午餐之皮蛋粥配肉絲煎麵

休咗幾日好快又開工啦，明天個媽咪出院，29號正式開工，但明午都過去跟一跟反正都係在家等開工，通常出院都好忙，有啲新手爸媽都係緊張同擔心，所以我有時間都會去一去，有啲出院我就正式開工，有啲有家人幫就出院第二日先開工，今日只有老公要返煮咗早餐同整咗午餐盒，諗住咁早去瞓多個鐘，最後都喺去咗街市買咗料回家準備煲湯，一開工又會好忙而且今次比較遠來回車程都三個鐘，二個女都忙完今日喺屋企，叫我比她們瞓到自然醒，咁就煲定粥，等她們起身就炒個麵再加些少腸粉同燒賣，她們最喜歡食粥，而家出街食真係好貴，自己煮就真材實料無味精，食完午餐就準備開工嘢同炒定米，下一個又好接近隨時家訪都可以，雖然放假一樣忙忙碌碌又大半日

加多個腸粉燒賣

用電飯煲煲粥就最方便，唔洗睇火好快就食得

先煎好個麵

 炒肉絲同牙菜開個汁

 最後加蔥，增加香味又有美感

聖誕晚餐又雞煲後打邊爐

又到聖誕節啦，先祝大家聖誕節快樂，今日好開心個媽咪入咗院，bb趕出嚟同爸媽過聖誕，好快又開工啦，今日家中都好熱鬧個個休息話瞓到飽先起，我同老公就習慣早，先食麵包飲杯咖啡等二個女起先缺定午餐在家煮還是出去飲茶，最後出咗去飲茶，飲完大女有節目，細女回家準備開學嘢，真係好忙話無得休息，剛完上學期2號又要返學，咁今晚喺家食又話打邊爐，一連三晚都打，咁又係整個雞煲，食完加自己喜歡我的，今晚就買多啲阿妹又上嚟，今次又買壽司話我細女要，叫她慳啲都唔得，哈哈哈，飯後今次就食細妹買嚟的芒果糯米糍同自家制芝士蛋糕做甜品，開開心心又過咗聖誕

細妹話連打二日都無丸無蝦，今晚就整些少丸，腸仔，蝦同魷魚滿足下她的要求

 細女最愛的魚皮

 老公最愛的羊肉

 生菜同響鈴細妹必食

 細女要的白菜，老公的茼蒿菜

開心的平安夜晚餐

明天又聖誕，時間真係好快，祝大家聖誕&新年快樂，日日都開開心心，今早家中各人出門諗住去瞓多陣，家姐知我休假中話帶個孫過嚟，咁又要整定啲包，蛋糕同點心，本來話點半先到突然9點就到咗，搞到拿拿淋先蒸腸粉同燒賣食住先，跟住就整咗麵，啲包都未搞掂，好彩焗緊蛋糕，呢個人仔唔鍾意食包，蛋糕焗完就要蛋糕，可能真的未食嘢，平時嚟到搵嘢玩，今次就話食嘢，食嘢好搞笑，食飽就自己搵車玩都真係好乖，到眼瞓就一定要回家，11點左右就走，我就可以鬆一鬆，上下綱，睇下書又四，五點，二個女有節目諗住同老公簡單食過一個平靜的平安夜，點知阿妹問有冇飯食，叫我打邊爐我話3個人是旦食就算啦，最後都喺去街市，點知見到家姐喺阿囡到走，問今晚唔洗返去煮同姐夫出街食，話過嚟食好唔好，返正都要買餸無所謂，老公就買咗油甘大魚頭，我就諗住打邊爐留明天，點知家姐原來好喜歡我就用薑蔥加蘿蔔先煮比她食住等其它人，又喺簡單整個雞煲食完先打邊爐，姐夫又好客氣帶咗2支紅酒嚟，邊食邊傾幾個鐘，諗住平平靜靜過平安夜，點知又開開心心，熱熱鬧鬧過

 家姐話太好食，唔客氣食完都唔洗食其它

冬至的晚餐

今日冬至，祝大家冬至快樂，咁啱未開工就同老公出去同老豆飲茶，阿妹同家姐都有時間就齊齊出嚟飲茶，從未試過冬至出嚟飲茶，以前多數要返工多數放早就趕回家準備晚餐，因為做節一定喺我家食，自從老爺奶奶都走後就無再上嚟我到，今年就提早出去同大伯，叔仔幾家人食午餐就算，而老豆家都係提早出外食，今日飲茶無特價全正價都無所謂，最緊要老豆開心，食完就回家買餸個個都在家齊過冬，阿妹專登買壽司一齊過冬，我就簡簡單單整幾樣，飯後就食團團圓圓的湯丸做甜品，整咗酒釀小丸子同普通味，開開心心又一餐

 猴頭菇螺頭湯

 香草焗豬手

 薑蔥蠔

 明爐檸檬烏頭

 肉醬天使麵

 新LE餐盤當然第一時間試用呢個大先

酒釀小丸子用自家制的糯米酒再加入桂花

 老公就要傳統用薑同紅糖煮

 午餐飲茶都要豐富啲，難得冬至正日同老豆飲茶

 燒鵝雖然無特價，阿妹話呢餐她請就叫咗

 還有豉油煎蝦，味道都幾好，可惜太少

晚餐之明爐烏頭招呼美國回來的同學

今日第一日休息，剛同學由美國回來度假，咁就約咗她們上嚟晚餐，煲咗湯整咗蛋糕就出咗去同舊公司啲同事食午餐，離開咗四年那裡已開咗好多新食肆，她們就帶我去，今次去咗間食東南亞菜，我哋幾個女的就叫咗啦沙配雞，而男的就食肉骨茶套餐，太耐無見又知我轉咗做陪月，其中二個因為同我唔熟，知我做陪月講話叫同事問但無期，點知請咗好差而又收22k紅agent,當時又唔識搵agent換，好慘搞到身體好差，坐月食涼拌，果個陪月真係好離譜，坐月虛點可能食涼拌，正常人都知唔會食，搞到她痾足成個月，連人奶都無，真係好慘，我就話我同事講清楚我知就算無時間都可以跟下，咁就唔會咁慘，她們好認真話下次有第一時間通知我留期，我話好一定留比你哋，無期都可以跟下，有問題隨時可以搵我，一傾又4-5個鐘咁老細返講二句就立即走

整咗檸檬烏頭二個同學都好開心話好好食，喺果邊食冰魚，喺唔會食新鮮好貴，更加唔會出去食，連稅加一同貼士一個早餐都要8-90蚊只係一碗粉同一杯茶覺得好唔抵

之前有個媽咪送咗蕃薯粉，所以又專登買蠔仔整蠔餅等她們一試

 一早整咗蛋糕去探舊同事

 呢個芝士蛋糕試用電飯煲整做今晚甜品

 午餐的肉骨茶

啦沙配雞套餐，都幾好味$76還要加一，今次請她們埋單差唔多五百蚊

同學帶嚟好多美國手信

 呢二樣配料知我最愛

 好開心而呢個喺無諗過我能夠擁有，因為太貴，我就唔舍得買

又完成一個工作

今日last day 每次完工都會有啲唔舍得，特別喺呢個，因為完工都未照顧好呢個媽媽，呢個媽媽同阿囡都比我之前做過的有難道，每晚回家攰到唔想做任何嘢，一星期有幾晚落街食，因好遲先返到，有時是旦煮煲麵又或者簡單煲個排骨飯，通常頭幾日會遲走，雖然返十點三放5點半，通常9：30就返到如果去健康院就更早，6點前搞掂就收工，好多時都遲，唔記得遲到幾點又成個鐘車程返到去就一定味皇，最初感到呢個媽媽都唔知咩嘢事對我態度好差同唔太信任，後來好彩都有講清楚，其實做呢行如果媽咪唔信任或者有問題唔講我喺好難幫到手，好彩最後都搞掂bb唔再嘔，媽媽還未真正復原，因為呢個媽媽好多嘢都唔食，好似生果咁常食的都喺唔食唔知喺咪唔均衡飲食身體難快復原，但已經食新鮮雞，燉雞汁，肉汁同用新鮮魚去煮一碗湯，可能咩嘢都唔食所以復原得慢，過咗20日有啲嘢可以開始食，好似蛋好有營養都唔食，話開刀要再遲，啲嘢開始清可以用些少藥材補虛，但又話唔受得叫我唔好用，只有搵啲能夠代替去試，所以今日完工都未完全復完，喺做咁耐最失敗的一個，只有叫她媽繼續一日一碗魚湯，希望可以早啲復原，而bb出院那天就見到嘔奶口鼻一齊出又唔係正常果啲嘔吐物，媽咪就話醫院講喺胎水唔清所以咁，我真係做咗咁耐都未見過，又長知識，呢個囡囡其實都好好湊又食得好好，只係有嘔奶的情況，以我的工作效率喺無問題，而阿b又好叻只需要去咗二次健康院就等滿月針先返，初時都係食飽瞓，後來她媽媽夜晚因怕嘈住人瞓就開始抱住瞓，最辛苦喺她婆婆成家人去旅行，每日再無人上嚟幫手抱就開始比較辛苦啲，每次都係媽咪餵奶就盡快搞手頭的工作，好多時連午飯都無食或食少少就算，抱住就瞓放低就咸又怕她嘔，食完奶有時抱成個鐘先試放落床，喺我做咁耐未試過咁，但總算順利完成咗，希望bb健康快樂，媽咪就快快復原，身體健康，走時叫媽咪幫我同bb影相，bb好叻同我影相識眼仔碌碌好醒目望鏡頭，連媽咪都話未試過個囡咁叻眼仔碌碌望鏡頭，當影完轉比公公想影但阿囡已經唔再喺咁，真喺好得意，走時媽咪都有比信同利市話利利市市

Bb真係好叻對眼好精靈同會望鏡頭