產後食療電飯煲之元肉紅棗蟲草花排骨飯

又完工啦，呢個媽咪好乘，每日我都會準備啲料比媽咪早上煲個飯，食足成個月，餵人奶的媽媽如果早上食飯，營養好啲奶都會靚啲，其實都喺好簡單的，變化又多，今次介紹呢個紅棗補血，蟲草花增強免疫力，通常第三個星期就會加紅棗，因為惡露差唔多清，bb 通常都已退黃可以用紅棗，如果第一星期我就只用蟲草花排骨，簡單將排骨醃醃，再加其它嘢放入飯煲同飯一齊煮好快就有得食

材料：排骨(最好用飛排夠軟滑)
紅棗2粒，蟲草花1茶匙，元肉6－8粒
醃料：豉油1茶匙，糖半茶匙，生粉1茶匙

排骨洗淨加入醃料，最少半個鐘

洗好米跟平時一樣，但水就少些少，因排骨有汁會將飯大淋，將所有材料平放喺飯面

按制等跳制就食得

去濕粉葛赤小豆扁豆鰂魚湯

粉葛鰂魚湯是全家人最愛, 唔食魚的阿妹也喜歡, 見今日放假就一早走去街市買齊料返來煲

材料：粉葛一斤，赤小豆扁豆各2兩，果皮1角，排骨頭半斤，鰂魚1條

排骨頭出水(凍水一齊煲滾起多一，二分鐘)，出水後洗淨，粉葛去皮洗淨切細，豆先浸半個鐘可去風可減少胃氣

煲魚湯最緊要就是將魚煎一煎, 煎好後灑些少酒和加入果皮同煲, 煲出來的湯就好鮮甜無魚腥味

魚煎香2邊後灑些少酒就會去腥味

跟住撞入滾水，煲出黎啲湯就會奶白色好似牛奶咁

魚煎好入魚袋

全部材料入煲，水過面

先大火半個鐘後轉中細火煲2個鐘就飲得，飲時可加鹽調味

屋苑的一日遊

每年屋苑都有一日遊，舊年家姐好有興致叫我參加都抽到我哋，今年啲女話一家好耐未出去玩，叫我今年照入表，抽到就自己家四人去，今年只做後備，最後都有份今早好開心第一站去嶺南之風原來喺茘枝角公園好好笑，雖然普通地方，但可能一家好耐無出門旅遊，難得大家安排時間一齊，二個女都好開心，不停影相，跟住午餐喺悅來酒店食自助餐，食物簡單都食得好飽，有抽獎但我哋就無運，最後一站就去馬灣公園，回到家都差唔多五點，二個女又忙自己的事，晚餐因太飽就簡單食些少，好開心過咗愉快的一天

午餐在海皇粥

昨日完工，今日都好忙，先搞掂啲女出門，同老公食咗早餐，我就出12月媽咪家訪，送炒米茶包放便生完立即有得飲，再睇下入院準備同其它，傾咗幾個鐘大家都好開心，現在休息等她生完就開工，走時約咗老公喺海皇食啲嘢就出細妹幫她清場搬最後一轉，真係唔明，上星期多人可一次過搞掂都要走多轉，無法每人淋法都唔同之後本來阿妹請食飯，但二個女又返黎食，回家都六點幾老公話等齊人落街食，點知啲女一個八點一個九點，我就淋住買個羊腩回家打邊爐，點知買唔到，最後買到啲羊回家立即整都夠時間，二個回來剛可開餐

 因為有$100現金卷就同老公入咗海皇食，之前啲人話好貴，以前簡唔中都有黎，近呢幾年已經無去，真係幾貴，味道又一般,叫咗二樣嘢估唔到剛好$100

老公叫碗及弟粥配半條油條$39

 我的海皇粥配1條油條，一碟蝦腸同咖啡就$61

蝦腸有3條，每條只有一只蝦等同齋腸

 我好鍾意食炸兩，見無料就自制，

將腸粉打開

 放入半件油條後卷起

加入最愛的醬料，哈哈好味道

晚餐先用醬料燉咗個羊腩

再配啲女兒喜歡的