晚餐之三式椒炒雞件豬潤

今日又星期的開始，每個星期一都喺green Monday,今日差啲唔記得要煮紅米飯，最後都趕得切被人煲飯，我本來番茄薯仔煮素雞，點知來錯素鵝，主任就話其它咸，素鵝先煮怕變壞，人哋搞錯就無問題，如果喺我就比人駡到暈，哩到啲咩嘢人，真係好失望好唔開心，今晚返到去淋住唔去街市，因好多舊餸點知大女話明天都帶飯，今晚又少咗個學生可以回來食，咁又去街市行個圈買咗幾咗雞脾，二只斬件加豬潤同三色椒去炒炒，之前條班食淨啲頭尾煎香滾起間水加菜，肉滾起就有湯有菜，煮多個薑蔥三文魚骨又開餐啦

母親節晚餐在味皇

今日母親節，先祝賀天下母親健康快樂，今日星期日都係好似返工咁早，因為要同奶奶飲茶，老人家都要好早，二個女都好乘，細女今早專登喺宿舍回來同我哋飲茶，已叫她太早無為走來走去，還以為要叫她起身，點知五點幾搭頭班車，我都未出門她就已到奶奶個邊還去搵位，估唔到那酒樓未到八點都要等位真誇張，飲完茶上去奶奶家坐一會就走，同二個女行街買衫買咗好多嘢就回來，今晚又唔洗煮，二個女話請我出去食唔好煮，去食韓燒我最怕等，明天個個又要早，最好唔好周圍去家樓下味皇就可以，簡單又好味食完早啲回家休息打下機睇下電視就滿足，阿妹又來熱鬧下，今晚味皇六點半都要等枱，真係誇張食完都未八點，見咁早二個女就叫阿姨回家打牌，老公話唔好搞他叫我哋四個自己玩，最後話唔打的他就坐到唔起身，細女就叫我打她做嘢，今日過咗一個悠悠閒閒簡單開心的母親節

母親節快樂

祝大家母親子快樂，女兒親手做的麵粉花同大家分享喜悅

豐富晚餐之在家提早興祝母親節

而家時間過得好快好快又到星期六，放工去老豆到飲茶清潔煮晚餐已經喺星期六必定節目，今晚大女的男友話請我出去食同我提早過母親節，我話煲咗湯買餸回家煮無謂出去同人迫，點知我妹又上來更加無謂出去食，搞掂完老豆回家又六點幾，啦啦聲上街市買魚買菜，估唔到今晚啲餸唔貴，蝦都係$70斤好大只，買條好大的班都係一百，再去超市買腩片點知買唔到就買包雞翼整最簡單又快的媽咪雞翼，點知大女的朋友仔買礶鮑魚來又士多啤梨同蛋糕，即食鮑魚返熱就食得，咁老公就話煮咗他種的有機蘿蔔苗去墊底，煮煮下都有成七個餸唔太好就喺雪櫃攞返盒舊餸出來當八樣，老公真係好搞嘢，大家好開心傾下食下又一餐，飯後食蛋糕同士多啤梨，阿妹都好開心話多謝豐富的晚餐

 有機蘿蔔苗煮吉品鮑

 九皇芽菜雞脾菇煮響鈴

清蒸大海蝦

 薑蔥蒸班

 媽咪雞翼

 芝士牛油蒜茸肉碎焗茄子

 蒜茸炒白菜仔

 粉葛排骨湯

 玫瑰花片真珠士多啤梨蛋糕

 啲cream好有牛奶味唔溜好好味

士多啤梨好大好鮮甜 

 有機蘿蔔苗

晚餐之梅菜蒸肉餅

每日啲人都可以搵嘢講，我只係想完成張約先走，做人有頭有尾，真係唔知可唔可以去到尾，自己都打定隨時走的心態，但又唔會是旦做，我都一樣盡心做，高層唔認同，老師同學生仔滿意就心足，我唔明點解可以開眼講大話，話我唔夠heart, 味道好賣相唔得，我做咗咁耐剛先聽到有咁樣的平價，由我入職到現在每日西人食完都會專登入廚房同我講多謝，好好味食得好飽，啲仔去洗手間也專登去廚房門口睇下，見唔見到我，一見到我就話今日午餐好好味我食咗幾多食得幾快，就係因為咁我先有動力繼續唔理個啲搞事精，但現在已無心情繼續留底，就算老師同學生幾好幾滿意我都無用，因為高層唔睇繼續被人玩都喺時候離開，由得啲人繼續，今晚放工返到去本來無心情煮，點知個細話回來食咁又入咗街市買條魚，再蒸梅菜肉餅都好耐無整炒多個菜又開飯啦