晚餐之芝士焗大蘑菇

又星期日啦，話咁快又做咗2個星期，今日唔洗咁早起，但可能習慣咗，都係拖到9點左右就起身雖然可以瞓晏啲但個個又在家，同老公食咗簡單早餐，清潔下就去煲咗個燒鴨粥, 準備定啲料等二個囡起就炒麵，炒腸粉同煎餃子，食完豐富午餐就同老公出去買嘢，雖然我日日出去但早出晚歸都買唔到嘢，而家老公又唔洗日日返，而家呢個環境2個女都在家晚餐多，大女都係一星期2-3日返公司其餘時間都在家工作，所以都買定幾日餸，今日出旺角攞嘢順便喺旺角買餸，真係好多嘢有啲都好平，又見到大大只帶子，上次老公可能唔識點整覺得麻麻就話唔買，但我覺得好抵終於又買咗都喺蒜茸粉絲蒸，又見到好大只蘑菇15蚊2只就買咗2包，本來阿囡話今晚想食西餐，又話要食越南炒金邊粉，見買咗帶子同魚咁就唔整西餐，但就炒咗個金邊粉，下次放假買齊嘢先煮，煮煮下又好多樣，大家又開開心心食一餐

 蒜茸粉絲蒸帶子

 芝士焗豬肉釀大蘑菇

 扎肉炒金邊粉

薑蔥蒸白鷹倉，而家做緊的媽咪最愛，但我就麻麻，感覺好腥

 食淨的燒鴨起骨煲粥

 韮菜煎餃喺全家最雞愛

 豉油炒麵加椰菜同雞絲

本來想用雞絲加椰菜做腸粉去蒸，老公想食XO醬炒，咁就簡單加肉絲同XO醬炒一炒

昨日為媽媽準備咗簡單午，晚個人餐同五指毛桃雞湯，上星期有老公陪就準備咗2個菜加3個蒸餸方便她們容易處理，今次得媽咪一個就更簡單，洗好米放哂啲餸喺飯面按制就搞掂

 原個蕃茄排骨同西蘭花

 杞子豬肉釀節瓜，肉片配白椰菜花

其中一日，啲囡話叫外買，叫咗沙爹皇，呢餐差唔多400，太耐無喺街食嘢唔知價，老公覺得好唔值其實差唔多，以前出去食都喺要4-500蚊，個個都最愛白咖哩豬扒飯，今次叫咗2個白咖哩，加咗2塊薄餅配黃咖哩汁同一個軟腳蟹

 有日細女出去上堂，話好想食又買回來

呢個漢堡包加薯條，阿囡專登買回來比我試，我原全唔覺得有咩特別，老公都話同麥當勞的漢堡無咩分別，$135呢個價錢喺M記可以食幾個巨無霸，反而薯條就好味啲，但50幾蚊就唔值

媽咪出院頭星期一定喺燉肉汁，會配唔同種類的小食，呢個喺自家制菜心豬肉餃子

以前30蚊豬肉就有一碗，而家買60蚊都燉唔到一碗，啲豬肉真係越嚟越貴