晚餐之中式豬扒

完工後見疫情好些少就約啲同學，媽咪同朋友差唔多日日都出咗去，今日無約人早上都喺搞掂完各人出門，自己簡單食早餐就清潔下，其實在家都好忙，感覺出去就好似無咩時間，之前返工多數老公跟晚餐就多數一煲過或買外賣，而家放假好多時都會煲湯煮餸，一煲過就好少食魚，有多數都喺超市買的急凍魚，今日就專登去街市睇下，本來想買馬友最後就買咗條黃䲞槍，去完街市入咗超市，肉檔大特價100蚊任選4包，好似都幾抵就選咗買2pack豬扒同2pack骨，其實喺街市都喺差唔多，超市肉檔好熟叫到都會幫襯下，2包豬扒都有8件唔算大，今次整中式豬扒其實簡單用洋蔥加個酸甜汁煮一煮，快手又好味，啲囡可能太耐無食話好好食，炒菜蒸魚加埋之前食淨啲pizza同意粉，簡簡單單又開餐

豬潤炒椰菜，此中豬潤炒唔到爽脆的效果

呢個中式豬扒喺以前出街食最喜歡叫的中式牛柳，只係在家就多數用豬扒煮

細女最喜歡的豉汁蒸

材料：豬扒8件，洋蔥一個，蔥1湯匙

醃料：半茶匙鹽，1茶匙糖，1湯匙生粉

汁料：茄汁2湯匙，陳醋1湯匙，片糖半件

豬扒洗淨加入醃料，洋蔥去衣洗淨切細條，蔥洗淨切段

先將豬扒煎香2邊，煎到金黃

加入洋蔥同蔥頭炒香

炒到洋蔥有香味加入汁料

炒到差不多收汁試味就可上碟

而家休息就會醃定小黃瓜，早餐就會整包比啲女帶去做午餐

老公的早餐

老公的午餐盒

大女就要白灼菜，雞肉同蛋

晚餐之pizza hut

咁快又星期六啦，今日細妹都休息就約咗去大家姐同她補足生日，大半年都無去家姐家，今日一早約咗細妹喺地鐵等埋就搭車過去順便買咗個蛋糕，而家啲嘢真係貴咗好多，細細個蛋糕都要百幾蚊，去到家姐家先唱生日歌食少少蛋糕就落樓下食午餐，之前生日通常都同家姐出去飲茶或食自助餐，家姐話唔想行喺自己家樓下簡單食就算，咁我哋就同家姐喺樓下食，食完同妹妹各自回家，妹妹又話好耐無出叫我行一陣先回家，阿囡話想食pizza做晚餐，用yuu分加錢買咗盒飯，意粉，pizza同蒜茸包，用分換就抵好多，而家真係咩都貴，老公有時諗唔到就買個pizza回家做晚餐原來都要百幾蚊一個，真係好唔值，叫老公唔好再買，等我出開去用分加錢就平好多，今次出開去阿囡又想食就順便買回家，再加2塊牛扒同煮過菜開開心心又一餐

出門前已經煲定湯

呢個蛋糕仔雖然貴但又好好服務立即可以加名

晚餐之自家制XO醬炒雞軟骨

今日又約咗個婆婆去飲茶，好多時湊媽咪時同啲婆婆或嫲嫲熟咗，完工就會約她們食午餐後上去探啲BB, 呢個婆婆喺我剛入行時識，個大孫都差唔多5歲，之後對孖我就剛無時間，但媽咪早產我剛完工都有上去跟行同準備湯包，炒米茶教工人姐姐整比個媽咪食，因為疫情都好耐無上去，呢個工人姐姐還記得我，同婆婆飲完茶就上去探下3個仔，整咗他們最喜歡的提子格仔餅同雞蛋仔，另外買咗朱古力同糖，哥哥見到我就記得我，對孖雖然無見過我，但都好熱情，孖仔比媽咪湊到好似女咁，唔講都唔知喺仔，我笑個媽咪她話湊到3歲先變反男仔，想生個女點知打孖生多2個仔，所以要湊到對孖好似女好搞笑，坐到他們都要午睡就同婆婆離開，呢個媽咪好幸福請到呢個姐姐好勁，一個湊三個，本來話請多個幫手最後她要錢做埋，個媽咪就好開心，2個姐姐都怕煩，回家後又喺買餸準備晚餐，阿囡話好想食雞軟骨，咁就喺附近睇下有冇得買，入到間凍肉好誇要45蚊一磅，就返官塘睇下，咁啱佳寶有之前都買過今日做優惠24蚊一磅，咁就買咗幾磅回家分袋入雪櫃，隨時有得煮，本來諗住沙嗲炒，原來無哂咁就改用自己早前整的XO醬去炒，好惹味都好好食，開開心心又開餐

阿囡又買壽司返嚟

老公又買點心回來

我只係簡單炒菜

煮多個阿囡最愛的雞軟骨

材料：雞軟骨一磅，三色椒每色半個，干蔥3粒，XO醬2湯匙

雞軟骨洗淨用鹽水浸3-5分鐘去雪味

三色椒洗淨切細，干蔥洗淨切碎

雞軟骨先入鑊煎香2邊

加入XO醬

炒勻

加入三色椒

炒勻試味就搞掂

晚餐之蝦肉膠釀翠玉瓜配雜錦煲

呢次放假時間長多啲時間，而疫情又好些少就約啲同學出嚟聚下，又安排去探啲媽咪同BB，最開心完工有時間去探她們，最大都讀小一，今日約咗同學去食燒烤，而家出去食嘢比較麻煩，要安心出行加針紙，今日唔個咩嘢事去到搞完安心出行唔見咗針紙，又搵唔返張相，咁要同學等我一個鐘，咁啱今日搵果間入坐計2個鐘，同學堅持要等埋我先入去，唯有回家攞針紙再出去，好彩都唔太遠但來點都差唔多一個鐘，又落大雨塞車搭的都無用，回程時叫同學入去食住等，因為實在太唔好意思，之後聽新聞先知更新有啲人喺會無啦啦唔見咗，我都算唔好彩但老公又無事，而家約人前都要望下唔洗好似今次咁，大家太耐無見傾傾下叫埋單先發現咁快夠鐘，就拿拿淋攞多些少嘢食完就各自回家，今晚本來整沙鍋雲吞雞，但無雲吞皮搞咗啲料就搵只翠瓜去釀後再焗，雞就成只去煮諗加其它料，阿囡又話想食米線咁就加埋一齊，簡簡單單又開餐

成只雞加咗薑同甘筍先煮諗只雞

搞咗啲蝦膠再加啲豬肉

無雲吞皮唯有釀入瓜一樣咁好味

同學午餐食燒烤，2個鐘時間真係太少，好多嘢都無時間食

豐富晚餐慶母親節

今日母親節祝每個母親都健康幸福愉快，呢幾年4大長老都已離去，因疫情清明都喺呢幾個星期日安排去拜祭，今日都安排去拜媽咪又咁啱母親節，家姐話拜完就去飲茶慶祝同行下，因為今晚唔需要煮，而我本來都唔需要準備阿囡話買嘢回來食，我話好多嘢她就話留明天，咁一早出門前就先煲咗個蟲草響螺花膠湯先出門，今日都算唔好彩叫咗街車到時因唔喺清明人流多，啲交通無人理單程都有車亂嚟，只好等車掉頭先可落車，唔知咩情況下落車時家姐跌咗出去嚇到個個傻哂，我老公連忙想扶起都唔得，姐夫都連忙趕落車去幫手，搞咗好耐家姐起到身，後面有車要埋就叫我哋行開，啲人真係好差有事先行唔開，跟住我哋話有人跌倒叫他們等一陣，他們先走嚟望下沒有問要唔要幫手就行咗去，因為當時連眼鏡都搵唔到，最後先見到彈咗對面馬路，眼鏡就爛咗，大家都太亂無諗過叫白車，好彩家姐起到身企咗一段時間，但就好難再行，我哋唯有快快手搞掂再搵車走，好彩走時有車幫忙上嚟車我哋出返九龍，家姐話好啲唔需要入院，今次真係算好彩，跟住同家姐回家後我哋都回家，今晚阿囡買咗pizza 同壽司我就加個菜同焗蠔還有個湯開開心心又開餐

今次呢個唔係pizza hut 喺另一間，講完又唔記得，哈哈哈，海鮮批好好味都幾多料

自己焗個個話好味

今次個蠔用咗蒜茸，咸肉同2款芝士去焗