喜歡煮食的我, 每日開心煮和大家分享每一餐
話咁快又到星期日，今日都係早起因約咗3月媽媽家訪，整咗簡單同老公食完我就出門，通常唔熟地方都會早啲去搵下，方便自己遲啲開工容易因時間，呢個媽咪好好，簡單講解生前有咩注意同生後的飲食同注意，睇下需要的物品，BB瞓覺同沖涼地方，了解一下到開工時就好處理，因為頭幾日會比較忙，家訪最主要喺送啲炒米茶包比媽咪帶埋入院，生完就隨時有得飲，媽咪同奶奶都喺度傾得太開心，傾到過咗午餐時間真係唔係幾好意思，之後還請我食午餐後已經3-4點回家，忙咗好耐今晚終於親身煮返餐，啲囡食外賣同一煲過粉麵食到怕，見時間還早就順便買餸回家煮返餐，整咗她們最愛的咕嚕排骨，馬頭買比啲媽咪食就多，今晚就試下對魚一般的我就覺得無咩特別，阿囡話頭痛就買咗大魚頭回去燉天麻，好少飲藥材湯的女兒就覺得好難飲，老公就好喜歡特別喺食魚頭，炒個蒜蓉豆苗同釀紅黃椒又開餐
時間過得好快，又一年啦阿囡又大一歲，祝囡囡生日快樂，健康幸福過每一日，呢幾年生日都會出去食飯慶祝，今年就要喺家過， 老公休息教他煮個鴨血麻辣雞煲喺囡話想食，再買火鍋料食完打邊爐，家姐就買蛋糕，我就買咗阿妹喜歡的壽司同鰻魚，樣樣有啲變咗小型自助餐，阿妹好開心，邊食邊傾又幾個鐘太開心，飯後就食蛋糕影相，明天星期日個個休息，只有我約咗5月媽咪簽約，因為疫情關係而家呢個媽媽又延長到2月尾先完工，只有星期日先可以約媽咪出嚟，早5個星期日又幫家姐做月子餐，所以搞到而家先有時間同5月媽咪簽，7月就要過完年先安排到，下星期就安排3月媽咪家訪，希望疫情快過大家又可以回覆正常
又一個星期，忙忙忙連做個幾月連星期日都做無停，今日最後幫家姐做月子餐，BB滿月啦好開心，又喺一大清早去買餸行幾轉先買齊，一次過實在太重啦，因為最後一次就準備更多，再安排多個半月左右的燉湯包，家姐怕好忙想我執定啲湯包等囡囡補足100日，就準備5-6款，有啲10包有啲5包共50包左右，所以今日更早去買嘢，做做做整整整又5-6點，剛搞掂哂家姐同姐夫就到，阿囡怕我太辛苦就買壽司回來做晚餐，已經煲咗湯再加個菜，阿妹又想食麵又煮多個麵，早餐買得太多點心又返熱加埋，今晚真係是是旦旦又一餐
阿囡買咗好大碟的壽司
每日都好忙晚晚都8點幾先到家，早幾日BB要打針又一早去到媽咪家一齊出去，點半左右先回去，個媽咪提議叫外賣，好彩8點到家早一日買定料去到先煲定湯，返到去立即同BB沖涼餵奶搞掂完食埋嘢就立即準備晚餐，而家BB越嚟越扭要人抱，搞搞下又過哂時差唔多6點幾7點先收工，回家又好晏有時外賣有時一煲過，好彩啲女無投訴，老公就時時都講是是但但又一餐，今日老公休息買餸煮飯話好豐富唔洗加料，有蔥爆龍躉胃，蒜茸炒豆苗，鹵水鴨，薑蔥炒蟹同粟米忌廉雞湯，又買咗我最喜愛的蟹，雖然喜歡如果得我一個就唔太喜歡，又買咗龍躉胃，今次薑蔥爆炒啲女唔知喺咩，但一食個個唔停口好快就清哂，蟹2個女就唔食，留起一部份明早煲蟹粥反而2個女就最喜歡，開開心心又一餐
忙，忙忙又到星期日，應該要休息一下，但又要幫家姐準備一星期的燉湯，湯同餸料，今早諗住一早起身點知瞓到8點幾老公問唔喺要早嗎？我非常唔想起最後都喺起身洗面刷牙飲杯熱水就出門，因為上星期好趕先搞掂，諗住今日早啲去買完回家就唔洗趕，最後都5點幾家姐同姐夫到時剛搞掂，要買好多嘢行3轉又唔係自己屋企樓下有街市，行上去買咗部份嘢已好重，所以分幾轉，買雞，肉，魚同菜，搞掂哂休息一下諗住今晚叫外賣唔煮，其實昨晚就醃好嘢諗住1-6都喺食粉麵，叫外賣，最後老公煮蒸魚炒菜焗雞翼排骨就搞掂，啲囡見到好開心，好似好耐未食過正常一餐，哈哈哈真係要諗下
今日2021年的第一日先祝大家新一年身體健康，事事順心，疫情快過可以回復正常生活，今早只有我要開工，一早起身食完簡單早餐就出門，呢個媽咪比個囡囡搞到無得瞓，呢幾晚要抱住先瞓，唔知喺咪之前聖誕媽咪同爸爸啲朋友嚟過聖誕太開心，搞到媽咪都唔比朋友再嚟，所以昨晚他們一家3口自己倒數，我今早回去個媽咪好開心，食完早飯立即去瞓，我就先搞掂BB再去準備午餐，蓮藕章魚花生排骨湯，午餐買咗燒鴨，鯇魚請她們食再加多個菜開開心心開年飯，下午茶就燒鴨瀨粉喺媽咪最愛加燉天麻魚頭湯，晚餐就幫她們準備香草焗雞，蒸石班加個菜，BB今日真係好扭要人抱，好彩唔太扭我可以做到嘢，搞掂完又差唔多7點就收工，回家老公買咗蝦，蠔好多嘢話好開心估唔到今年都有花紅分，所以要慶祝一下，開開心心又開飯
