晚餐之西餐

今日好忙都叫做搞得掂，今個月轉新餐單好多嘢都未煮過比啲仔食，好似今日就粟米魚柳同青炒蘑菇茄子，又要煎魚又要將茄子切細，大人就糖醋骨，魚香茄子同炒旺菜，木瓜雪耳南北杏排骨湯，樣樣都要切，邊炒邊切都無法，湯十點半起完就到仔餸，跟著就煮二個齋菜，本來以為可以一齊煮，但一個唔喺肉咩嘢都得，但另一個就真齋，隨咗肉還好多唔食得，搞掂完就到大人，十二點前搞掂食三圍，十二點二圍，點三一圍，尾圍幾個就點九，食完清潔又預備明天餐料，搞掂完就清潔收水又一天的工作，今晚知道個個都差唔多時間返就整下西餐，自從轉咗工都無煮，早二日大女先講好耐無食，好想食蒜茸包，螺絲粉...咁今晚就簡單整只係煲咗個蕃茄薯仔粟米湯，煎二塊牛扒，焗雞翼，豬扒，魚柳同雞串再加多個芝士白汁螺絲粉拌西蘭白椰花，開開心心又一餐

晚餐之梅子蒸烏頭

今日星期三學校食什糧，比煮三餸一湯更多嘢，但剛轉的餐單非常好，連仔都食腸粉就炒少個麵簡單好多，啲仔第一次食好開心問點解咁少粉，我就話喺腸粉唔夠再加，但就要食完粥後才可加，個個都好開心食得好快，再去大仔果度睇下點仔就話好好味可惜太少，下次可唔可以多啲，我就同主任講下次加多半條，今日有個西人Miss專登入廚房比手信我話去完台灣，雖然只係好少嘢但好開心，我無立即食帶回家同家人分享，今晚返到去唔太攰就買餸煮飯，哩幾日唔係湯飯就炒粉麵，去到街市買魚，肉菜就回家，最開心就個個返齊唔洗留，買咗條烏頭蒸豆豉，老公話蒸檸檬啦好味啲但又無，咁梅子得唔得話好過無，咁就用梅子蒸炒個菜同整個三色椒炒豬潤肉片同滾個蕃茄粟米湯快快手手又開餐

 台灣的手信

 今晚齊人一開四一人一件

晚餐之义燒肉片炒河

而家轉咗只打橫行同她的人入廚房，又轉新菜單好在自己手腳快，無比人打亂一樣做得好輕鬆，但啲人真係好頂我唔順，就話好忙不停喺到追，十點半起湯，十點三就開始追得未得未，搞掂完湯就追仔餸，是實上想玩我唔緊要，自己安排早啲去配合，現在趕到連洗手間都無得去，水就更難自己又好緊張趕趕趕，最好笑做多我哋幾年的人轉返入來主要喺幫我，但聽二個新人講要幫我做的只做一半，或者叫先做好似安排西人餐枱就搬部份好似我有份做留給我，無問題一樣搞掂，食完後要幫手清又只係攞些少，餐具，枱同椅又喺睇唔到，有校長喺到食就會做多啲，唔喺到就彩你都傻，開始熱都唔想整咁多，今晚返到去買到河粉同芽菜咁就買啲肉同义燒再加椰菜炒，滾個番茄湯同炒個菜又開餐

晚餐之大蝦芫茜皮蛋肉片湯飯

今日好忙做到夠鐘放工都未做完，好彩花姐幫手收尾，只係遲咗十幾分鐘走，星期一本來唔太忙，但今日老師生日會食完飯清潔完就立即再開工，又焗粟米片，蒸餃同炸春卷再開多個什果賓治，搞掂完又要準備明天的午餐料，整豬扒又啄又切又醃還有仔個啲，做完廚房又要去清潔校務處同收回水壺回廚房入水，未做完已經收工時間都無法，忙忙碌碌又一天，回家都唔太想整太多嘢，簡單煮個大蝦芫茜皮蛋鯇魚肉片湯飯，炒個菜將之前食淨的豬手加啲椒同金菇炒一碟，咁魚肉菜又開飯啦

材料：蝦6只，豬肉$10，鯇魚腩1件，皮蛋3只，飯2-3碗，薑絲1湯匙，芫茜同蔥各2元
醃豬肉料：豉油1湯匙, 糖1茶匙，水2湯匙，生粉1湯匙，油1茶匙

 豬肉洗淨切片加入醃料撈勻

 腩一定要切厚啲，煮時先唔會容易散

 切好加些少鹽同糖撈勻

 皮蛋去殼洗淨切細件，芫茜同蔥洗淨切碎

 水先加入薑絲煲滾

 加入肉片同芫茜頭

 再滾起就加魚同蝦

 所有材料熟就加芫茜蔥同鹽糖試味

 最後加入飯

 滾起就搞掂

晚餐之辛辣拉麵

雖然今日星期日都係好早起身，同學嫁女好開心，約咗她飲完茶幫手比帖其他同學，搞掂完就去奶奶到再回家又五點幾六點，今晚本我同老公食簡單煮麵，阿妹話要過來痴飯食，我話唔煮她就話請我哋落街食，老公就令願食麵，最後就買咗些少燒鴨，炒個菜同煮麵，是是旦旦又一餐