產後食療上奶湯之鮮淮山合掌瓜魚尾湯

一開工就好忙，都無咩時間去寫blog, 而家就盡量搭車時寫，今次介紹呢個簡單好味，又可幫媽媽多啲奶同時都有健脾潤肺功效，順產開刀一星期後就可以煲嚟飲，但記得一定上咗奶先，好多新手媽媽可能未知點先上咗奶，其實好簡單，用手搾時噴射出嚟就喺上咗奶，通常三，四日左右，每個都唔同，如果未上又飲上奶湯就會好脹容易石頭胸，所以唔好心急要餵人奶一定無問題，好啦講下點煲呢個簡單湯

材料：鮮淮山半斤，魚尾一條，花生半碗，合掌瓜2個，薑5－6片，豬肉$10

 魚尾洗淨抺乾水入鑊煎

 2邊煎到金黃

 放入魚袋

合掌瓜洗淨連皮切細件，淮山去皮切細件，豬肉出水

全部材料入煲加水，先大火半個鐘，轉中細火煲2個鐘左右加鹽調味就飲得

產後食療小食之用餃子皮做杞子冬菇雲耳豬肉燒賣

今個囡囡bb好叻，一星期就退黃，以為唔洗返去點知媽咪有乙肝，過咗比囡囡要去醫院抽血，今日終於安心在家唔洗再去健康院，醫院就未出報告暫時都未知，咁時間就正常啲唔需要早一個鐘去，時間就好安排，囡囡又乘食完就瞓咁有時間整小食比她媽媽做下午茶，自己買咗餃子皮就攞咗部份出嚟加啲料去做燒賣，浸咗雲耳同冬菇炆排骨，就攞些少加啲豬肉做餡，每粒加咗杞子賣相都靚啲，剛巧她有朋友上來，好彩多做幾粒就叫她們一齊食，她的朋友見到話啲燒賣咁得意，個媽咪就講喺自家制，她們都嘩一聲試完都話好味道，用餸子皮做的會比較煙韌啲，有興趣都可以一試，呢個簡單的燒賣都喺有益的小食
冬菇有補肝腎，健脾胃，益氣血，益知安神，美顏之功效
雲耳含豐富鐵質、蛋白質、脂肪和鈣、磷等，補血和抗凝血的作用強，有效防治缺鐵性貧血、動脈硬化、冠心病和癌病。 而且纖維高，能增加腸道蠕動，幫助消化，舒緩便秘問題

蒸好的燒賣要立即食，

凍咗就無咁好味

材料：餃子皮15塊，雲耳5只，冬菇三只，瘦肉$10, 杞子15粒

將冬菇同雲耳浸軟洗淨切碎加入肉碎撈勻

加入1茶匙豉油，半茶匙糖同1湯匙生粉拌勻

撈到黏在一起包時容易

放料在餃皮中間，皮邊搽水無咁容易散

將餃皮摺疊就成

中央放粒杞子

將包好的放入蒸盤

水滾蒸放入蒸15分鐘

蒸好後熄火多留5分鐘，確保肉全熟

家姐同我提早食生日飯在無肉食

今日約在家姐妹出佐敦提早食生日飯，細妹話佐敦開咗間新潮素菜館叫我哋去試，家姐就話請我同阿妹，因為咁啱我同妹都係同一日，因價錢唔太貴就去一試，好失望應該唔會有下次，咁可能價錢平，質數當然都唔會好, 但咁樣價錢就當然無好嘢食，入坐計計個半鐘，我哋去到八點左右，已經唔太多嘢食，原來九點半就完，自己清理餐具因話無加一，如果食我諗七點時間會好啲，因尾段幾本唔會點加嘢，好似西瓜見出一碟就無，以為新潮素食，點知還差過普光齋，全部食物只係菜，雲耳，冬菇，豆腐去變，炸物就好啲，可能新鮮炸起都可以，有白粥，炒麵，糖水同菜湯，但只係食咗幾樣就唔想食同都飽肚，雖然百一蚊唔洗加一，真的全自助，連碟食完繼續用，可以自己換碟就要沖下水放喺清洗盤再攞過只，應該無下次

產後食療之甜豆百合炒豬腰肉片

今日介紹呢個餸，喺可以補腰潤肺，通常我開工幾日就會煮比個媽咪食，通常生月頭幾日喺醫院會食下粥，飲肉汁，開始食飯就會菜心炒肉片，節瓜，合掌瓜呢啲清淡簡單餸，而我就會睇下個媽咪食唔食豬腰，如果食就可以好多配答，今次就用甜豆，鮮百合去炒，簡單好味又有益
豬腰中含有豐富的脂肪、蛋白質、碳水化合物、鈣、磷、鐵和維生素，具有健腎、強腰、益氣的功效
百合有清心安神、潤肺補氣、清熱止咳的功效
甜豆有益脾和胃，和中下氣，除呃逆同有助產後乳汁不下

材料：甜豆4两，鮮百合1包，
豬腰1只，豬肉10蚊，薑幾片

甜豆去絲洗淨，鮮百合洗淨

豬腰買時叫肉檔清理乾淨，回家洗淨切細件

 豬腰同肉片先用豉油，糖和粟粉撈勻

 起鑊先爆薑片加入豬腰同肉片

 先煎香2邊炒到8成熟(無血水)

 加入甜豆

煮熟後最後才加百合炒勻調味就得

晚餐之花螺

又星期日啦終於有假放，一開工就好忙做咗咁工都未試過復活節無假放，轉咗呢行有工開都會放一日，今次就連清明都無得放，今次經agent 而簽約時自己又無跟清楚，自己直接簽就會講明放咩同點放，自己太大意問返經紀話簽約無講明就無得放，算啦下次又有經驗，今日出咗去同老豆，家姐飲茶，以前復活節就日日都有節目，今次無假放就無約人，阿妹請飲茶，此中都喺富臨最底飲，十個人食咗好多嘢又乳鴿，炒粉，點心食到飽飽都喺六百幾，還有乳鴿帶回家，家姐話飽到唔洗食晚餐，我哋就無咁誇張，阿妹上我到還要叫我老公買海鮮，點知老公話無平嘢，花螺都要48一斤，買多條魚就算，是是旦旦又一餐

 阿妹唔食乳鴿，最愛燒排骨