晚餐之蒸焗爐煮黃花，三色椒雜菇焗雞翼

每日都一早起來煮早餐，午餐盒，搞掂哂個個出門自己食完早餐都出門，通常買咗餸先搭地鐵去個客到，今日諗住去過邊先買，真係浪費時間，唔太熟想買的都無，還入咗間好離譜的菜檔，只係買咗一個西蘭花，二個小洋蔥，二個節瓜同些少菇就要50蚊，返到去同個媽咪講，奶奶都喺到問喺咪個間近魚檔，原來喺好離譜，我見好多間都無價錢，見到呢間西蘭花12蚊斤應該唔太離譜，點知錯，唉都喺返自己到買會好啲諗住唔洗攞咁重，返到去諗住無咩嘢，就諗住整雜菇釀雞翼做今晚的餸，每晚都三樣，另外就香芧豬扒同魚柳炒西蘭花，點知阿仔今日全日唔瞓搞到三點幾先食午餐，其它嘢都推後哂，好彩個媽咪四點上嚟幫手，我就唔好意思叫她去休息，呢個媽咪又好客氣話搞到我又遲收，無所謂最緊要搞掂晒，跟住好忙但最後都整到釀雞翼，講咗好耐話整，次次都有事搞到整唔到，今次就工夫多咗，我提議釀入去的媽媽都話唔好，最後我用菇，先切細粒出水再炒香放涼後才釀入雞翼，還整咗新鮮粟米起粒加黃花魚柳做腸粉比媽咪做下午茶，搞掂晒收工又六點幾，喺附近買完餸先回家煮晚餐，收工啲價錢就平到笑，今早50蚊少少嘢，放工50蚊就攞到手軟，返到去就快手切咗三色椒，菇加醃好的雞翼入爐焗，跟住就浸菜洗魚，本來整糖醋魚，最後就好懶入埋蒸焗爐一齊煮，只係炒個菜就可以開飯都唔洗一個鐘，呢個蒸焗爐真係好幫手

 黃花洗淨用些少鹽抹勻全身就可以

 呢度50蚊真係好平有二只黑茄子，三色椒，工個椰菜花，一包大蘑菇同5－6只細雞脾菇，二斤白菜仔

 今日終於整到釀雞翼比呢個媽媽食

 將菇切細粒，出水再炒香放涼做餡

雞翼去骨加少少鹽調味後再釀入餡料

 釀好後就可以煎或蒸

晚餐蒸焗爐之南乳排骨，雞翼

又一星期啦，早二日bb打滿月針，呢支針打完無咩嘢，阿仔都好乘只係哭一聲就無再哭，但有啲bb打完會煩躁，唔會發燒一，二日就回復正常，今日一早又喺煲定湯，昨日喺百佳買咗包排骨用南乳去醃，跟住去老豆到同家姐細妹飲茶，飲完就回家阿妹話上嚟食，咁就買條魚，天氣實在太熱最好就唔洗做，最喜歡就醃好肉入爐，簡單炒菜蒸魚又開飯

晚餐之老公煮的豆腐火腩

今日佛誕本來唔洗返工，呢個媽媽好好叫我放假休息下，但我見又無咩特別就照返工，老公放假又可幫我買定餸，今日返到去都好忙，媽咪想洗頭又要準備洗頭水，燉魚頭又煲魚湯，因為唔太食魚，她奶奶就叫我多煲魚湯，煲魚湯就會多啲時間，魚洗淨抹乾後要煎香二邊煲出嚟啲湯先好飲同唔會腥，下午有人整廚房溜水，又有二個鐘用唔到，通常都會增取時間去同仔仔沖涼，洗衫同其它嘢，搞下又五點，好趕好趕，媽咪同奶奶都好好叫我收工她們搞，我當然唔會啦，繼續做埋自己嘢先收工，返到家雖然七點幾，老公已準備大部份，炒好菜同煮話炆咗豆腐火腩，但無人食因為啲豆腐酸，老公買咗現成炸好的，平時我煮呢個一定自己買湯豆腐，雖然難煎，但就外脆內軟當然好食啦，今次老公買炸好，返嚟煮前要出水先唔會酸，又無出水，喺煲仔太細啦就算爆香啲火腩都做唔好，但老公自己就好欣賞，我都有幫手食，哈哈哈跟住我整埋其它又開飯啦

晚餐之薑蔥蒸班

又星期日真快，雖然忙碌得就好開心，呢家人好好，下星期話佛誕叫我放假，雖然講咗放勞工假，但那天無放，咁補返但我諗都唔會放，無咩特別嘢反正都做得好開心，今日又一早煲定湯去老豆到，約咗家姐同老豆飲茶，飲完搞掂老豆就同老公回家買餸同準備下星期的餸，因每晚回家都夜只有喺超市買餸同簡單煮，二個女都返嚟食咁老公又買咗條大班，而昨晚又準備咗蝦，本來話炒甜豆同什菇，阿女話唔食甜豆，咁就炒蛋，加多個細妹喜歡的肉餅，開開心心又一餐

晚餐之bb滿月的燒肉

話咁快呢個仔仔又滿月啦，呢家人好好，一家人相處有講有笑，無婆媳問題，奶奶喺個好奶奶，當個心抱喺自己個女，好照顧又幫手，呢個新媽媽又係好好，樣樣都喺聽同接受，同奶奶有講有笑同好關心奶奶，有時整下午茶都會留一部份比她試，雖然未完工嫲嫲就比咗二封利市我，話多謝我照顧她的心抱同孫，通常滿月我都會睇下個媽媽會唔會興祝，通常都喺搞百日宴，有啲會出街食，有啲叫我整海鮮同她們喜歡的，每次滿月我自己都會做紅雞蛋同整個班蘭蛋糕送比她們，希望她們健康，幸福快樂，今日我特別開心，滿月當然開心，又收到奶奶的利市，燒肉，新媽媽的靚靚cupcake，講真做咗咁耐都係第一次分享她們的喜樂，最開心她們話自己人唔好客氣，上次12朝已送我大盒燒肉同豬薑腳，通常會試食，從未試攞走，今次話一定要攞自己人，最後都唔客氣攞走，今晚就同她們預備咗猴頭菇雞湯，手撕雞，蓮藕餅，油麥菜同蒸海斑，燒肉，而自己今晚就整咗西芹炒魚柳，雞翼同腐乳通菜，五指毛桃湯

 媽媽的下午茶

 南瓜芝麻卷

 今日的午餐

 豬腰肉碎炒勝瓜

 糖醋骨

我給媽媽同仔仔的紅雞蛋，班蘭蛋糕