晚餐之蒜香骨

話咁快又星期日，差唔多坐在喺家一個月，一日過一日雖然好似好無聊，但每日都好充實，大女或老公開工都早起整早餐同午餐盒，搞掂她們出門就再去瞓下，如果得大女返就只係準備早餐，跟住同老公食早餐，跟住就清楚下，而家咁環境就好勤力，老公一日用漂白水抹3次地，我就做下其它，上下綱，煮午餐同細女食，晚餐如果人齊就煮多啲，得我同老公就簡單食，今日啲女出咗去話回來食晚餐，其實喺屋企煮3餐都好忙無咩時間，再覆下啲媽咪WhatsApp時間過得更快，同返工無咩分別，今日整咗嘢比她們食完出去，就清潔下又食午餐，又整下豆漿同麵包搞搞下又到晚餐時間真係好快，二個都返嚟食咁就煲咗個合掌瓜粟子百合排骨湯潤肺好適合而家飲，今晚又食盲曹今次用蕃茄煮，原來又好好味大囡最鍾意，加個蒜香骨，今次就用懶人方法喺焗爐焗熟加蒜茸洋蔥同指天椒去炒勻，唔洗睇火簡單又好味，簡簡單單又開飯

 合掌瓜粟子百合排骨湯潤肺

將盲曹煎香2邊加入蕃茄煮好再加鹽糖調味

呢個懶人做法的蒜香骨

材料：金沙骨1斤，洋蔥半個，指天椒1只，蒜茸2湯匙

 排骨入焗爐230度焗30分鐘

 先爆香洋蔥

 洋蔥有香味就加入蒜茸轉中細火爆蒜茸

跟住可加入排骨炒勻後加入鹽糖同指天椒炒到有香味就搞掂