喜歡煮食的我, 每日開心煮和大家分享每一餐
時間過得好快又星期日啦，今日終於在家休息無出去，昨日同家姐阿妹食完自助餐回家就簡單煮咗比老公食，因為2個囡都唔洗返嚟食，自己又好飽唔洗食，本來剛放假又無咩嘢要做老公就話出去行下，最後搞搞下都喺無出去全日都在家，雖然唔洗返可以瞓晏啲但都喺一早起咗身，同老公簡單食咗麵包，之後就準備粥同炒個粉等啲囡起身一齊食，其實喺屋企都好忙，早上清潔下再覆媽咪啲問題睇下嘢12點幾準備午餐，食完坐下睇下嘢又5-6點又喺時候去準備晚餐，開工無時間差唔多晚晚都一煲過或買外賣，今晚諗住煲湯煮飯點知午餐又食淨粥同粉，所以今晚簡單加碟菜同魚，啲囡又想食雞翼咁就解凍醃醃焗焗，簡簡單單又開餐
今日同家姐細妹去咗花月庭食午餐buffet,本來細妹話請我哋去半島，點知full到十月先有位，而家唔同疫情好似好咗所以好多人都放鬆出去消費，到到都人山人海，咁我提議呢間，價錢唔貴又有蠔食，家姐同妹妹最愛，而我就唔喜歡，但呢間食物款式好多，時間就2個半鐘，唔同一般酒店有3個半鐘，因為呢個都分好多時段，12點又喺full哂，只有2：30到5：00，只好呢個時間而且還要坐得好遠，可能人真係太多，昨日都打嚟確實資料，呢個時間食完晚餐就唔洗食，平時食12點晚餐都唔洗食呢個時間就更加，食物真係多到都試唔哂，今次都無食魚生，甜品就更加無試，蠔家姐同阿妹都係食咗2只，實咗太多人，每次只攞2只又大排長龍，車仔麵又排，海南雞又排，雖然太多人但家姐好開心話下次可以再嚟食，我就覺得到到都要排就唔太好，太耐無試過咁，太多人又補唔切啲食物，啲人都可能嚟慣，我們早到十分鐘已經排得好長，入到去見好多人已經攞嘢食，到4點好多食物都無或者唔refill, 所以想再食都未必有，飲品款式都多但都只係飲咗杯咖啡，家姐同阿妹就飲綠茶，食完行一陣就回家，太耐無出去，度度都好多人買咗需要的嘢就各自回家，老公今日要返工，啲囡又唔洗返嚟食，煮過蕃茄牛肉湯飯比老公簡單又有營
家姐先嚟海鮮粥自己選喜歡的料就立即煮
時間過得好快，今日Last Day 啦，一個月的陪月工作又順利完成啦，喺度祝BB活潑健康，日日都幸福快樂，一家每日都過著幸福快樂的生活，今日比平時更忙，一早就返到去準備，因為BB又要去健康院打針，去健康院又要用幾個鐘，所以真係怕做唔完，媽咪都好好，趕唔切就唔好煲湯，燉湯都唔好整，當然唔得啦，最後一日更加要，我完工後啲媽咪通常都湯水少，每次完工都好唔舍得，呢個BB好醒目同乖，除咗肚餓都唔會大喊同食得好好，由回家3kg到今日打滿針就4.06kg，開始大就成日搵人講嘢，早2日可能知我要完工就好扭，成日喊又唔瞓，之後先醒起同她講有時間就回來探她，叫她乖乖哋等我可以搞掂哂先完工，她真的乖乖唔嘈周圍望攰就自己瞓，上星期已開始完工後的炒米茶包，燉湯包比媽咪補足100日，今日又準備埋跟住2日的早午晚餐同湯，怕我剛完工好忙同亂所以更加忙，又趕午餐後出去健康院，好彩今次好快可能疫情人唔多，2個鐘左右就走得，以前最快都要3個鐘先走得，回家後就立即同BB沖涼，返熱啲水比媽咪沖涼，清理BB衫再去準備晚餐，搞掂好就執好自物品，同媽咪BB影相，媽咪好客氣比咗好大個利市又送咗個好靚的茶壺知我喜歡飲花茶同寫得好好的信，真係多謝哂就回家，其實每次工作都好忙，呢2年疫情下好多工作都比較長，有啲請一個月有時間就做到下一個媽咪生，有啲簽2個月又會做到下一個生，舊年真係接著無停過，今年就好啲完咗都有幾日或2-3星期休息，都係因為有啲BB遲過預產期先出，時間預得鬆就多時間休息，好耐未做過一個月，所以今次忙到好似唔夠時間，因為呢個媽咪無人幫，晚晚最早都6點半先走，從未試過5點半收，每日又早大半個鐘返，通常頭幾日多數就會遲，一切安排好就可以準時或唔過6點就走得，休息幾日又等7月媽咪生完就隨時開工
媽咪話好多嘢想寫，幾張紙都寫唔完，而家簡化講出最想的，同大大封的收工利巿
今日喺父親節先祝願天下父親節健康快樂，雖然唔洗返昨晚又喺好夜，但今早都喺早起8點幾同老公食咗簡單早餐清潔下就出去買餸煲湯同買點心回家，本來啲囡同爸爸去飲茶，但老公就話唔好出買點心回來在家飲就算，咁我順便出去就代囡囡買回來食，晚餐本來準備煮餸煲湯，老公又話唔好搞咁多叫我多休息，大囡要開工話放工回來問老豆想食咩，老豆就話買pizza啦又有50蚊優惠券，點知阿囡睇咗話今日唔用得，老公就話算唔好買無優惠就唔抵食，而家平時都會買回來，最後我就自己整pizza同包咗餃子，燉咗杜仲豬尾湯，焗咗pizza, 煎雪魚扒同整咗個雜錦煲，開開心心又中又西是是但但又一餐
