晚餐之蟲草花蒸排骨芋頭

入行足3年，每年新年都咁啱有job, 今年踏入第四個年頭都唔嚟外簽咗個媽媽，喺簽約時已經講清楚過年的假期點樣，喺簽約時個媽媽想避開過年幾日，都講咗話就算早都過埋年先返工，有人幫手，對我嚟講都無所謂，好多新手媽咪都未必知，一個農曆新年我哋呢行就一定喺放足3日，即時話一個月返26日就只返23日，如果3日返就會20日就完工或另補3日工資，點知呢個媽咪早咗2個星期，我之前已免費同她做薑醋連車費都無收，到她生完問我可唔可以早開工，我剛完咗個媽媽諗住新年會放假後先開工，而家早咗都無所謂，因為有時間，但已經覺得出奇講好話過完年後先開工，但都無所謂，老公都放早又可以幫我而且過年都無咩特別節目，點知開工那天直接去醫院接媽咪同BB, 記得果日9點幾接到電話就立即出門去醫院等，個媽咪已經問今日點計喺半日還全日計，我好多時第一日接媽咪而有工人買餸，我多數返到去搞掂就走，咁我就唔計，第二日先正式，呢個喺第一個媽媽問我點計，我都諗過唔計，其它媽媽都唔會問就算正式計她們都好開心多謝我幫忙，如果唔計就更加感激，通常我計唔計都會搞掂哂先走一定比收工遲一到二個鐘，我都唔係好計較的人，識我的人就知，但今次喺一個經驗而且要多謝呢個媽媽我先可以安心放假又可以休息一下，哈哈哈，果日一等就5-6個鐘，午餐只有媽媽有得食同醫院有下午茶，雖然自己只係早上飲咗杯麥皮，但都唔覺肚餓，只係諗住快啲返去就好，最後搞掂晒回家已5點幾，個媽媽同我講有她媽幫手煮，叫我搞掂個BB就得，因為咩嘢都未準備，回去先教媽咪餵奶，跟住洗奶樽，教她們點用消毒器，見她媽咪無準備只係買咗我叫買的菜同肉，就一邊準備湯料同晚餐明天的早餐，一邊煲湯，跟住教她們點沖奶粉同換片，抱BB要注意咩搞到差唔多9點幾，我見機本嘢都搞掂，而家中有2老同她朋友的媽媽，我講完同搞得七七八八就好似一個多餘的人，跟住我就話明天回來再處理，之後換返衫就走，回家等車時通知老公煮定麵，食完立即沖涼同準備明天開工的工具同衫，點知個媽咪打比我，話明天唔洗返，終止合約，睇過合約可以7日內隨時終止合約，個薑煲盡快處理後退回給我，當時我只覺得莫明其妙，而且好氣就話唔需要送埋比她，之後越諗越唔開心覺得自己好傻應該攞返個煲，而家都要成千蚊先買到，算啦講咗就唔好再諗，可能從未試過原來真係有呢啲人，越有錢越諗得盡，可能都喺好事，無啦啦又發生疫情搞到呢個過年氣氛好差，老公同啲女就好開心知我無得做可以休息一下，她們就擔心少樣，呢幾日都無咩出去只出去買餸，最開心喺初四一班同學嚟團拜，今早出去買菜先知好誇張，只係9點幾成個超市無哂菜，個收銀同我講今早未開門已有好多人排隊，咁只好落官塘睇下，樣樣菜都貴連平時最平的生菜都20蚊斤，咁買咗斤菜同鯇魚，些少肉就回家，之前雪櫃還有雞，阿妹又過嚟，咁就食咗今晚再算，開開心心又一餐

買咗成條鯇魚，今晚用咗四分一蒸嚟食

還有只雞先食一半

呢碟菜都20蚊，好似唔夠斤

還有一個仔芋頭加啲排骨同蟲草花蒸一蒸好味又有營，蟲草花可以增強免疫能力

年29買的花今早開得更靚

無所事事又整糖，今次加咗紅梅

豐富晚餐同同學開年聚餐在我家

咁快又年初四，今日約咗班同學上我家團拜，通常都會初三我哋百無禁忌，今年因為唔知需唔需要開工，到知道唔洗做約同學時有啲唔得閒，最後就約咗今日上我家，一早同老公食咗簡單早餐就去咗街市買餸，今日初四唔係太多檔開，最貴喺菜，豆苗$60斤其它都唔平20-30斤左右，魚同蝦都喺差唔多，$110斤同魚都係$100左右，今日有13個人所以買咗2條魚，另一條喺優質魚買的烏頭，今次整明爐檸檬烏頭，買完回家先煲個蘋果雪梨海底椰豬骨雞湯，再炆咗南乳花生豬手，準備其它料後就整咗菠蘿同腸仔包包等同學嚟就可以食，又整咗二款牛乳糖，一款有杏仁，另一款就紅梅杏仁，我自己就覺得好甜，但啲同學就話好食，整咗120粒左右估唔到淨返唔多，飯後又煲咗紫米芋圓湯水，個個食得好開心，開開心心又過完年

 豆腐雲耳煮小糖菜

 瑤柱豆苗

 鹵水鴨（呢個喺老公怕唔夠餸再加）

發菜南乳花生燉豬手，

好軟諗同學話好好食

 薑蔥蒸班

 沙薑雞（今次整沙薑雞都好入味）

 西芹雲耳炒果仁

 西蘭花拌豆腐支竹炆冬菇（支竹喺隔離屋比話喺她親戚自己整）

 明爐檸檬烏頭

 迷呢菠蘿包同膠他包

晚餐之腐竹銀杏煲豬肚

今日喺年初二，每年的初二一定回娘家食午餐開年飯，今年本來改咗晚上去富豪食自助餐，突然的疫情令到大家都唔想出，特別喺爸爸已經90幾歲，怕外出容易感染病菌，家姐提議取消唔想有咩出錯，咁就立即中午回去團拜同爸爸食午餐就算，食完各自回家，無預備初二晚在家食，阿妹又同我哋一齊回家話食完晚餐先走，好彩家有備定些餸料，再清下雪櫃，又一餐簡單又豐富的晚餐，開開心心又開餐

之前淨的豬肚加咗腐竹，銀杏同豬骨煲出靚靚豬肚湯

 今日啲花已經開得好靚

 早上老公話要食下年糕，就加蛋煎

 呢個喺無蛋的

大年初一的悠閒的一天

今日大年初一，先祝大家鼠年身體健康，事事順心，每年的年初一都會一早去老爺家拜年，自從二老離開後，而家的初一就同老公去大伯家拜年，之後就入沙田車公廟行個圈就回去，今日二個囡話同我哋飲茶，以前酒樓會唔開，近呢幾年都會開，但就加3-4%，所以都好少去，但呢二年就會加一，而我哋飲開果間還有下午茶，同老公去完車公廟就call二女出嚟飲茶，之後就回家準備晚餐，今晚魚魚做晚餐，昨日炆咗一盤鯇魚，之前又淨咗二款魚，今晚就加啲薑同蔥去煮一煮，過年前老公買咗鮮鮑放喺冰箱放便隨時有得食，今晚就攞咗幾只去彀同菜一齊整，還有一包大啡菇簡單蒜茸加芝士去焗一焗，喺2女最愛食，簡簡單單又開餐

今日一家大年初一的第一餐，豐富的一餐全年開開心心食

點心拼盤好豐富，有蝦餃，燒賣，牛肉燒賣，馬拉糕同潮州粉果

 新年點心發菜豬肚燒賣

呢個特別的蝦腸多一層脆脆好似炸兩但就富貴板包蝦

 臘腸排骨飯

 芋頭長春卷，老公同女兒最愛

 飲完茶回家就包裝埋自家制杏仁牛乳糖

新一年第一個晚餐唔太豐富但就簡簡單單

 薑蔥炆三文魚加油甘魚頭

 凍食蒜煮鯇魚

 鮮鮑，排骨煮西蘭花何蘭豆

 芝士蒜茸焗大啡菇

新年快樂

新一年祝大家事事順利，健康幸福快樂

年三十的豐富晚餐慶團年

話咁快今日年三十，自從轉咗呢行剛過年都開工，所以都無咩整嘢，樣樣都好簡單，今年唔洗開工就整咗花膠喺女兒買比我的海味包，大個女啦搵到份好工識得買海味比我，有鮑魚，冬菇，發菜，螺片。。。話朋友介紹好抵，其實價錢都係一般無特別平，無所謂最緊要開心，今日專登發咗幾只花膠試下，買咗成條鯇魚斬件去炆蒜喺老公最喜歡，今日買嘢非常貴，蒜都再$20斤，只得幾條就話有一斤都唔知真定假都無法，過年喺人都想搵多啲，又整咗阿囡喜歡的芝士焗大啡菇，阿囡回來就聞到，喺唔喺她至愛當然喺啦，飯後甜品喺椰汁三色艼圓配西米，開開心心又一餐

 海參花膠冬菇炆海參配西蘭花

 芝士蒜茸焗大啡菇

 發菜蠔豉炆南乳花生豬手

 三色芋圓配椰汁

呢個鯇魚斬件炆蒜喺老公最愛