又到星期日，今日可以在家休息一下，但都喺好早起身同老公食個簡單早餐，跟住清潔一下睇下電視上下綱，雖然休息但都自己攞嚟忙，煲粥整燒賣同煮豆漿做麵包又忙一日，昨晚老公買咗新鮮鮑魚，因為一煲過煮麵食就無煮，跟住就將鮑魚洗淨去彀用蠔油冰糖同2只指天椒全部放入飯煲炆30分鐘，出嚟口感煙韌好似乾鮑炆出嚟一樣好好味，今晚就將它加入冬菇煮非常好味道，輕輕鬆鬆又一日
喜歡煮食的我, 每日開心煮和大家分享每一餐
2020年8月30日星期日
帶子蟲草花冬菇雲耳豬肉燒賣
時間過得好快，開工2個星期啦，每日都好似好忙，回家又夜食完飯整理明日的早，午餐料後就瞓覺，因為第二日又早起，開工頭二日都好忙，大家都要適應同教媽咪點樣餵人奶，換片要注意咩，沖涼有咩注意又要睇下媽咪有咩唔舒服再配合一些啱食的食物，每日都會有湯同燉湯，而我喜歡自己整啲小食比媽咪飲燉湯時食，有好多唔同種類的小心，全部都喺啱媽咪食，等她們開開心心坐月，燒賣都喺其中一款，家人都未試過，今日放假就準備材料整咗呢個帶子蟲草花燒賣，簡單又易整，只係將自己喜歡的材料切碎或搞碎再加入豉油，糖同生粉撈埋就包得再蒸10分鐘就食得
調味：豉油1湯匙，糖半湯匙，生粉1湯匙
先將全部材料洗淨，冬菇同雲耳浸軟
將材料切碎或搞碎後加入調味再搞勻就可以包，（如果喺方的雲吞皮就要收剪到圓先容易包同美觀
2020年8月15日星期六
晚餐之老公煮完工豐富海鮮餐
今日順利完成2個月的陪月工作，老公都要返工諗住買外賣回家，雖然呢幾個月多咗食外賣，因為每晚回家都8-9點，老公都要返工，啲囡又多數在家食，好多時老公會煮但他話日日都喺果啲嘢，他又唔識變咁各自會加啲外賣嘢，完工想買多啲食得豐富，點知收工時睇到老公話今晚買咗魚，蝦蟹，叫我哋唔好再買，返到去已經煮好，真係好豐富已經有大半年無食蟹，老公好舍得買咗2只肉蟹，我喜歡食但要有時間慢慢食，今晚就可以慢慢享受因為明天休息，咩嘢都可以留明天做好開心老公煮得好好味，傾下食下就成個鐘有出去食自助的感覺，開開心心又一餐
又順利完成2個月的陪月工作
今日last day啦，時間過得好快，唔經唔覺又2個月，雖然好唔舍得但都要完工，下星期又返另一個媽咪度，希望媽咪同仔仔都健康幸福過每一日，今日又喺忙碌的一天，因為幫媽咪準備好未來30日的燉湯，炒米茶包，而家喺補足100日明天同後天的早午晚餐，本來呢個媽咪想我做多一個月，但8月中的媽咪已經好緊張，怕自己早生話如果到時早可唔可以早啲完，我話到時再算叫她安心，本來做到媽咪入院先完，但我都想休息一下同想媽咪習慣下，我未開工有咩事都可隨時過去，呢個媽咪有工人，可惜好差唔知喺咪而家環境問題，她們唔怕無得做，我做咁耐有工人姐姐做得唔好，但都唔會咁吋以為自己好了不起，自己想點就點唔聽人講，教她可以覺得自己識哂唔需要聽我講，話她就黑面，呢二個月見她最多就係食，瞓，講電話，最令我唔高興就同朋友視像都要BB同人視像，我知她好唔喜歡我，黑面叫她做咩都無反應，所以我都無直接話她，幾次見到抹抹下地突然就去襯BB的面，我話她無理我，最後轉個彎叫媽咪唔好直接襯BB面部，因為BB面容易敏感出粒，之後見她就攞只腳嚟錫同影相，唔知點解我接受唔到，我做咗30幾個BB都從來唔會錫面，抱時都盡量唔接觸到BB面，但都無法只係叫媽咪快啲裝camp，呢個媽咪好好都唔介意呢個工人還以為她錫她怕她種壞，個媽咪成日喺房瞓跟本就咩嘢都睇唔到，她好醒目，每日我到她就入房或廚所講電話或瞓覺，知道個媽咪就嚟出就會好勤力抹嘢，還有想食咩都得，最慘喺食咗又唔講，我想煮時又無，已經同她講食咗出聲，可惜唔會理我，最好笑個媽咪又怕她多嘢做太辛苦，有次老爺奶奶上嚟食生日飯，我已經準備哂餸，煮得盡量煮，只係炒菜蒸魚留比她，第二日回去個媽咪同我講可能企得太耐好攰，可能太耐無試過，問完先知姐姐話唔舒服咁個媽咪叫她休息，自己去清潔廚房企咗成個鐘，唔係個媽咪講都唔知她有病，我去到見她食2只蛋，又煮麵食之後入房瞓，有病點會咁好餵口，總之都係太好人令到呢個姐姐無大無細，希望我完工後好啲，估唔到今次講得太多無謂嘢，講返呢個BB真係好叻又喺開心果，好好玩而家已經識搵人玩，聽到有人同他講就不停好似回應咁好搞笑，好食得差唔多4個鍾左右食160ml，而媽咪因為剛生完有好多問題，已經處理好，開始做奶，呢幾日差唔多都全人奶，所以好開心又成功搞掂全人奶，其實主要都係媽咪想餵努力就一定得，我只喺配合，搞掂好一齊交代清楚後收到媽咪的信，利市同婆婆都有比利市，好開心多謝她們後就換衫收工
媽咪好有心機的信
又係一個成日開開心心成日笑的開心果
訂閱：
文章 (Atom)