晚餐之碗仔翅配什絲炒檬粉

今日好開心應該好快開工啦，今早接到太太通知開始陣痛安排入院，每個人陣痛都唔同，之前有啲痛咗三日最後開刀，有啲一日順產，最辛苦喺痛咗幾日都未開最後要開刀，但無論點最緊要大，細平安健康，呢個媽咪好褔氣入院唔夠6個鐘就順利生咗個3.28KG, 大細平安健康而且媽咪精神還好好，大女whatapp我問媽咪我好想食碗仔翅今晚整到嗎？又問今晚會煮咩，而家還未開工想食咩都整到，咁就整碗仔翅配魚肉，炒個檬粉，雞翼，雖然咁小食都要有個菜同魚，女兒放工時她話同事知道有碗仔翅問上嚟食得唔得，當然無問題，咁就立即煮咗先，幾個細路食下食下只淨些少，好彩都夠今晚做湯，開開心心又一餐

晚餐之鮮檸蒸烏頭

今日在家無所事事，走咗去官塘買餸，真係好平十蚊有五個檸檬，買咗條烏頭返去用鮮檸檬蒸，此中自己蒸的烏頭覺得好味啲，老公話上次泰菜的烏頭就好差，可能食唔慣而我就只食自己蒸的烏頭，出街我自己多數唔食，因怕有泥味，又買咗啲好似油麥菜的話喺香菜，個焗爐又出咗問題攞去整，見好耐無整中式包，就用咗些少香菜去整菜肉包明天做早餐，做咗麵糰煮好餐飯，時間差唔多就啦啦淋包好去食飯，估唔到食完飯啲包發到好大，啲牛油紙又唔喺幾得，個個黏埋一齊，雖然樣衰衰，但味道都可以，剛食完飯老公都話要試個，女兒又食個，好快又唔見咗幾個，哈哈哈最開心就係咁

晚餐之香煎蓮藕餅

時間又過一星期啦，呢個媽媽還未有聲氣，真係好多嘢都難估計，之前差唔多個個都早一至三個星期，咁我的期就亂了，我已經預得好鬆，通常休息二星期就開工，但這幾次就亂曬，有時休息成個月，好似今次之前媽媽早咗十幾日，咁我就早十幾日完工，已經休咗差唔多一個月，今個媽咪又遲到現在還未生，剛通知她的預產期又遲幾日，現在擔心五月的媽媽，希望準時或遲唔好早，如果唔係真係唔知點算，剛開始做時好順利每個媽媽都早，咁我就差唔多休幾日就開工，又不停有job, 但近呢半年好亂有遲二，三星期，又啲又早三個星期，搞到有啲做得三個星期唔到一個月，所以呢行老師講得啱如果要供樓就唔應該做，好彩我就半退休態度去做，我只希望令到每個媽媽都有健康身體，bb又開開心心活活潑潑，最開心喺啲媽媽周不時send 啲仔仔，囡囡啲相或影片比我，我就好開心見到他們個個精靈活潑，有時都會去探她們，最近都喺忙家訪同探舊媽咪同啲仔仔囡囡，有時又睇下書上下綱增加呢方便的新資訊，今日家姐同細妹過嚟食飯，咁就煮妹妹最愛的茄子，家姐的煎蓮藕餅，原來呢個藕餅整比我湊的媽咪，喺家喺好少整，啲女都話好好食，哈哈有時間要整下啦，大家傾傾講講，說說笑笑好開心的一晚

同親友晚餐在九龍城黃珍珍

呢幾日放假，老爺班兄弟姊妹同啲仔女到港遊四日三夜，租咗酒店喺沙田帝都，之前二日就先聚下食飯暢談，去啲近地方一遊，今日老公租左旅遊巴港島一日遊，行程好急早上先到車公廟，黃大仙同庤蓮淨院，午餐就回爺家附近酒樓，下午就到山頂，淺水灣同金紫荊廣場，因星期六難搵食，晚餐諗住喺帝都自助餐，但有長輩反對話食唔到又浪費，最後姑姐提議出九龍城食泰菜，叫咗個12人餐$3200左右，但17個人連二個小朋友，諗住唔夠另加可能唔太啱食她們就話夠，好似二款柚子大蝦沙律同木瓜絲沙律就無人食連小朋友都唔喜歡好浪費，但呢個餐都好夠食，食得飽部份食物都幾好，招呼都唔差，因有老人家同小朋友，好多辣嘢都幫我哋改唔辣或好少辣，蝦同法包個個都話好食，雞味道幾好但肉質感覺唔太新鮮，芒果炒飯都好好味

呢個大頭蝦酸酸甜甜，個個話好食，我就無食到

 燒雞配南乳醬，但唔點都夠味

 串燒最啱小朋友，好快就清哂

咖哩蟹配法包，個個話淨食個包都好好味

木瓜絲配生菜，就無人啱食，只有自己食

 個拼盤應該好啱食，好快就無哂

明爐烏頭雖然好鮮甜，但都無咩人食

呢個泰國椰菜心好特別，我就好喜歡

馬拉盞通菜轉咗豆漿炒，老人家好喜歡

柚子沙律酸酸甜甜，但唔太多人喜歡

 芒果炒飯好特別，個個都話好

 最後甜品就太少，試唔到太多

豐富晚餐提早迎元宵

話咁快又完成一個job, 雖然呢個太太無收工利市，只有一封簡單的信，對我嚟講有一封信已經好足夠，無論內容怎樣都喺出自她們的心，我每份都認真做希望每個媽媽都可以有好的身體，bb 健康成長，完工前已準備咗五，六十個湯包，但還有藥材淨個媽咪都想我幫她整理好，最後幫她包多二，三十個，又幫她整理廚房的櫃，之前真的好亂，小食，藥材，礶頭.......等，幫她分門別類，搵嘢就一清二楚，雖然唔係我的工作，但對我嚟講無所謂，能做的都盡量做，今日放假啦又準備下一個媽媽，約咗明早家訪，就準備炒米茶包送比新媽媽生完立即可以飲，跟住就買餸，二個女今晚都有時間回來食，咁老公放工又買咗好多餸，話人齊提早過元宵，大女的同學到訪帶來湯丸，飯後甜品就好豐富的薑汁湯丸有苧丸，南瓜丸，芝麻同花生湯丸，好開心的一晚，傾下，食下，講下又11點

 三杯雞

 海鮮雜菜煲