網頁

2023年1月22日星期日

農曆大年初一

今日大年初一,祝大家兔年事事順心,健康幸福快樂,今日應該瞓到自然醒,昨晚一家人行完回家已經大年初一,以前同奶奶一齊住大年初一第一口一定要食齋,通常都會準備定,而家自己本身早餐都喺素所以都無特別準備,今年特別開心幾年都疫情下度過無氣氛咩嘢都做唔到,而家放鬆哂周圍都好熱閙好開心,早上同老公食咗簡單早餐就出咗沙田行大運,11點幾個媽咪通知BB出得院,本來昨日早上已經喺到等但出唔到,諗住大年初一都應該唔會無準備,同媽咪講完搞得掂就唔過去,因為午餐約咗囡囡同她的朋友在家食午餐,最後食完午餐都過去跟一跟,一去就搞到8點幾先走回家已經9點幾,一家都堅持等埋我先晚餐,晚餐只喺返熱年30晚的盤菜加咗娃娃菜,簡簡單單又一餐,明天唔需要開工夜啲都無所謂,咁就過咗大年初一

簡單的午餐

第一次煎齊咁多糕,蘿蔔糕,芋頭糕同年糕

阿囡朋友帶嚟的撈撈同黑松露餃子



桂花椰汁糕


同老公的早餐




2023年1月21日星期六

晚餐之豐富盤菜團團圓圓過年30

今日年30同大家拜早年,祝大家兔年事事順心,幸福快樂,今日以為要出去幫手接BB出院唔知幾點先回家,就辛苦老公去準備今晚團年飯,在家等電話到1點還未有消息,就問個媽咪點情況,原來BB還未夠磅數唔出得,咁就同老公出去買嘢,去到街市都喺好多人,但開始趕收工有啲都清哂已經喺到清潔,本來諗住食完嘢先買,最後都買埋先怕買唔到,到到都排哂隊好彩要買的都買咗,跟住是旦食碗麵就回家,就咁食碗麵飲杯嘢2個人都過百真喺好貴,人又多好快食完就回家,跟住就忙忙忙,7點半左右開餐,餐後食湯丸,老公因為啲花覺太少就幾年無行的花市今年都去行個運,2個女都話一齊,好多年無一家人一齊行,邊行邊講好開心,最後買多咗幾支百合,最開心喺買到一盤小蘭花,開開心心迎新年

好多料,雞鴨,魚肉釀豆卜,魚蛋,支竹,買唔到豬紅豬皮
先用燒骨雞腳煮好湯底炆蘿蔔
開始砌
老公好認真
雞,鴨,鵝掌,花膠,冬菇,帶子,蝦



最後放髮菜同西蘭花
好搞掂
太多料都要攞起部份先食到入面的魚蛋
呢張喺花市前阿囡覺花太少,缺定飯後去行花市買多些少
今晚煮西米芋頭芝麻花生湯丸
花市後多咗幾支紅百合同蝴蝶蘭
呢盤蝴蝶蘭覺得好靚



2023年1月20日星期五

晚餐之沙嗲肥牛粉絲

時間過得好快過2日就喺新一年,呢幾日周圍都好熱鬧,而家慢慢開始放鬆,過咗3年平靜又擔心的日子,周圍都好多人,街市就更加而且樣樣都貴好多,年30都會準備盤菜同家人團年,所以今日都去買定部份料,價錢都開始貴,一斤菜心都20蚊,鮑魚之前買過50蚊有6只而家就80蚊6只,蝦就更加過百一斤,我就唔喜歡同人迫,最後都喺是旦買咗肥牛,金菇見好耐無食蒸魚又買咗條,回家阿囡又話想食炒年糕就簡單泡菜炒,煮煮下又多咗開開心心又一餐






材料:肥牛半磅,粉絲4兩,芽菜5蚊,金菇一包,干蔥同蒜各3粒,蔥隨意可加可唔加
粉絲浸軟,芽菜,金菇洗淨,干蔥同蒜切碎
汁料:蠔油1湯匙,沙茶醬2湯匙,糖1茶匙,水4湯匙半均醬料
先爆香干蔥同蒜
加入肥牛炒香
先取起
加入金菇,粉絲炒勻
加入芽菜
加入醬料炒勻
肥牛回鑊炒勻試味,最後加入蔥就可上碟




2023年1月18日星期三

晚餐之花甲粉

今日都喺休假中,諗住無約人在家執下嘢,清一清啲唔要衫,鞋,啲無用嘢,點知唔記得要出去攞桂花糕,專登搭車過去話未到要等到5點幾車先到又最後一日唔攞就無,太早過嚟諗住早啲攞完回家,為有喺附近行到夠鐘真係浪費啲時間,攞完買埋餸就回家,今晚整返個花甲粉,之前阿囡知我整比個媽咪食,又要試話聽過但未食過,今次大只貴咗好多,但阿囡話好好味又想明晚再食轉第二樣海鮮,出門前煲咗個五指毛桃瑤柱雞湯,加多個菜同咕嚕豆卜釀豬肉呢個成日整比啲媽咪食,今次順便煮比家人食,簡簡單單又開餐




材料:花甲一斤,粉絲4兩,金菇一包,蒜頭4-5粒,干蔥2-3粒,指天椒一只
汁料:豉油1湯匙,蠔油1湯匙,豆板醬1湯匙,糖1茶匙,水400ml
花甲先洗淨,粉絲浸軟,金菇去尾洗淨,蒜同干蔥去皮洗淨切碎,指天椒洗淨切粒(怕辣可唔落或煮好後放面裝飾)
先爆香蒜同干蔥茸
炒到有香味
加入醬汁炒勻
炒勻試味
加入金菇
再放粉絲,最後放花甲
加入水
滾起花甲開口就搞掂