又順利完成一個工作

忙咗一個月今日last day啦，時間真快唔經唔覺又講good bye,每次都喺唔舍得，每個仔仔，囡囡都好得意，在此祝願她們一家健康快樂，囡囡活潑精靈，家幸福快樂，今日囡囡唔知咩嘢事全日唔瞓，眼仔碌碌好得意，可能知我走未同我影相，哈哈哈，呢個媽媽都好合作，樣樣都食囡囡都好乖食飽就瞓，瞓飽就食，民以食為先，呢個囡都一樣，只會要食先嘈，有大小便都唔嘈，無得食就喊到收唔到聲，今晚知道好多嘢要跟一定夜，老公收工叫他買定魚，肉，菜，老公話啲嘢貴咗好多，成餐餸無咩嘢又二百幾，當然啦，我叫他買二十肉排，他就買二條骨呢個部位最貴，他又買咗成條沙鯭當然貴啦，老公唔識買成日比你握好好笑，最後我走太夜，教老公煮返到去8：30就有得食

滿月送比媽咪同bb的祝他們健康快樂

 呢個媽媽好特別的信同感謝咭

晚餐之二煲一雞同囡興生日

最近天氣時冷時熱我的氣管又發咗啦，一日落車唔小心吹親就出事，見到太陽伯伯無諗過落車會咁大風就喺咁出事，而家咳親喺人都彈開，最慘睇完醫生食藥就更咳所以好煩，最怕自己咳每次都幾個月先自然好，但都無法自己知自己事，忙起嚟水唔飲就更咳希望今次唔好咁耐快啲好，今日喺細囡生日，祝自己囡囡生日快樂健康幸福，本來話喺宿舍唔返要開會，最後話提早搞掂想回來，好彩整定咗個迷你無蛋的朱古力蛋糕，因為整親只腳睇咗鐵打話唔食得蛋，呢個囡一喺唔理，認真起嚟會就芥得好清，因為無咩時間本來話出去食，最後喺家簡單食，大囡返學話最後一堂唔可以走，點知因好多paper做唔切最後都係返咗嚟，個個都8點幾先到，我返到去又8點就去超市買啲嘢就回家邊煮邊洗，煲個排骨飯滾個什菜煲再加只雞，飯後食蛋糕，阿妹話一家人一齊食就咩嘢都好好味，老公就話遲啲先出去補食一餐，開開心心又一餐

晚餐之豉椒炒雞

又星期日本來可以休息瞓晏啲，下一個媽媽又差唔多時間，所以約咗家訪主要喺送炒米茶方便媽媽生完立即有得飲，順便講下有咩要留心，喺咩情況要入院，同睇下啲嘢齊唔齊，bb會瞓邊喺邊度沖涼.....等，因為好遠所以預二個鐘出門，約咗11點九點就出門，10：30左右到見未夠鐘就喺附近行個圈之後就早啲上去，傾到點幾就走約咗老豆飲茶例牌假日的節目，二個今晚又唔洗返嚟食，諗住晚餐煮個麵食就算，點知阿妹又話要上嚟，我哋話煮麵食她都無問題，最後我都係簡單煮飯，因為阿妹成日出街食都係食粉麵，只有假期上我到先正經食，而我哋近呢個月都喺煮麵或落街食，家中有雞有菜就將雞加三色椒去炒，再加個菜脯炒蛋，簡香單單又一餐

晚餐之提早同細囡興生日

還有幾日就完工啦，呢個媽咪同囡囡都好乖，雖然無工人，只有我晚上就老公返嚟幫手，基本上唔喺太忙但路途搖遠有時想夜少少都唔得，如果6點幾先走回家一定8點後先到，要行出去15-20分鐘，去到送車尾就要等20分鐘先有車，返到官塘又要轉程小巴先到家，所以好多時返到去就是旦煮麵或落味皇，今日老公休息，細囡又回來食咁老公就買咗超大條石班同蝦，細妹知我囡回來食就買咗個靚靚芝士蛋糕，下星期中先正日，但阿囡話唔知學校忙唔忙未必返嚟食到時再通知，咁就今晚食咗先

第一次食的泥鰻魚，我就覺得無咩特別

 其中一款下午茶的南瓜燒賣

 其中一餐煮比媽咪的午餐

產後媽媽小食

最近好忙同好攰都無乜時間上嚟寫下嘢，呢個媽媽同bb都好快就互相適應，媽咪出院後個幾星期就可全人奶而且都有些少存貨，呢個囡都好叻食人奶都3個鐘先起，如果食唔飽就會嘈，其它就唔會嘈，所以下午茶都有時間整啲嘢比媽咪配燉湯食，好似菜心豬肉腸粉，生煎包，燒賣，煎餃....等，有啲人覺得我好無謂有時間都休息一下，已經好忙還可以搞咁多嘢，但對我嚟講最緊要媽咪想食又食得開心，我就唔覺辛苦，今次介紹一下腸粉同生煎包，快樂的時間過得特別好快，唔經唔覺下星期中就滿月啦，好快又完成呢個工作，雖然大家習慣後我都可以準時收工，但可能車程關係我最早都7：30先返到去，有時上唔到車或塞就8：30先回到家，咁又喺一煲過或樓下味皇

呢個用麵粉油，鹽糖去搓咗個麵糰先，跟住就準備餡料，做好一份份就包入開好的麵糰

 簡單埋口

 面放啲蔥同芝麻，煎時更香

因為餡料喺生，煎時先加水浸過包底就可以

 等收水就差唔多熟，再開蓋加少少油煎

用易潔鑊會唔洗太多油都可以煎到底金黃色有外脆內軟的感覺

 呢個喺南瓜豬肉腸粉，bb無黃就可以食，原來呢個媽媽好喜歡南瓜，之前整咗南瓜煎餅，淨底啲南瓜就用嚟簡單整呢個腸粉

腸粉皮而家唔洗自己整買現成好方便，但一定要新鮮才容易打開加餡料

 南瓜洗淨切絲

先放豬肉再放南瓜，好隨意想食幾多料就放幾多

 包好後水滾蒸15分鐘就食得

產後食療之蘋果核桃雪耳湯

開工差唔多十日，呢個媽咪同囡囡都好好，大家都好快就適應，囡囡都好乖食飽就瞓，記得第一日回家，新手爸媽都樣樣唔識，雖然第二日先正式開工，但我都專登過去跟跟，她們都好多謝我，因為真係連片都未換過，第一晚二個都搞到成晚無瞓，媽咪還一早問我可以幾點到，我其實好早就出門口，可惜路途真係好遠買完餸車轉到車都要二個鐘，去到媽咪就講成晚換片餵奶無停所以無得瞓，我就叫她們立即瞓，囡囡就交比我，午飯時先叫她們再教她們點處理，而家就做得好好同習慣也清楚囡囡的情況，呢二日我都開始唔洗太夜走，好啦又介紹下一個好湯水比大家，呢個湯適合坐月媽咪同而家忽冷忽熱的天氣，一家大細都飲得就係蘋果核桃雪耳湯，通常12日前未用得藥材去煲湯，飲呢個潤肺養顏補腎就最啱

材料：紅蘋果2個，百合2湯匙，雪耳一只，淮山3-4片，核桃2兩，豬展或排骨頭半斤，蜜棗3-4粒

豬展或排骨頭出水去污，雪耳用水浸軟去芯，核桃用熱水浸15分鐘就去苦澀味

 蘋果刮去面層臘質

洗淨切細去芯

 將所有材料入煲加水過面

 先大火半個鐘後轉中細煲2個鐘就飲得

晚餐之薑蔥蒸石班

開工的時間過得特別快，唔經唔覺又做咗個多星期，最初幾日大家未習慣都會搞夜咗先走，返到家都8點後，而且好遠去到元朗，初時唔熟地方每晚都浪費好多時間行出去搭巴士，如果走一班就要等20分鐘，巴士去到官塘又要轉多程小巴先返到家，時間就喺浪費喺等車，如果順利上到村巴或行出去15-20分鐘左右出到市中心轉到巴士再轉小巴，個半鐘就到家，如果左等又等試過二個半鐘先回家，所以返到家多數家樓下食或簡單回家一煲過，麵或湯飯是是旦旦又一餐，今日老公休息，啲囡都話返嚟食，我就買咗湯料出門前煲定醃咗雞翼，叫老公買菜同魚就得，點知老公就好豪買咗條好大石班同蝦，開始大家都習慣搞掂晒嘢交代好就收工回家都未8點，老公就因時間返去就有得食

 好巨型的班好好味，但大到食唔哂

啲蝦都好大只，老公話煮到蕉蕉地先好食

 之前食淨乳豬就只係焗咗一半雞翼

 啲囡想食菜蒲炒蛋，老公又整成枱餸

每日都有唔同的點心比媽咪做下午茶配燉湯，有薄餅，腸粉，蔥油餅，菜心豬肉煎餃，菠菜豬肉餃.....食到媽咪好開心，話日日有驚喜，其實都係簡單嘢之後就會重復啦，哈哈哈
其中的豬腰燒賣

呢個燒賣餡就利用燉湯淨的烏雞起肉加蓮藕，豬肉搞埋再喺面加些少豬腰，連她老公都話好味（唔食湯渣的先生）

 另一款的瑤柱豆苗豬肉燒賣