晚餐之茄汁蝦

時間過得好快，唔經唔覺呢個媽媽做咗5個星期，還有3個星期左右就完工，本來想加多時間，可惜我8月的媽媽都怕自己早成日問我幾時完工，最快都要14號last day,希望8月BB唔好太早嚟，咁個媽咪就可安心，我又接得住，而家每日都好忙時間好似唔夠用，每日都6點起身搞掂完老公同女兒出門，自己都食完簡單早餐都出門，呢個媽媽住得唔遠，但7點半左右出門，買完餸再去到都會早通常9點半前，雖然返10點15分但都會預鬆時間，有時塞車就會十點左右先到，而家疫情嚴重去到媽媽家會用上十分鐘時間清潔，先在門口全身同物品都噴酒精消毒液後先入屋，跟住入洗手間洗手除口罩清潔面部眼鏡同手後再換衫盡量再清洗一次，再將換好的衫再噴一次先入回自己個袋，真係好嘥時間但都無法，只有盡量做可減輕感染，今日又星期日，過去二個星期日都有事，剛過的星期日約咗8月媽咪家訪先睇下環境，媽咪入院的準備，BB會瞓邊，沖涼的環境。。。等，最重要都喺攞炒米茶包等媽咪生完就有得飲，今日終於可以喺屋企休息一下，但又有幾個媽咪下年3月搵我，所以又忙覆她們，3月的媽咪喺孖胎終於有機會湊，另一個3月的媽咪就希望預產期喺月尾咁就可以接埋，今日大囡要返所以又一早起準備早餐同午餐盒，跟住同老公食咗簡單早餐就去超市買日用品，順便買些少餸，而家都無咩時間煮，老公回家都7點左右，而我有時更遲，通常買外賣或一煲過都係簡單嘢，今晚要煮返餐她們最喜歡的，開開心心又一餐

 細女最愛的粟米豆腐湯

 二個女最喜歡的土匪雞翼

 本來午餐炒嚟食，最後做咗晚餐

 太耐無食的金銀蛋莧菜

 半煎煮的黃花

 茄汁蝦個個都喜歡

晚餐之外賣

又星期日啦，開工剛二個星期非常忙，處理的問題好多晚晚都8-9點先返到，所以晚餐都喺叫外賣或一煲過煮粉麵，老公都正常工作回家都夜難買餸，呢個媽咪雖然有工人，但都晚晚搞到7點幾8點先收工，頭星期通常都會夜，因為要處理好多嘢，而且大家都未習慣，呢個媽咪又喺好緊張，第一個咩嘢都唔識又加上自己生完後有好多問題，對腳水腫好利害，又血壓高又貧血，本來醫生唔比出院，但見個媽媽都精神又唔想留底就叫她回家睇情況，又唔準媽咪餵奶或泵奶，搞到個媽咪好唔開心，回家第一個星期就好努力先解決她的水腫，血壓同情緒，經過我努力後呢個星期終於解決哂水腫，血壓的問題，媽咪的水腫同血壓都正常，精神都好好每日再無頭暈又開始教她餵人奶同泵奶，今日雖然星期日都好早起身，因為都想清潔一下，午餐又約咗家姐們出去飲茶，覺得時間真係唔夠用，大耐無見她們啦今日大家都好開心，傾傾講講又幾個鐘，因為要幫個媽咪買些少藥材所以飲完茶就各自回家，先同老公去樓上買個媽咪要的蟲草，紅棗，北芪同黨參，差唔多第四星期就可以用，而蟲草第三個星期就可以開始食，買完已經好晏，老公就話買外賣，啲囡唔想食味皇，咁我哋喺大家樂買，真係太耐無喺出面食，大家樂都有外賣晚餐，100蚊3個餸要加錢先有飯，菜同甜品，每樣計，要湯加16，要飯加菜同甜品就加$16,，總之要加咩都可以，咁我試一個餸加咗湯，飯同菜，加個焗豬扒飯，細囡又想食壽司咁喺超市買咗盒，全部差唔多二百幾，雖然價錢貴，但啲囡就好開心，開開心心又一餐

 焗豬扒飯都好好

 粟米魚柳同紅腸雞翼

 加錢的豆腐芫茜湯

 豬扒飯跟中湯