參加女兒小型畫展

開工後連做8日，終於休息啦，因為媽咪生完喺星期六先出院，剛出院怕搞唔掂所以星期日都開工就連做8日, 雖然今日星期日但都係一早起身，因為細女同啲同學有個小型畢業畫展就去行下，今日最後一日，一家人好耐未試過一齊出動，諗住飲完茶先，最後就喺間粉麵店一人食一碗粉麵就算，呢個老板好唔老實，話是旦收小啲，點知原來收多9蚊，應該喺121，他就收130,我邊行邊諗收少幾多話是旦，原來喺預我哋無計，老公就話算啦應該生意難做，啲嘢又唔好食應該無下次，跟住去參觀，雖然細細但展品都唔少，行完就同老公周圍行下飲埋下午茶先回家，今晚二個囡都唔返嚟食，我哋就唔洗煮，輕輕鬆鬆又一日

呢幾只龜做得好好，原來喺用報紙做成，真係估唔到

同老公飲下午茶當晚餐食飽飽回家就唔洗煮，簡單食啲生果又搞掂

芝麻花生糖

明天開工啦，今日在搞整下嘢，用慢磨機整豆漿，又焗咗花生最後就學人整花生糖，之前整個太硬，今次加咗麥牙糖，煙韌軟淋好好味，所以又分享下，材料簡單又容易整點整

材料：花生1斤，芝麻半碗（如果喜歡可多加）水100ml, 糖100g, 麥牙糖150g, 鹽1/4茶匙，油1湯匙

先將花生洗淨入爐焗半個鐘，放涼脆身就可以, 芝麻炒香

 將水，麥牙糖，糖同鹽慢火煮溶

 邊煮邊搞

 開始起泡

 煮到大泡水份開始蒸發

 見到糖醬開始傑

 見到掛喺搞捧

 就可以加入花生同芝麻撈勻

 煮到花生芝麻黏上糖醬

 撈到全部均勻就可以

 放上牛油紙上

 定型後放涼

 暖些就可以切

晚餐之冬菇蝦米粉絲炒節瓜

早二日6月媽咪生咁啦，今日專登攞咗部份嘢去她家，應該過二日開工，幫她買坐月時用的材料，因為太重怕開工時又要買餸菜，所以約咗她老公先將部份放低，等開工就有得用，搞掂完就去咗舊年完工的媽咪度探下她們，呢個媽咪的老爺奶奶同我做咗好朋友，所以今日都係上她奶奶家睇囡囡，8月就一歲，唔見咁耐唔同哂，百日宴後又因疫情都無見過，呢個就係我之前講過超級好精力的BB, 出世時都唔洗點瞓，而家更加利害而且爺爺話喺塊膏布甩唔到，二老湊得個孫好好，見她們雖然辛苦但好開心，去到已經12點機，她們好客氣請我食午餐，大家傾下食下不知不覺已經四點幾，BB其實好眼瞓但心好嘢一直都唔瞓，我都唔好意思打搞咗咁耐就走，奶奶好客氣專登帶我落去搭車同睇周圍環境，因為過幾日就喺她住的附近開工，話有個小街市如果我突然忘記買咩都可補足下，之後就搭車回家順便買些少餸，家有幾個節瓜開始唔太靚就加咗蝦乾，冬菇蟲草花去煮粉絲，呢個餸都好多媽咪喜歡食，通常第二個星期都會煮，我啲囡最喜歡喺粉絲，早幾日煮咗個辣肉醬用嚟加麵食，今次加咗2湯匙非常惹味，蒸魚炒菜簡單又一餐

晚餐之豆腐魚湯

休息咗差唔多一星期，但都唔知忙咩，今日去咗攞陶寶嘢，見得閒又搵咗部慢磨機回來試，之前有個媽咪問，雖然都知喺咩但自己親身試先得，喺綱上好多人啲料都唔確實，明明唔得又話非常好，之前買咗部而家好流行的破壁機，話整豆漿唔洗浸半個鐘就有得飲無渣，喺綱上睇咗好耐搵到部評價都幾好，點知喺好快，但好嘈好渣試隔三次都唔太清，啲囡唔飲話有怪味，再試浸豆去煮都一樣，就寫出事實，賣家要求取消評價可退款，點知我刪除後就要求退貨後先可退款搞咗就嚟一個月都喺無得傾，香港退回大陸貴過退款，最後放棄，所以大家買嘢要小心，如果試都唔好太貴咁就唔太肉痛，下午收再個媽咪好消息順利生咗過幾日就開工啦，好開心又可以見到啲BB, 攞完嘢回家又唔想再出去買餸就簡單煮，之前食淨啲魚唔好浪費先用嚟煮湯隔咗渣加豆腐非常好味，雪櫃有雞翼就解凍醃好焗一焗，炒菜蒸魚又開飯

用食淨啲魚頭，尾骨去煲出嚟都奶白色加蛋同豆腐好好味

阿囡剛好買回來的油炸鬼配魚湯又好好味

呢款所謂整豆漿半個鐘可以飲無渣的破壁機，大家最好唔好買，好嘈大聲到會嚇親

 做完底部已見到好糊

 部機有所謂清洗功能喺唔得，要浸好耐先洗得乾淨

 隔渣

 隔完見到啲渣，完全唔係講咁無渣好滑