晚餐之蟹宴

又星期六啦，呢幾日都好忙只係星期二晚正式煮一餐，呢幾晚啲囡無返嚟食，我同老公就簡單一煲粉麵或湯飯，星期一bb去健康院，上星期六出院都唔太高，但星期一去健康院就過200，令到媽咪好擔心，心情好差，我只有不停開解令她可安心些，因為姑娘同她講，如果醫生睇完可能要轉介去醫院，好彩醫生睇完話可以唔洗去醫院過二日再去，所以好忙又去健康院啲時間就唔夠用，有時搞到6：30或七點先走，所以返去都係簡單滾一煲是旦食，星期五請咗半日假因二年前話我有事，就轉介去醫院睇完就排咗今日睇，本來開咗工唔想去睇但家人就嘈我，我本想改期但又等二年，點知去到等咗三個鐘話應該照咗先覆診，但未照就覆診，她話我點解當時唔問清楚，我當然有問，但啲識員話醫生安排照跟日期就得，咁她們邊解釋邊講話當無嚟過再等下星期一照完再比期我，真離譜我喺到嘈有冇搞錯，等咗三個鐘叫我走，最後醫生話照比個期我，如果星期一照完無嘢就跟覆診期回來睇報告，如果有事就會通知我回來，搞到果日又浪費半日返到去好急趕哂所有工作又七點幾先走，今日剛好12朝又好忙同好熱閙，忙到連午餐都無食，平時的工作剛好，如果囡囡乖還有幾會休息，所以12朝會更忙煲更多的薑水洗頭，沖涼，燉魚頭湯，煮雞酒，煲薑醋，今日老公唔洗返就唔洗趕，老公會幫我買餸預備好，到走時老公話啲囡唔返嚟食，買咗好多蟹，唔蒸魚，點知阿妹上嚟就蒸返條魚，老公煮好等我返去，返到去就叫食住蟹先，搞到唔記得影其它，哈哈哈食蟹都食飽哂

 二大碟蟹食到飽，其它都唔洗食

媽咪的媽媽同一位表姨比利市我，話今日辛苦哂

 早日整比媽咪食我墨魚滑釀海參

今早啲花開得更靚