晚餐之茄子炒金邊粉

今日去咗超市做緊壽桃牌產品，買滿100就有禮品包，比個sale 講呀講就買咗一大袋麵，即食意粉，即食返熱包，見阿囡喜歡食金邊粉又周圍試，講到好好味，咁啱都有金邊粉就買咗2包有特價，今晚就炒嚟試下，買咗魚片，扎肉諗住加埋椰菜，最後怕太多嘢就將本來魚香茄子啲料用嚟炒金邊粉，加個菜同焗雞翼還有木瓜百合湯又開餐啦

喜歡茄子先用白鑊烘乾

烘乾後就加入魚片同扎肉炒香

加入豉油先調好味

最後先加入金邊粉快炒勻就唔會太碎

炒勻就可上碟

晚餐之小龍包，酸辣湯同上海粗炒

今日在家又無所事事就出咗去買嘢，諗起阿囡好喜歡食小龍包，周不時買唔同的小龍包比我哋試，我就一般無特別喜歡，好多時媽咪啲小食我都會整小龍包，剛完工的媽咪特別喜歡我整的小龍包，差唔多完工果個星期就食咗2次，見咁得閒自己家人都未試過今晚就整上海餐，其實都係好簡單去食上海嘢都離不開小龍包，酸辣湯，粗炒，豬扒，鍋貼，記得早前同同學去咗一間都喺食呢啲真係唔好食又貴，本來喺想搵個新地方晚餐可以多選擇最後呢間都無下次，哈哈哈，買好哂嘢就回家又整埋蔥油豬扒，開開心心又開餐

個蒸盤太細，蒸完黏住攞時穿咗啲湯溜哂，但她們都話好味

蔥油豬扒

粗炒

酸辣湯個個都喜歡，特別大女

煎好豬扒用干蔥爆香啲油加埋蔥再淋喺豬扒面就搞掂

今次包得個樣唔太靚

晚餐之車仔麵餸配薑蔥蒸鯇魚

而家休息等11月媽咪生完就開工，開工日就好是旦一煲過叫外賣， 今日突然大女whatapp 話無咗以為咩嘢事，原來家樓下的味皇無啦啦關門啦，以後老公都唔可以叫B 餐啦，通常老公諗唔到買咩又或者唔想煮就一定叫味皇B餐喺焗意粉，咁回家再灼一碟菜就搞掂，而家關咗門以後都無得叫，估唔到做咗二十幾年都無諗過會關門真可惜，雖然有另一間餐廳，但太濃味同太咸我家都唔喜歡，而家唔未開工今日就整下家人最喜歡食車仔麵，老公最喜歡的豬腸，我最愛豬紅，囡囡最喜歡牛腩，蘿蔔，出面食叫一碗幾個餸就要幾十蚊，自己整唔洗一百蚊好多款食到飽想要咩就整咩加多個蒸魚又開餐

豬腸最麻煩就喺清潔，我喜歡食自己整的感覺清潔好多，因為我會清哂入面所有嘢，用鹵水汁先炆咗大腸

跟住就炆好牛腩加埋蘿蔔再煮煮，食前先加入豬皮，豬紅同其它料

晚餐之南乳雞脾仔

同學知我休息就約我出去飲茶，隔離完後都唔太想出去，今日終於出去同同學飲茶，飲完就買餸回家，之前老公買的三文魚太多留起一部份簡單香草同鹽醃醃再入焗爐焗一焗，買咗雞脾仔囡囡先話想食燒雞，而家入咗屋後就唔會再出去，只好將脾仔南乳醃完去焗就算，買咗黃䲞槍本來蒸蒸，但啲囡話想食煎咁就簡簡單單開餐啦

在家隔離的午，晚餐

早前阿女中咗即晚就安排去咗竹高彎，而我哋3個就在家隔離，那天收到消息立即全部回家了，回家前我都去做一次檢查，回家再做快測，好彩囡囡有唔舒服快測無事都第一時間睇醫生再去做檢查，而家報告好快出，估唔到出嚟的報告喺有事，突然其來的事有無經驗就立即上綱同搵人問，密切接觸都要在家自我隔離7日，打咗3針的我們，在6同7日快測無事第7日就正常，第7日那天我同老公都5點幾起身做快測，無事老公就立即開工，而我準備早餐同午餐盒比老公出門就再去瞓，大囡就第8日都可以回家了，雖然我一直都無事每日都同個媽咪保持聯絡，本來還有幾日就完工，但個媽咪都唔想我繼續希望提早完工，咁都無法唯有照提早完工還要遲啲先可以返去執嘢，無所事事的我雖然在家7日，但都無心情出去，老公返工就叫她買餸回來就算，隔離期間完全無心情做任何事，雖然無事但頭幾日都心情好差，唔知大家有冇事，有事就要再加期，到咗第5日心情開始好啲，應該過咗高菌期，第6日再做快測無事更加放鬆開始整下甜品大家食，喺呢段期間多謝隔離屋的太太，知我們有事都話有需要隨時聯絡，細妹同學都話同我哋買菜，但都唔想麻煩她們，而且都無心情食嘢，只係好簡單同家中有咩就整咩，終於完成啦，阿囡回家啦，但大家都繼續保持防禦，特別喺女兒怕自己未清雖然無事，第8日我終於出門去買嘢同再去做檢查，一齊正常就開始約返明年4，5月的媽咪出嚟傾，希望疫情快快離我們而去，大家可以過返正常生活

大囡回家的第一餐，專登去街市買雞軟骨，她話最想食配酸辣米線同豉汁煮三文魚頭

其中一日整比細女的漢堡包

簡單一煲過

我同老公的早餐

有麵粉在家就方便，早餐有包就搞掂

有意粉加啲芝士撈埋又搞掂

椰菜加蛋同麵炒埋又一餐

點心配個粥又搞掂一餐

阿囡見我無心情就話想食撻想我搵啲嘢做唔好諗太多，做咗皮最快就喺整蛋醬做蛋撻，有包椰絲又可整埋椰撻