晚餐之白糊椒咸菜燉豬肚湯

又開始放假啦，今日搞掂完各人出門就走去街市行下，近年尾街市好迫人，無咩心機行買咗個豬肚就回家，本來諗住個豬肚過年先食，見咁新鮮啲囡又話返嚟食，咁就食咗先，個個都喜歡糊椒豬肚，今次好簡單攞嚟燉，豬肚好好味最麻煩喺清洗方便，工夫比較多，先將豬肚用鹽同生粉不停搓出汚物，重複最少3次先洗得乾淨，跟住出水再清洗後去脂肪，跟住用香鑊烘乾就可以配料一齊煲或燉，老公又買咗大個魚頭就用薑蔥去燉好味又簡單，手撕雞同炒個菜又開飯啦

材料：豬肚一個，咸菜半斤，淮山2片，糊椒粒1湯匙

先將豬肚用鹽同粟粉搓乾淨，最少3次先可去汚，出水後再清洗乾淨再用白鑊烘乾就會去豬味

 將糊椒粒放入豬肚內後用竹簽封口

 將所有材料入煲

 加入滾水浸過面燉3個鐘

 燉好的湯先試味，如果唔夠可加鹽

 豬肚取出切細

 切細的豬肚可放回入煲加熱就飲得