陪月班第二十四日晚餐之鯰魚茄子

今日喺最後一日考試日，二科筆試加面試，雖然老師話好簡單，但我都好緊張，雖然考前已經去完廁所，唔知點解到開考又好急好想去但都唔可以行開，要做完才可以叫做順利完成，只希望合格等26號出去考實習試，考完個個心情好好成班人上咗一個同學家，我同二個同學去買餸再上去煮，有啲已經開枱，我就同幾個喺廚房煮，好快就搞掂邊食邊玩好開心，四點幾我就同幾個要趕回去煮飯的同學先走，今日預咗同啲同學去玩，昨晚已準備咗部份餸今晚只喺買咗魚就回家，回去太夜只買到鯰魚，返去加只茄子同洋蔥煮煮原來都好好味，炒菜蒸魚又蒸雞又開飯啦

讀書後都無時間觀念，咁快中秋啦，見到街市好多芋頭買咗返來蒸，老公最愛

今日午餐喺同學家煮的午餐，都好豐富有二條大紅鰂，菜心，醃青瓜，脆瓜炒什菇，干炒肉片河，蒜茸什菇魚片炒麵，蒸栗米，薑蔥蒸雞，每人都喺$25個個好開心話好底，平過去759食

陪月班第二十三日的晚餐之脆瓜秀菇炒排骨

今日上堂喺最後一堂，明天最後一日就喺考試日，今日教點樣面試，要注意啲咩由頭講到腳，最終都喺要清潔整齊，面試前要先準備....講下笑下又放開，可能還有2日就完哂，大家都好唔舍得所以今日13個同學一齊食午餐去咗飲茶，因為昨天好底食，大家都想試我哋好誇張食咗46樣嘢，每人$68食到飽還食淨，傾下講下又各自回家買餸煮飯，今日細女話回來食就拿拿聲去買料先煲湯，都喺炒菜蒸魚加多個脆瓜秀珍菇炒排骨，簡簡單單又一餐

我哋好誇張，放到成枱都喺

陪月班第二十二日的晚餐之蒜香炒意粉

今日都喺返半日，講下點樣登記做工有咩要注意，唔同公司的收費，學校還安排咗一間Agent來同我哋講解，還即場面試睇下我哋岩唔岩做，跟住Ms又教下未教完的，話咁快又放學，跟住同幾個同學去咗飲下午茶，哋6個人食咗好多嘢都喺$47個個話好底，食下傾下又四點又返家買餸，今晚買咗節瓜，排骨，菜同魚，返到去大女話好想食意粉，咁又去摷下有無意粉，簡單用火腿，洋蔥炒，個排骨就留第二晚，滾咗個節瓜湯，炒菜蒸魚又食得

哩個意粉味有八成似Pizza Hut 個香蒜意粉，好易整最主要喺用蒜鹽去煮，下面簡單講，有興趣可以試下

材料：意粉半包，火腿2片，洋蔥1個，細甘荀1只，蒜鹽1湯匙，香草1湯匙
先將洋蔥去皮洗淨切條，甘荀去皮洗淨切絲，火腿切條，意粉先出水煮軟

 先爆香洋蔥

 洋蔥有香味就加入火腿，甘荀炒

 加入意粉炒勻

 加入蒜鹽同香草試味

 炒勻就食得

同老豆提早過中秋在AOK

又到星期日，今早七點幾起身煮咗麵比細女食完出去，我就清潔下就等老公起身食咗些少嘢就出去奶奶到，再約啲女飲下午茶後就去老豆到，今晚約咗家姐，細妹同阿哥一齊食飯提早過節，今次只喺在老豆家樓下的AOK叫餸食飯無去酒樓，因淋時缺定無訂枱又唔想同人迫，叫咗8個餸有飯有湯同飲品，埋單都喺$540左右都幾底，啲嘢都好好

 啲女最愛的椒鹽鮮魷

 阿妹最愛的魚香茄子

 大哥最愛的西蘭花炒班塊

老豆最愛我豆腐班腩

 家姐最愛的咕嚕骨

我最愛的牛根腩，但味道就普通而且無咩根，配菜太多，姐夫都話差

 沙薑雞

 豉汁蒸槍魚

完成陪月課程第二十一日晚餐之涼瓜肉碎炒蛋

時間過得真快，下星期還有三堂就完啦，最尾個日就考筆試，完左就有二日比我哋返去做實習，跟住等月尾出去考先真正完，如果唔合格補考就要再等，今日返去都喺做實習，主要教我們的老師今日最後一堂，我哋同老師喺759食午餐，多謝她過去十幾日的悉心教導，老師好開心覺得我地好乖而且成班都好合作，最後同學還買張咭，全班簽名又寫祝福語還有二張大合照，快樂的時間過得特別快又放學，我都忘了星期六，收到阿妹話上來食，咁就去買餸叫我整涼瓜炒蛋要多啲可打包回去，咁買咗二只又覺得太多，最後用左只半，炒菜蒸魚又食得啦

材料：涼瓜1只，豬肉$10，蛋6只，薑茸同蒜茸各1湯匙

 先將涼瓜去子，豬肉啄碎

 去子的涼瓜先用鹽搽勻

 等幾分鐘就見鹽溶哂濕濕地就刮去白色煮出來就唔會苦，沖洗乾淨切片

先白鑊旱乾

加入些少油

加入豬肉同薑蒜

炒熟肉就試味

將蛋發勻加入

煎到二邊金黃就食得