喜歡煮食的我, 每日開心煮和大家分享每一餐
每年結婚週年都會約班同學回家打邊爐慶週年，呢幾年疫情唔好話慶週年，連啲小朋友都無得返學，做嘢都會安排在家工作，今年頭突然又勁咗，而家又好似放鬆哂，希望真係可以控制，大家可以好似以前一樣想做咩都可以，輕輕鬆鬆幸福愉快過每一天，昨日正日同老公最後約咗放工出去食飯，諗住去返以前想食扒就一定去的花園餐廳，點知原來全線結業真係好可惜，咁周圍行去睇下邊度有得食扒，最後去咗意樂，雖然好差得同老公都食得開心，今晚去咗百樂食自助餐，呢間又喺我哋差唔多每年都會嚟的地方，呢2年無得嚟，今次放鬆到可以8人就叫埋細妹同阿囡朋友，太耐無咁多人一齊慶祝好開心，今次主題又喺我最喜歡的蟹宴，其實有長腳蟹就足夠，有麵包蟹而家返大埔，已經同媽咪講最遲6點走，差唔多6點搞掂叫姐姐跟我就換衫走，7點幾到老公已準備一大碟長腳蟹肉比我去到就有得食，因為生日優惠有個好細的蛋糕仔就一齊影相，傾下食下又夠鐘好開心的一晚
每人一個的蟹蓋配鍋巴
老公為我準備的蟹肉
33週年老公送的花
唔經唔覺同老公踏入33個年頭，33年唔算好長應該都唔短，但到今日仍然覺得唔喺好耐，一直大家都開開心心，雖然都有唔開心的時候，但多謝老公一直陪伴著所以好快就無事，今晚本來同囡，細妹出去食返餐慶祝一下，點知大囡原來有嘢做今日唔得，咁改咗明晚先同我哋補足，原本買嘢回家食，老公提早昨日買咗花，每年都喺一扎花咁多年都無變，今年就特別唔係玫瑰而喺太陽花都幾靚，因為太夜啲玫瑰唔靚所以買咗太陽花，咁啱BB又12朝，公公婆婆一早帶來好多嘢送比囡囡同孫囡，好特別有蕉，有開心果，薑醋，豬腳，雞蛋利市，當然都唔少得我，一包開心果加一個利市，感覺好開心託BB福有禮物收，今晚同媽咪講咗6點前一定要收工，因為要同老公食飯慶祝，最後都係差唔多6點半先走，約咗老公出街食，因為細女突然要開會唔知幾點返話自己搞掂，叫我同爸爸出去慶祝咁我哋都係去返官塘花園餐廳，以前想食扒都喺去花園，返到官塘已經7點半，老公就喺街到等話無所謂叫我唔好趕反正我哋2個邊度都得，之前唔醒目應該叫老公去搵位先，我到咗去搵就可以，有時就喺咁原來全線結業都唔知喺幾時的事，我哋太耐無出嚟多數都喺去啲熟的地方，去到先知咁就諗住睇下邊度有類似的餐廳，行行下見到意樂記起幾年前喺長沙灣返學如果趕得切6點到就一定入意樂食個餐先去上堂，呢間門口的餐牌都有扒食就入去一試，坐低叫咗2個餐可加小食，叫咗好多嘢食唔哂就打包，老公話都唔係好多應該唔需要，最後打包咗排骨覺得好生，但她們話喺咁最初個伙記話換過份，但最後都無另一個話喺咁，我老公話算攞返嚟，雖然出咗些少問題同老公都食得好開心，希望我哋繼續開開心心過每一日每一年
我哋覺得唔熟，她們話喺咁，本來攞走一件話問下，轉頭收咗份餐話換過一份，後來另一個攞返件過嚟話喺咁無問題，果件已經唔知用咩嘢碟裝我哋話唔要，老公好蠢話算攞返份餐回，最後再切都見到紅無食
開工幾日都好忙，路途搖遠，呢幾日都好忙，如常每日都喺5點幾起身整早餐同午餐盒比老公，通常都會返瞓到8點就整午餐盒比女兒，但而家開工就睇情況，第一日開工就準備埋大女午餐盒就準備自己食完早餐就出門，今日星期日本來諗住同老公去海洋公園慶祝，生日免費但最後就同老公去咗食放題，祝老公日日都開開心心，健健康康，2個女都唔得閒晚上買外賣回來慶祝同食生日蛋糕，最後因為我哋改咗午餐食放題就叫啲囡唔洗買嘢返嚟只係食蛋糕就可以，去到好多人好彩都有位，太耐無嚟太多人價錢好似貴咗但食物種類又多咗，老公出去攞咗冷盤蝦同蜆，我就無出去叫回來的種類每樣少少都食唔齊，魚生今次麻麻，蝦唔太新鮮只係食咗幾樣都無再叫，太耐無食咁多嘢實在太飽，甜品雪糕我都無食，只係老公試咗水蜜桃果子同牛乳布甸，見到隔離枱好食得最後個男人一次過可以食咗4-5支雪條真係好勁，本來都諗住食返杯雪糕，最後都喺無食，唔想太飽太辛苦，我喜歡食自助可以食好多唔同種類食物，每樣食啲好滿足，晚餐同老公都唔需要再食，就諗住簡單煮比啲女食，她的想我休息自己買嘢返嚟食同買咗個超級靚同好貴的生日蛋糕，話好多人買訂咗去攞都要排隊真係好誇張，但又真係幾好味同幾特別，老公最喜歡的，開開心心又一日
今日原來喺立冬，有個嫲嫲一早whatapp我話今日立冬未開工有時間就煲個湯，之後又收到個媽咪通知剛入院催生如無意外星人四出院，咁應該星期尾就開工，見未開工又唔知幾時就約咗老師星期四同2個同學出嚟聚下先，開工就難約要安排只得星期日，剛收到消息就立即通知她們取消，又唔知幾時再約，希望老師回加前可以安排到，搞掂哂屋企嘢就出去行個圏順便睇下煲咩湯，剛煲完蟲草雞就唔想再煲雞，睇下有咩買，可能入冬見到周圍多咗好多羊賣，見到都幾靚買咗2磅，諗住買埋白蘿蔔煲清湯羊，點知最後都買唔到，平時買開3-4蚊斤，今日啲蘿蔔唔靚，靚就要9蚊斤又覺得唔值，諗住返家樓下的超市點知都喺唔靚買唔到，最後就用咗沙参玉竹杞子元肉紅棗羊肉湯，煲完湯就簡單加啲烏冬一齊食同飲，加多個菜就搞掂，點知大囡話好忙會夜唔洗留，細又話會夜回來再睇下食唔食，最後我就將湯留起，將羊攞出嚟加啲水煮咗麵同老公2個食就算，返熱埋雪櫃入面之前的乳豬同雞，簡簡單單又一餐
