產後食療助上奶之合掌瓜鰂魚湯

做咗差唔多二個星期，樣樣都幾好，因太太開刀咁就無咁早用魚，最快都一個星期後先用魚，有啲唔鍾意話怕魚腥，有啲怕骨個個都唔同，而呢個都會食但又唔想太早，咁已經二星期，奶量又唔多我就話試下煲魚湯，一啲都唔腥而且幫助奶水會多啲，鰂魚有益氣健皮通乳功效，配合掌瓜茨實有潤肺健皮效用，開刀順產都可以飲，最好就第二個星期先開始飲，今次分享下點先可以煲到湯好似牛奶咁又唔腥

材料：合掌瓜2個, 豬扒骨$20, 鰂魚1條,
蜜棗3-4粒，茨實半碗，果皮半個

先將茨實洗淨，果皮浸軟刮囊

 先將骨出水

 合掌瓜去皮去子洗淨切細件

 魚洗淨內部黑色嘢咁就唔會腥
煎魚時一定要抹乾，
煎時就唔會啲油周圍彈

 煎魚最緊要煎時唔好反黎反去，先大火封咗個面就轉細火，等魚煎好一面再轉就可煎到條魚靚靚

跟住就倒入一碗熱水，咁樣先會煲出來啲湯奶白色

將魚放入魚袋，啲水倒入煲到，其它料都入煲

大火煲半個鐘再轉中細火煲二個鐘加鹽糖調味就飲得，睇下啲湯好似牛奶咁