產後食療上奶素湯之木瓜雪耳花生眉豆湯

而家有好多人都喜歡素食，素食的新手媽媽都可以輕鬆坐好月，因為有好多食材都有自己的營養價值，今日介紹呢個湯喺用眉豆代替肉，煲出嚟啲湯喺好好飲而且有潤肺又可幫助上奶，木瓜同花生都有催乳作用，而雪耳有滋潤的功效，如果未上奶就唔好加花生，順產或開刀第4－5日後就可以飲

 材料：木瓜半個，雪耳半只，眉豆大半碗，花生半碗，腰果加紅腰豆半碗，蜜棗2粒，水2.5公升

先將豆類用水浸半個鐘(可有效化氣),雪耳浸軟去硬搾乾水

 木瓜去皮去子切細件

將所有料入煲加入2.5公升水先大火滾半個鐘

半個鐘後轉中細火煲一個鐘

 煲好加鹽調味就飲得

產後食療之增強免疫力之巴戟猴頭菇螺片湯

今次介紹呢個湯水喺有補腎同增強免疫力，生產完通常身體會比較虛，呢個湯喺用些少巴戟，猴頭菇加螺片去煲，味道非常好，每人體質都唔同，產後12日就可以開始加些少藥材去試補，初用藥材唔好太多，如果飲完無咩，下次就可加多些少
巴戟有補腎陽、強筋骨去濕功效
猴頭菇有健脾養胃，安神，又可增強免疫力，而螺片有滋陰補腎，健肝益脾的功效

 材料：猴頭菇3－4只，北芪1片，螺片1大片，巴戟6－8條，杞子1湯匙，蜜棗3－4粒，豬展骨1斤

 先將展骨出水(凍水一齊煲，滾起多1－2分鐘)

 將出好水的展骨洗淨

 猴頭菇用水浸軟後搾乾水

其它材料沖洗乾淨入煲

加入三公升水

 先大火滾半個鐘，再轉中細火煲二個鐘加鹽調味就飲得

晚餐之蒸焗爐燒排骨

又一星期啦，呢個星期隨咗休息，剛老豆又突然發高燒，去到急症室話要留醫，點知喺觀察病房等咗差唔多二日先上到房，好彩有老公同大老輪流喺醫院等，因為又唔知咩嘢事，又無房只有喺度等，呢個假期老公忙在醫院同急症二邊走，我又搞到喺急症等咗一日，我老豆等二日，老爺早前又入咗院，呢二日自己好啲就去醫院睇老爺同老豆，所以都好似好忙，下午去睇老豆，晚上就去睇老爺，啲女返學又返工，晚上好多時得我同老公就是旦食，今晚個個都喺度食，細妹又過黎咁一早煲咗湯，睇完老豆再去睇老爺就去街市買魚，整咗土魷肉餅比細妹，早一晚買咗排骨就醃定，今晚又試個爐加熱風對流，20分鐘就已經好有燒烤感覺，加蜜糖多5分鐘就食得，而家多咗呢個爐真係好方便，蒸嘢一齊又快又唔洗睇火，有時煮完又可放入去保溫，太耐無煮咁多嘢，啲女返黎嘩嘩聲喺咪過年食大餐，真好笑，是實真係好耐無整咁多嘢，開開心心又一餐

今次呢個沙茶醬喺炒羊肉，老公同啲女最愛，我就怕咗啲味

土魷肉餅只係細妹喜歡，家中各人都不太喜歡土魷

阿妹專登買比啲女食

 將排骨簡單用豆板醬，豉油同糖醃

 用蒸焗爐的熱風對流

 20分鐘左右已經見到好靚

產後食療上奶補腎湯之黑豆花生蓮藕豬展骨湯

今之介紹呢個湯，簡單材料清甜好味，又好適合坐月媽媽飲，
黑豆有補腎，明目、烏髮的功效，
蓮藕有健脾養胃、補氣養血
花生有扶正補虛、悅脾和胃、潤肺化痰、滋養調氣、生乳的作用

 材料：蓮藕1斤，豬展骨或排骨頭半斤，黑豆半碗，花生半碗，蜜棗3－4粒

 先將豬骨出水(凍水一齊落)

 滾起後多1－2分鐘去污物，跟住清洗乾淨

 花生同黑豆用水浸半個鐘，有化氣作用

 蓮藕洗淨切細件

 將所有材料入煲先大火半個鐘

 滾左半個鐘就轉中細火煲二個鐘

 煲好可加適量的鹽調味就飲得

晚餐之2018第一餐

今日2018第一日，祝大家新年快樂，新一年最緊要身體健康，開開心心，幸福快樂，過咗一個最寧靜的除夕夜，一個喜歡人多熱鬧的我，因身體唔舒服取消所有活動，只有老公陪伴都好幸福，一個人唔舒服想做咩都無心情做，今晚本來話出去食，但已經成個星期都係是旦食，自己又開始好好多，咁下午就出咗街市買咗啲餸回家先煲湯，再整理下，今次用咗蒸焗爐試將排骨整脆再加個糖醋汁，估唔到效果都唔錯，下次再試做先同大家分享，今晚新一年第一餐就買咗啲鮑魚食，雖然簡單但個個都食得好開心