晚餐之大蝦乾炒勝瓜

開工差唔多個多星期，每日都好忙，晚晚都遲成個幾鐘先收工，早二晚收工見唔太夜就去剛完工的媽媽家，因為唔知點解塞咗，見她好擔心就過去睇睇，做咗按摩叫她配合飲我之前準備的茶，好開心知道她無哂事，而家剛開工的媽咪本來出院按咗二日已經可以好順利出50-60ml，點知呢二日又無啦啦塞咗囡囡食唔夠隔日就去健康院跟進，所以更加忙囡囡喺食到，媽咪奶量未順又堅持唔餵奶粉，可能因太攰埋身少又無咩泵，呢二日又再按同配合湯水，叫她盡量密密比囡食同泵出嚟，希望明天去健康院一齊順利唔洗再去可以比個媽媽休息一下，個媽媽太緊張又瞓得唔好，又怕呢樣又怕果樣，其實餵人奶的媽媽一定要有足夠休息，放鬆心情，煩事向好的諗，太負面的事盡量睇少啲咁就事事順心，一開工晚晚夜返同老公又係一煲過是旦食，今晚阿囡話返嚟食，雖然7點都試下去街市有冇嘢買到，她彩買咗盒鹵水鴨同些少魚同瓜菜，諗住3個人就炒少少菜蒸魚，點知細囡話老師早走，她都可以回來食，拿拿淋浸大蝦乾加條勝瓜又多個餸，快快手手唔洗一個鐘簡單四餸一湯開開心心又一餐

早餐多款迷理包配咖啡

晚餐之乾魷乾蝦炒西蘭花

又到星期日，開工幾日好忙，新手爸媽都比較緊張，出院第二日又去健康院，初次去就幾個鐘，因為去到先登記再填資料，跟住就等磅重，見姑娘間間都有些少唔同，如果即日見埋醫生BB無咩特別，黃又降到合格指數就安排一個月左右返去打針，但如果黃未底過指數又未需要照燈，一般就會安排下星期再去多次睇黃，但今次呢間健康院就分二日, 星期一先見醫生又要去多次，希望睇完達標咁就可以等打滿月針先去，媽咪就可以休息，今日又一樣早起去買湯料，煲好湯又去老豆到飲茶食午餐，搞掂晒就買餸回家，早幾日叔仔一家返大陸玩，他老婆專登買咗大只蝦乾同魷魚話喺生曬，今晚就立即浸咗只魷魚同十幾只蝦去炒西蘭花，真係好鮮味唔太硬，魷魚浸完好似新鮮魷好好味，一開工時間預唔到，回家都好夜通常簡單一煲過煮粉麵，今日假期當然煮返餐，炒個女兒喜愛的牛肉蒸魚煲湯開開心心又一餐

啲蝦乾好大只，我自己一定唔舍得買，
哈哈哈

晚餐之蝦球扮蟹鉗

好開心明天開工啦，時間過得好快休咗唔夠二星期，個媽咪喺8號平安生咗6磅半重的囡囡，呢個BB好得意，今日約咗舊同事午餐，雖然放咗十日左右但日日都好似好忙，有媽咪塞奶又去睇下，有媽咪要覆診BB無人睇又去幫手，就喺咁忙忙碌碌又正式開工啦，阿囡send條整蟹鉗的片比我，一定又喺想食啦，見未開工同同事食完午餐，太耐無見一傾又幾個鐘，四點幾先走，拿拿淋上街市買咗菜，蝦回家煮返餐，開工後又會好忙，買咗蝦無時間去搵蟹鉗就用甘筍扮蟹鉗，將蝦去殼去腸洗淨拍平啄碎調味做蝦膠，用甘筍釀入蝦膠再上麵包糠用焗爐焗，今次好成工唔洗用油炸炒菜煲個節瓜湯，阿囡回來見到好開心，話今日比你睇今晚就有得食，我話唔係你想的欠些少，但囡囡都話就咁睇好似，但都好好味唔油膩，簡簡單單又一餐

節瓜湯用燒豬頭湯出奶白似魚湯，個個話好味

老公攞咗4只有機茄子，阿囡話新鮮食咗先，咁簡單開邊加蒜茸味道非常好

 有幾塊魚柳就順便焗一焗

 焗爐用230才有炸金黃的效果

二人晚餐簡單一湯一炒米

話咁快又休息咗幾日，每日都唔知忙咩，其實我最喜歡在家睇下書，食下飲下好快又一日，本來放假會去探啲媽咪同BB,但十月個媽咪好緊張，已經定咗8號入院開刀，但感覺會早好怕好擔心，我就話放假等隨時開工都無問題，如果突然早隨時可以搵我去幫手，所以都唔咁去邊因為我有個習慣去探啲媽咪都會唔用電話，所以都唔咁周圍去，呢二日都喺同家姐一齊食午餐，她知我放假就會叫我幫她買嘢因為湊住個孫好唔方便，而家個孫大要返學更唔方便，因為每朝都山長水遠過香港，家姐就喺附近坐到夠鐘接回家先同我食午餐，而家啲小朋友真係好辛苦，返完學又要趕另一邊學嘢真係好忙，同家姐買咗嘢食埋午餐就回家，坐下又5點今晚得我同老公食，就整個簡單芫茜皮蛋鯇魚豆腐湯，再炒個老公最愛的星洲米，簡簡單單又一餐

 簡單滾個有魚有菜的湯又方便又好味

 好似無料的星洲米，其實有蝦有蛋又有肉

放假的晚餐

又星期日啦，雖然昨日完工但星期日都喺一樣，早起買湯料煲湯後就出老豆到，每個星期日都喺帶湯過老豆到同他食午飯，搞掂完就回家買餸煮晚餐，忙咗二個幾月之前返天水圍接住返土瓜灣，返天水圍就車程太遠來回3-4個鐘左右，所以每日都早出晚歸，隨咗老公早休有時間或星期日先3餸1湯，跟住做土瓜灣車程唔遠，但就時時塞車最後都係早出晚歸喺因為個BB太有精力搞到他們唔夠瞓無精神，咁我又盡早去幫手等她們可以休息，連做二個幾月無休息，真係要好好休息幾日，跟住又等十月媽咪生完又開工，今晚阿妹過嚟食，她好想食涼瓜炒蛋問得唔得，當然無問題簡單嘢，再加個她最愛的茄汁蝦，阿妹好開心話好豐富，其實都係一餐，最近要大家開開心心食一餐