產後食療大補之鹿茸燉雞

最近2個job都比較忙無咩時間寫食療，而家呢個媽媽本來做一個月，十月媽咪做個半月休息一下就等她12月中，點知BB早咗5個幾星期出嚟，完咗十月媽咪就立即開工，之前晚上過去跟下同準備餸菜比她，就係咁做到而家差唔多3個月，媽咪就叫我做到月尾，反正有時間，3月媽咪就準備1號開刀休息幾日就返，呢個媽咪好幸福奶奶同媽媽都好錫她，奶奶就買咗鹿茸花膠同蟲草比她補身，她媽咪又買蟲草同花膠，可惜花膠呢個媽媽一食就塞，所以唔再食，鹿茸最好2個月後，最快都個半月同啲惡露清咗先，剛食時份量要少試下個媽咪同BB受唔受到，今次又講下點做，其實都係好簡單

材料：去皮雞半只，瘦肉15蚊咗右，紅棗6粒，淮山2片，杞子元肉各一湯匙

先將雞去皮洗淨同豬肉一齊出水（喺放入凍水一齊煲滾起多一分鐘左右再清洗乾淨）其它材料洗淨

鹿茸片可先用暖水浸去汚就可以用

紅棗一定要去核先可以用咁就無咁燥

放入全部材料加入滾水就浸過食材就可以

放好材料燉3-4個鐘就可以

燉完四個鐘會見到好靚的色澤

燉好的鹿茸最好食埋

如果怕太油可以用隔油壺可去減些少油