產後食療之電飯煲煮蟲草花元肉杞子蒸雞脾翼

一只雞好多食法，我通常就睇客再安排點整只雞，呢個雞胸肉都食，咁就將雞起二只比加料去燉，雞胸起咗可加瓜，菜去炒，而脾翼就可以簡單醃咗去蒸，雞殼就加料煲湯，咁成只雞就一啲都無浪費，好多新手媽媽忙到連飯都無時間去煮咁好多時都無得食，今次介紹呢個簡單又好味蒸餸連飯，洗好米加入醃好的料一齊煲，飯熟就食得而且好好味又滋補

材料：2只雞脾翼，元肉1湯匙，杞子1茶匙，，蟲草花1湯匙，薑絲適量
醃料：豉油半湯匙，糖的半茶匙，生粉半湯匙，黑芝麻油1茶匙

蟲草花洗淨去硬尾，元肉杞子沖洗

雞翼洗淨沫乾水先加入豉油糖撈勻

再加入生粉同芝麻油撈勻

將雞脾翼pop勻，再將元肉杞子蟲草花平圴放喺面

飯煲洗好米

放入蒸加

放入雞開制，飯熟就食得

產後食療之杜仲栗子燉豬脊骨

產後頭一個星期通常都會食啲清淡嘢，好似頭二日就會食粥，燉肉汁，因為剛生產完要比腸胃適應下，第三日如果食到飯就可以食，但最好啲飯都喺軟身啲，可以食下菜心肉片，合掌瓜炒肉眼根，煲節瓜湯，蓮藕湯等，過咗12朝惡露開始少就可以燉啲健皮湯水同補腰，但參茸藥材就唔好太早煲一定要清惡露先，特別喺紅棗，如果太早用啲惡露就會好耐都唔清，今日分享呢個燉湯喺好適合大家飲，因為照顧bb好容易腰背痛，呢個湯喺補腰固腰，產後肝腎不足引起腰膝酸痛功效，藥材分量好少喂奶都可以，但此中都喺個句每個身體的體質唔同，如果飲咗無咩嘢就可以燉多幾次，但喂奶又要睇bb受唔受到，如果同平時唔同可能bb唔受得就要停，呢個湯唔難飲好甜，栗子都好好味

材料：杜仲5錢，金狗脊4錢，栗子15粒，圓肉8錢，南棗6粒，豬脊骨半斤

豬脊骨出水，凍水一齊滾起就可以，其它材料洗淨放入燉盅

加入熱滾水

燉三個鐘就飲得

飲時可加適量的鹽

晚餐之三式椒炒茄汁蝦

時間過得好快唔經唔覺又做咗三個星期啦，還有一星期又完工啦，呢個客無工人又無人幫手，所以星期六更忙會準備星期日的早，午晚餐同湯，今早搞掂哂家中各人出門自己都早啲出去，雖然返九點半連買餸可以十點十五分前到就可以，但好多時九點八/九個字就到，今日更早未到九點半己到，每日都好忙，去到要準備炒米茶，早，午晚餐，生果，燉品，湯，有時還有糖水，煲薑水沖涼，照顧bb 飲奶，沖涼同清洗bb 衫等的工作，如果有工人可以教她做咗一部份咁去到就輕鬆啲，如果有人來更忙，要安排多人的午餐，煮薑醋，雞酒去招呼，呢個無工人無人幫就連星期日的餐同湯都會準備好，每朝一回去就先清理昨晚的餐具，煲，鑊......所有都無清潔，又要煲水，冷熱水都無，有時bb 要飲奶都無樽就會去到邊樣急就做邊樣先，預備好簡單的料比她煮飯但有時去到先煮，所以喺非常忙好彩自己都手腳快，每日去到就喺，做做做無停手好多時都早去遲走，今日更忙有人黎午餐，去到又無煮早餐，咁就好快手煮咗個麵，之前包咗啲餃子就喺急時有用，跟住就去煲水洗奶樽再去餵月, 有時阿b唔合作就飲一個鐘，好彩就半個鐘，今日又飲咗一個鐘，時間更緊，搞掂完立即去準備燉湯，午餐同湯，食完午餐同b 沖涼餵奶，洗bb衫就清潔午餐的碗碟後就煮雞酒比客人跟住就準備晚餐，同明日的餸，忙完回家阿妹又過來食咁又再煮，今早出門己煲咗個椰子烏雞湯，又醃咗只雞炒二個菜又開餐啦

星期日的餸都會好簡單，湯料準備好放入煲加水煲就搞掂，大部份蒸餸煲飯放入飯煲一齊煲，飯熟就有得食

 節瓜章魚花生排骨湯

 元肉杞子蒸排骨

 杞子蓮藕蒸肉餅

 蟲草花蒸雞柳

 薑蔥蒸雞脾

產後食療助上奶之合掌瓜鰂魚湯

做咗差唔多二個星期，樣樣都幾好，因太太開刀咁就無咁早用魚，最快都一個星期後先用魚，有啲唔鍾意話怕魚腥，有啲怕骨個個都唔同，而呢個都會食但又唔想太早，咁已經二星期，奶量又唔多我就話試下煲魚湯，一啲都唔腥而且幫助奶水會多啲，鰂魚有益氣健皮通乳功效，配合掌瓜茨實有潤肺健皮效用，開刀順產都可以飲，最好就第二個星期先開始飲，今次分享下點先可以煲到湯好似牛奶咁又唔腥

材料：合掌瓜2個, 豬扒骨$20, 鰂魚1條,
蜜棗3-4粒，茨實半碗，果皮半個

先將茨實洗淨，果皮浸軟刮囊

 先將骨出水

 合掌瓜去皮去子洗淨切細件

 魚洗淨內部黑色嘢咁就唔會腥
煎魚時一定要抹乾，
煎時就唔會啲油周圍彈

 煎魚最緊要煎時唔好反黎反去，先大火封咗個面就轉細火，等魚煎好一面再轉就可煎到條魚靚靚

跟住就倒入一碗熱水，咁樣先會煲出來啲湯奶白色

將魚放入魚袋，啲水倒入煲到，其它料都入煲

大火煲半個鐘再轉中細火煲二個鐘加鹽糖調味就飲得，睇下啲湯好似牛奶咁

生日晚餐在百樂酒店

今日又大一歲啦，好開心一早就收到好多同學朋友的祝福，如常整早餐午餐盒跟住就返工，呢個太太好好送咗盒大金沙比我，阿女朋友又送咗盒蟲草，今年的禮物特別多，女兒們又專登買咗盒鳳梨酥還有好多台灣特產，放工一家連阿妹一齊去尖沙咀百樂食自助餐，而家食自助都唔平，今晚星期五又比平時費$30，好彩有生日優惠價錢就平好多，而最驚喜喺有生日蛋糕，我同阿妹同月同日咁就一齊有蛋糕切，今次呢度啲食物好好，而且環境又清靜唔太多人，放工時自己突然唔舒服淋住無口福，點知坐下食下又無事而且食得好開心，女兒分享台灣之旅，快樂時間特別快因有消夜自助，九點半左右就通知我們要準備離開，過咗一個開心快樂的晚上

呢間啲蟹好大只

老公好有心機剪好比我哋

今晚每個都有半只鵝肝醬拌焗芝士龍蝦，個個都話好食

大家都喜歡的焗蠔

煙三文魚配沙律

部份小食都唔錯

全家最愛燒羊架，都有燒牛肉

串燒部有腸仔，雞串，燉湯

部份冷盤

部份熱盤

鵝肝醬酥盒幾特別

呢個蕉糖燉蛋，全晚一次專人加酒去燒

好重酒味但味道好好

還有Movenpack雪糕

燕窩燉蛋白

藍莓朱古力蛋糕好好味

陸續有來的生日禮物

顧主送的金沙，今年叫老公唔好買，因每年老公的生日禮物物一定喺花同朱古力

女兒們在台灣回來不同的食物，茶葉連米都有忘了影，話啲米有機而且好香甜