晚餐之打邊爐迎2017

完咗工後淋住休息下，點知有個朋友的朋友早產11週，本來請咗陪月因早咗無人接，咁問我可唔可以，當時無淋過自己想休息又過年，見無人幫手咁就答應去幫手，明天就去睇環境，今日都好忙，一早搞掂完嘢就過老豆到，因跟住更加唔得閒，有人送洗衣機來本來話10點所以一早就過咗去，點知喺地鐵接到電話11到12點送到咁就唔洗趕，去到老豆家等到1點都未到，就打去問話就到幾個字又喺無哂下文，裝機的人打來話2-4來裝機，咁叫他3點來，跟住不停打比送機唔聽來到二點還閙話無打過比我，我比他睇就話無講咁早又話搞到跟車都唔咁上來，好氣都無法拿拿淋同老豆落去食嘢再回來等裝機，搞掂完老豆澡涼和晚餐又趕回家，因今晚約咗班同學回家打邊爐倒數，返到去已有同學等真唔好意思，跟住洗洗切切就開餐，好豐富有個同學買生果，有個買飲品又有個買咗帶子同肥牛來再加我的六種菜，四種菇，豆腐，冰豆腐，響玲，牛肉，什丸，豬肉，成只雞，大蝦，生蠔，蘿蔔.........還有腐竹雞蛋糖水，倒數的香賓，好開心的一晚，祝大家新的一年事事順心，身體健康

晚餐之焗四款大蘑菇

今日本來在家無所事事，昨日終於買到四個特價大蘑菇，大女講咗好耐每次見到成二十蚊只就好唔舍得，今次見十蚊就買咗四只，唔知焗咩好，個女就話咁得閒上綱睇下啦，點知朋友一個電話一出去就大半日，本來淋住煮餐好，最後都是旦用咗四種味去焗蘑菇，好彩啲女都話好好食，因為無上街市買定餸，炒個年糕又無泡菜就是旦用啲菇芽菜同雲耳去加個紅咖哩炒，點知食慣泡菜的她們覺得唔好食，最後淨大半，留明晚買到泡菜再煮，今次用咗四種唔同口味，啲女覺得都喺蒜茸芝士最好味，咁下次就唔洗攪咁多簡單蒜茸同芝士，炒菜蒸魚又開餐

 加蛋同芝士，好飽滿

 蕃茄洋蔥

 蒜茸芝士

 好大只的蘑菇，焗時好香的蘑菇味

1） 蕃茄洋蔥-先將洋蔥爆香加蕃茄炒香就加鹽糖調味
2）蒜頭啄茸加牛油同鹽調味
3）雞蛋直接打份蘑菇內加些少鹽
4）什菇喺將菇同雲耳用薑茸爆香加鹽糖調味

 釀好每只菇就加入芝士

 入焗爐180度焗30分鐘或芝士金黃就得啦

 睇下金黃的芝士大家都引唔住啦，開餐

午餐在Club one

今日本來閒在家中，剛巧無水淋住今日在家就裝定啲水，唔洗用起來無水，點知突然有個老朋友打來，問做緊咩今天她放假出來午餐，咁就出咗去，大家都唔知食咩就先出咗官塘，本來淋住平平地去韓燒又可坐幾個鐘，點知朋友唔想最後由她話事去咗間Club, 我以為喺做健身原來專搞婚宴，朋友話聽人講有茶飲咁就走咗上去，環境好清淨而且好靚好舒服，坐底就黎個三小碟開茶後就立即同我哋斟茶，都好耐未試過有人斟茶，跟住就睇下有咩食，啲點心名個個都好靚，叫咗四樣加燉湯，點知好底的花膠燉湯$68就話買哂，叫我哋改其它但全部就過百，咁我就話唔洗，最後加多個炒飯，太耐無見12點坐到二點開始比人叫埋單話可坐到三點，點知未到三點又話要交場，咁就走轉去其它地方繼續傾到五點先各自回家，今餐都算貴埋單三百幾，話直唔直真喺見人而我就唔寫得，我就會食韓燒任食又唔洗被人趕，個個唔同呢個朋友比較喜歡呢啲環境，而我就覺得一般，飲茶食嘢都喺一般，我就會搵啲平靚正，老朋友見面真喺有說不完的話，好開心的一日

三小碟只喺得少少

 米水浸菜都幾好，但我就覺得咸咗些少

紫茸白玉果（粉果皮包住蝦同些少配菜外圍就用紫薯茸盛著），朋友就話好好食，我就覺得無咩特別而且太唔底啦

 排骨陳川粉

眉豆煎餅 

 紫薑同腰豆

 齋粒

 蟹肉炒飯

晚餐之打邊爐

今日喺聖誕假的最後一天，以前好開心每個月都等紅色假就唔洗返，自從無嘢做後日日都一樣，有時都唔知邊日打邊日，剛完咗份陪月，又幫同學替幾日，這幾天喺假期都無特別，一日去老豆到，一日去老爺到，家姐又來一日，今日終於在家休息下，啲女晚上都回家食，細妹說由平安夜到今晚都過來又話要打邊爐，咁就簡單買啲嘢，打邊爐唔洗煮但就洗洗洗都好忙，最緊要大家食得開心，飯後甜品就喺細妹帶來的芝士蛋糕好好味，可惜忘了影相，明晚去幫個舊同事，因坐月坐得唔好，去跟下幫她調理下，還未100日還可繼續補

同老豆晚餐在Aok

自從無做嘢轉咗讀書，再全職做陪月後無哂正常時間，以前文職同幼稚院工作都有公眾假，星期六同日的分別，但現在就日日都一樣，今日12月24日喺平安夜，以前又好希望收早又會約人回家打邊爐去迎接聖誕，今年就無約人還去左老豆家同老豆飲茶食午餐，晚餐還叫老公過來一齊同老豆食完先回家，老豆喜歡出去食，咁就同他再落樓下Aok, 以為得我同老公倍老豆，點知細女話上完堂可以過來，阿妹又話比人飛問有無飯食，我話喺老豆到咁又過來，去到又叫左個四人餐有魚有雞同二個小菜加四人的湯，茶同熱飲埋單都唔洗$300食完就回家整定魚肉雞，明天又約咗老爺去荃灣拜奶奶，呢二年轉變都好大，時間過得好快，再過幾日又2017啦，預早祝大家新一年開開心心，身體健康，事事順利

晚餐之泡菜炒年糕

今早又如常煮早餐，午餐盒做下基本清潔就出去買餸，因下午約咗過香港面試，二點幾出門先在家附近買餸就搭小巴落官塘再轉地鐵出柴灣，今次面試特別啲要煮一餐，面試咁耐都未試過好特別，去到傾完煮一餐後回家都七點半，無淋過咁夜先返到好彩早上買咗餸，咁就拿拿淋煮應成咁炒年糕都忘了啲女問是否炒年糕先記起，好彩有礶泡菜但她們話唔好食咁一路都無煮，講好會買咗今晚有時間就煮，最後都用咗自己再加調味，她們都食唔出，哈哈又一餐

好特別的陪月面試工煮一餐

陪月一站介紹左份工，顧主打來約我面試，好特別的一次，之前果啲都喺見面傾下，但今次好特別約上她家，跟住問可唔可以煮一餐，我好自然話無問題啦，咁她就叫我買餸會比返錢我，$100內二人食二餸一湯隨便就可以，煮對我黎講無難道，咁打返去中心講聲，點知原來喺唔會咁要我同顧主講喺試工又要買保險同計返鐘錢，最後我就跟中心同顧主講，顧主話無問題咁我今日就上咗去，先大家講解同她們問咗好多關於工作的問題差唔多都傾咗成個鐘，跟住就去煮唔洗一個鐘我就準備咗三餸一湯，搞掂完她就叫我先離開這，她們商量好需要就通知我再上去簽，因為第一次咁樣面試我就要求比我影底留記念

 蕃茄薯仔排骨魚尾湯

 三色椒炒排骨

 薑蒜炒菜心

 薑蔥蒸鯇魚腩