會扭人抱會做出可憐的樣有時望著你又會笑，見到她咩嘢唔開心都唔記得

BB好多時怕奶咀甩，好叻自己捺住好搞笑

 BB幾精神還眼仔碌碌

晚餐之霸黃花雪梨螺頭湯（入秋最啱的湯水）

今日都係一早起身，整早餐同午餐盒等各人出門後就去瞓多陣，而家5點幾起先叫老公，到7：30就細女，8點就大女好彩唔同時間就唔洗爭，今日家姐生日原本出銅鑼灣同她食午餐慶祝，但她好多嘢做唔想浪費喺家附近食，食完回家做嘢，咁喺她家附近食越南嘢，諗住叫家姐喜歡的，點知只有飯餐，如果檬粉無嘢飲都要50幾60家姐話是旦叫，想叫小食都無，最後叫咗二個餐真係是旦食，再約星期六補食餐好啲，食完行一陣就買餸回家，今晚又齊人大囡同老公都話喉嚨好乾，專登去買霸黃花同雪梨加豬展骨去煲湯，呢個湯最啱呢個時候飲，霸王花有清熱養陽補虛潤肺止咳同喉嚨乾最好，有興趣可睇下面簡單講下點煲，最開心喺個個早返，開開心心又一餐

材料：霸黃花$10, 螺頭3-4粒，豬展骨半斤，雪梨2個，蜜棗3粒，南北杏1湯匙，淮山2片

先將霸黃花浸軟洗乾淨，

乾的都會有沙同汚物

雪梨洗淨切細去芯（雪梨一定要去芯煲出嚟啲湯就唔會酸）

將全部材料入煲加入3公升水左右先大火半個鐘後轉中細火煲2個鐘

煲好的湯先試味後有需要可加些少鹽就飲得