晚餐之麻辣金菇腩片

今日轉新餐第一日，煮菜干栗子粥，素火腿炒米，蒸腸粉同炒椰菜，每次煮什就辛苦過煮餐餸，但最開心就喺啲仔，今日有個仔去廁所時見到我就專登同我講，啲米粉同粥好好味，我食咗二碗粥同二碗米粉，而另外8室細d仔女有啲食唔到第二次米粉就同我講，話啲米粉好好食想食多碗都無，叫我下次再煮多啲，我就話已經煮好多，好啦下次煮多啲，每次見啲仔仔女女食得開心真係咩野唔開心都會唔理，好啦繼續努力雖然啲人今日繼續玩野我都好少理，差唔多放工時自己啲野都未做哂，好彩花姐幫手，只係遲咗幾分鐘走
今晚返到家淋住唔洗買餸，以為得我同老公食，點知大女打比我話會返來食咁就去睇下買啲咩，之前打邊爐有金菇淨就買咗芽菜同腩片返去煮過沙爹金菇，點知無哂沙爹醬就用咗些少麻辣醬炒出來一樣咁好味

晚餐之二姐送來的靚牛扒

又到星期日啦，可惜又無得瞓晏啲，因女兒要開工早起叫醒她，整些少野比她食完出門口，跟著就出去攞位同喺加拿大剛回來的老師同部份同學茶聚，可能太耐無見，傾下食下又幾個鐘，老師同啲同學都唔想走，出咗酒樓還在門口講唔停好開心
回家已經差唔多四點就去買餸，返到家才知二姐買來牛扒見我不在就走了，女兒就最開心姨媽帶來的牛扒，今晚就簡單煎香加岩鹽同黑椒就食得

晚餐之乳豬，燻鴨配什錦煲

今日雖然星期六都要返工，以為今日會好得閒，點知被人插到好多野都要再做，我喺唔喺真係唔適合做哩份工，家姐話我轉咗工後從未開心過，我自己又唔覺只係唔明點解啲人可以咁勁，咩嘢都可以屈而且咩嘢都做得出，哩個世界是否真的人善被人欺，我唔出聲唔代表我無火，啲人想我走無咁易，我一定會比心機繼續喺到玩，玩到真係頂唔順就走，我真係好希望自己能頂得住
下午又去老豆到飲茶，回老豆家清潔煮飯例牌工作，今晚要等老公來換燈搞到七點幾，本來話唔煮返去同啲女出街食，點知老公就唔想，咁就打返去叫女煲定飯，返到家好快手滾個什錦湯，焗返脆啲乳豬，是是單單又一餐

2016年第一晚餐

今日喺2016年第一日，在這祝大家新年快樂，身體健康，事事順利
昨晚成班同學倒數完就清理搞掂完都三點，今早都唔想太早起身，但又要出沙田車公廟，再去奶奶到回家又五點啦，今日只係買咗菜同魚，因為有乳豬，又係奶奶到攞咗啲燻鴨，阿妹又話上來熱鬧下，帶咗二盒壽司來啲女就最開，邊食邊講又過咗開心的一晚

2016年

祝大家新一年，身體健康，事事順心