晚餐之雜錦焗雞

話咁快又星期六，每日都係忙忙忙，今日更忙明天休息，通常都會準備埋星期日的早，午，晚餐的餸同湯方便呢個新手媽媽煮，晚上以為得我同老公諗住又係一煲過簡單又方便，點知收工時阿女打比我話可以返嚟食，有個同學仔話上嚟食得唔得，咁立即打比老公買條魚，加多啲菜，我回家就喺百佳睇下有咩買，點知今晚無車等咗45分鐘先有，返到家買咗雞同排骨，老公已幫忙準備咗部份，我就一邊整一邊住，先將雞洗淨開邊加酒，蒜鹽先醃，見到雪櫃樣樣有些少就洗好切細放焗盤再將雞放面入爐半個鐘就食得，跟住就處理排骨醃好配三色椒煮個咕嚕三色椒炒排骨，整比媽媽食得最多喺蓮藕餅，家中反而好少煮，今晚有客人就整個煎藕餅，唔洗一個鐘，她們回來就食得，女兒見到又話得魚同菜，點解咁快有咁多嘢，我就話你媽咪勁攞，哈哈哈

 準備二個早餐，四個餸，湯同二樣菜

老公見有人嚟就專登攞雞去斬，平時就手撕，喜歡邊個部位就撕邊個